2 ບ້ານຢູ່ເມືອງພູວົງໄດ້ຊົມໃຊ້ນໍ້າບາດານແລ້ວ
ໃນວັນທີ 17 ສິງຫານີ້, ເມືອງພູວົງ ແຂວງອັດຕະປື ໄດ້ຈັດພິທີເປີດການນໍາໃຊ້ນໍ້າບາດານ ໃຫ້ແກ່ປະຊາຊົນບ້ານວຽງໄຊ ແລະ ບ້ານນໍ້າກົງ ຂອງໂຄງການເຂື່ອນໄຟຟ້ານ້ຳກົງ 1. ໂດຍເຂົ້າຮ່ວມມີ ທ່ານ ອຸ່ນຫລ້າ ໄຊຍະສິດ ຮອງເຈົ້າແຂວງອັດຕະປື. ມີການນໍາຂອງເມືອງ ອໍານາດການປົກຄອງບ້ານ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.
ໃນພິທີໄດ້ຜ່ານບົດລາຍງານການຈັດຕັ້ງປະຕິບັດຂອງໂຄງການກໍ່ສ້າງນໍ້າບານດານ ຢູ່ບ້ານວຽງໄຊ ແລະ ບ້ານນໍ້າກົງ, ເຊິ່ງພາຍໃຕ້ການຊ່ວຍເຫລືອດ້ານທຶນຮອນຂອງໂຄງການກໍ່ສ້າງເຂື່ອນໄຟຟ້ານ້ຳກົງ 1 , ເຊິ່ງໄດ້ເລີ່ມການກໍ່ສ້າງທັງຫມົດ 45 ວັນ ແຕ່ວັນທີ 12 ມິຖຸນາ ຫາ 30 ກໍລະກົດຜ່ານມາ, ເຈາະນໍ້າບາດານໄດ້ 7 ບໍ່ ເລິກ 40-70 ແມັດ, ເທເປຕົງເສີມເຫລັກ, ຕິດຕັ້ງແທ້ງນໍ້າ 7 ຖັງ, ຕິດຕັ້ງໂປມນໍ້າ ແລະ ເອົາກົງເຕີໄຟລົງ 7 ຈຸດ. ໃນນັ້ນ ບ້ານວຽງໄຊມີ 5 ຊຸດ ແລະ ບ້ານນໍ້າກົງ 2 ຊຸດ. ໂດຍແມ່ນບໍລິສັດບຸນວິໄລ ກໍ່ສ້າງ ເປັນຜູ້ຮັບເຫມົາການກໍ່ສ້າງ ລວມມູນຄ່າທັງໝົດ 50 ພັນໂດລາສະຫາລັດ.
ໂອກາດນີ້ ທ່ານ ຮອງເຈົ້າແຂວງອັດຕະປື ໄດ້ສະແດງຄວາມຂອບໃຈມາຍັງໂຄງການເຂື່ອນໄຟຟ້ານ້ຳກົງ 1 ທີ່ໄດ້ໃຫ້ການຊ່ວຍເຫລືອປະຊາຊົນ 2 ບ້ານຂອງເມືອງພູວົງ ໃຫ້ໄດ້ຊົມໃຊ້ນໍ້າບາດາເປັນການສ້າງຄວາມສະດວກໃຫ້ປະຊາຊົນໃນການຊົມໃຊ້ນໍ້າເຂົ້າໃນການອຸປະໂພກ-ບໍລິໂພກກໍຄືນໍາໃຊ້ເຂົ້າໃນການຜະລິດກະສິກໍາປູກຝັງ-ລ້ຽງສັດ. ພ້ອມທັງຮຽກຮ້ອງໃຫ້ອຳນາດການປົກຄອງບ້ານ ຈົ່ງພ້ອມກັນປົກປັກຮັກສາ ແລະ ນໍາໃຊ້ໃຫ້ເກີດປະໂຫຍດສູງສຸດ.
