ເຈົ້າບຸນທຸ້ມ ຕົກລົງໃຫ້ ໂຣໂນລ ຄູມັນ ຄຸມທີມ ລໍຖ້າພຽງແຕ່ປະກາດຢ່າງເປັນທາງການ..!
ຕາມການລາຍງານຂອງສຳນັກຂ່າວຕ່າງປະເທດໃຫ້ຮູ້ວ່າ: ສະໂມສອນ ບາເຊໂລນ້າ ຮອງແຊ້ມ ລາລີກ້າ ແອັສປາຍ ລະດູການຫລ້າສຸດ ປະກາດແຕ່ງຕັ້ງ ໂຣໂນລ ຄູມັນ ອະດີດຄູຝຶກ ທີມຊາດໂຮນລັງ ແລະ ສະໂມສອນ ເອຟເວີຕັນ ເຂົ້າມາຄຸມທີມແທນ ກິເກ້ ເຊຕຽນ ທີ່ຖືກປົດອອກຈາກຕຳແໜ່ງ ຫຼັງພາທີມຕົກຮອບ 8 ທີມສຸດທ້າຍ ຢູຟ້າ ແຊ້ມປ້ຽນລີກ ເສຍໃຫ້ ບາເຢີນ ມິວນິກ 2-8, ໂດຍ ບາຣຊ້າ ຈະຈັດພິທີເປີດໂຕ ຄູມັນ ຢ່າງເປັນທາງການໃນອາທິດໜ້າ.
ສໍາລັບ ໂຣໂນລ ຄູມັນ ໄວ 57 ປີ ອະດີດກອງຫຼັງຂອງ ບາຊ້າ ເມື່ອປີ 1989-1995 ລົງຫຼິ້ນໃຫ້ທີມ 350 ນັດ ຄວ້າແຊ້ມລີກກັບທີມ 4 ສະໄໝ ແຊ້ມລາລີກາ,ໂຄປ້າເດເຣ, ຢູໂຣປ້ຽນຄັບ ແລະ ຢູໂຣປ້ຽນຊຸບເປີຄັບ. ພ້ອມກັບເປັນແຊ້ມ ສະແປນນິສ ຊຸບເປີຄັບ 3 ສະໄໝ. ນອກນັ້ນ ຄູມັນ ຍັງເຄີຍເປັນຜູ້ຊ່ວຍຂອງ ລຸຍ ຟານເກົາ ຕອນຄຸມ ບາຣຊ້າ ເມື່ອປີ 1998- 2000.ຄູມັນ ເປັນອະດີດນັກເຕະ ແລະ ຄູຝຶກທີ່ມີປະສົບການຫລາຍ, ສ່ວນປະສົບການຄຸມທີມ ເຄີຍຄຸມ 9 ສະໂມສອນໃນ 4 ປະເທດເຊັ່ນ: ໂຮນລັງ, ປັອກຕຸຍການ, ແອັສປາຍ ແລະ ອັງກິດ ເປັນຕົ້ນສະໂມສອນ ອາແຈັກ, ເບັນຟີກ້າ, ພີເອັສວີ, ບາເລັນເຊຍ, ເຊົາແທ່ມຕັນ ແລະ ເອຟເວີຕັນ ຫລ້າສຸດຄຸມທີມຊາດໂຮນລັງໄດ້ຮອງແຊ້ມ ຢູຟ້າ ເນຊັ່ນລີກ ປີ 2019.
