ປັບປຸງຄະນະບໍລິຫານງານ ສດລ ຊຸດໃໝ່ ພ້ອມວິໄສທັດ “ເຂັ້ມແຂງ ມີຄຸນນະພາບ ເຊື່ອມໂຍງ ທຽບເທົ່າກັບພາກພື້ນ-ສາກົນ”
ປັບປຸງກົງຈັກການຈັດຕັ້ງ ຄະນະບໍລິຫານງານສະຫະພັນດອກປີກໄກ່ແຫ່ງຊາດລາວ (ສດລ) ຊຸດໃໝ່ ຢ່າງເປັນທາງການ ຂະນະທີ່ທ່ານ ປອ. ບຸນເຫຼືອ ສິນໄຊວໍຣະວົງ ຮອງລັດຖະມົນຕີ ກະຊວງການເງິນ ທັງເປັນປະທານ ສດລ ຄົນ ໃໝ່ ວາງວິໄສທັດ ຈະພັດທະນາກິລາດອກປີກໄກ່ລາວ ໃຫ້ມີຄວາມເຂັ້ມແຂງ, ມີຄຸນະພາບສູງ, ເຊື່ອມໂຍງ ແລະ ທຽບເທົ່າກັບພາກພື້ນ-ສາກົນ ແລະ ເປັນກິລາເພື່ອທຸກເພດທຸກໄວ ພາຍໃຕ້ຄຳຂວັນ “ເຂັ້ມແຂງ, ມີຄຸນະພາບສູງ, ເຊື່ອມໂຍງ ແລະ ເປັນກິລາເພື່ອທຸກຄົນ”.
ພິທີປະກາດກົງຈັກການຈັດຕັ້ງ ຄະນະບໍລິຫານງານສະຫະພັນດອກປີກໄກ່ແຫ່ງຊາດລາວ ຊຸດໃໝ່ ໄດ້ມີຂຶ້ນ ເມື່ອວັນທີ 14 ສິງຫາ ຜ່ານມາ ທີ່ຫ້ອງການຄະນະກຳມະການໂອແລມປີກແຫ່ງຊາດລາວ (ຄອລ) ໂດຍໃຫ້ກຽດເຂົ້າຮ່ວມເປັນສັກຂີພິຍານຂອງທ່ານ ນາງ ແສງເດືອນ ຫຼ້າຈັນທະບູນ ລັດຖະມົນຕີ ກະຊວງສຶກສາທິການ ແລະ ກິລາ (ສສກ) ທັງເປັນປະທານຄະນະກຳມະການໂອແລມປີກແຫ່ງຊາດລາວ, ມີທ່ານ ທອງຜ່ານ ສະຫວັນເພັດ ແລະ ທ່ານ ບຸນເຫຼືອ ພັນດານຸວົງ ທັງສອງທ່ານເປັນຮອງລັດຖະມົນຕີ ກະຊວງການຕ່າງປະເທດ, ທ່ານ ປອ ບຸນເຫຼືອ ສິນໄຊວໍຣະວົງ ຮອງລັດຖະມົນຕີ ກະຊວງການເງິນ ທັງເປັນປະທານ ສດລ ຄົນໃໝ່, ທ່ານ ສົມພູ ພົງສາ ຜູ້ຊ່ວຍລັດຖະມົນຕີ ສສກ ທັງເປັນຮອງປະທານ ແລະ ເລຂາທິການ ຄອລ ແລະ ທ່ານ ແສງພອນ ພົນອາມາດ ຫົວໜ້າກົມກິລາລະດັບສູງ ຕະຫຼອດຄະນະບໍລິຫານງານ ສດລ ແລະ ພະນັກງານທີ່ກ່ຽວຂ້ອງເຂົ້າຮ່ວມ.
ທ່ານ ສົມສະແຫວງ ແສງສີລາວົງ ຂຶ້ນກ່າວອຳລາໜ້າທີ່ ພ້ອມທັງລາຍງານບົດສະຫຼຸບຫຍໍ້ການເຄື່ອນໄຫວວຽກງານຂອງ ສດລ ໃນໄລຍະທີ່ຜ່ານມາ ໃຫ້ຮູ້ວ່າ: ນັບຕັ້ງແຕ່ປີ 2005 ເປັນຕົ້ນມາ ຂ້າພະເຈົ້າໄດ້ເລີ່ມຕົ້ນເຂົ້າຮ່ວມໃນວົງການກິລາດອກປີກໄກ່ລາວ ເຊິ່ງເວລານັ້ນ ຄະນະບໍລິຫານງານ ສດລ ໂດຍພາຍໃຕ້ການເປັນປະທານຂອງທ່ານ ສັນຕິພາບ ພົມວິຫານ ແລະ ທ່ານ ປອ. ບຸນເຫຼືອ ສິນໄຊວໍຣະວົງ ເປັນເລຂາທິການ ແລະ ຂ້າພະເຈົ້າເປັນຮອງປະທານ ທັງເປັນຜູ້ປະຈຳການ ພ້ອມດ້ວຍຄະນະກຳມະການອີກ 15 ທ່ານ. ຫຼັງຈາກນັ້ນ, ໃນປີ 2013 ໄດ້ມີການປັບປຸງກົງຈັກການຈັດຕັ້ງ ຄະນະບໍລິຫານງານ ສດລ ຊຸດໃໝ່ ພາຍໃຕ້ການເປັນປະທານຂອງທ່ານ ທອງຫຼ້າ ແສງວິໄຊ ກ່ອນຈະຕົກມາໃນປີ 2019 ທ່ານປະທານ ໄດ້ມີຈົດໝາຍສະເໜີຂໍລາອອກຢ່າງເປັນທາງການ ຍ້ອນເງື່ອນໄຂ ແລະ ສຸຂະພາບ ບໍ່ເອື້ອອຳນວຍ ຕໍ່ຈາກນັ້ນມາ ຂ້າພະເຈົ້າ ເອງກໍໄດ້ສືບຕໍ່ດຳເນີນວຽກງານເຮັດໜ້າທີ່ ຮັກສາການປະທານ ແລະ ເລຂາທິການຈົນມາເຖິງປັດຈຸບັນ.
ໃນໂອກາດດຽວກັນ, ທ່ານ ປອ. ບຸນເຫຼືອ ສິນໄຊວໍຣະວົງ ກໍໄດ້ຂຶ້ນກ່າວຮັບໜ້າທີ່ໃໝ່ ຢ່າງເປັນທາງການ ພ້ອມທັງເປີດເຜີຍວິໄສທັດ ຂອງ ຄະນະບໍລິຫານງານ ສດລ ຊຸດໃໝ່ ໃຫ້ຮູ້ວ່າ: ເພື່ອເປັນການນຳພາວົງການກິລາດອກປີກໄກ່ລາວ ສາມາດແຈ້ງເກີດໃນເວທີພາກພື້ນ-ສາກົນ ພວກເຮົາຈຶ່ງໄດ້ວາງວິໄສທັດ ກໍຄື ຈະພັດທະນາກິລາດອກປີກໄກ່ລາວ ໃຫ້ມີຄວາມເຂັ້ມແຂງ, ມີຄຸນະພາບສູງ, ເຊື່ອມໂຍງ ແລະ ທຽບເທົ່າກັບພາກພື້ນ-ສາກົນ ແລະ ເປັນກິລາເພື່ອທຸກເພດທຸກໄມ ພາຍໃຕ້ຄຳຂວັນ “ເຂັ້ມແຂງ, ມີຄຸນະພາບສູງ, ເຊື່ອມໂຍງ ແລະ ເປັນກິລາເພື່ອທຸກຄົນ” ອັນພິເສດທີ່ສຸດທີ່ຈະເຮັດໃຫ້ວົງການກິລາດອກປີກໄກ່ລາວມີຄວາມເຂັ້ມແຂງ ແມ່ນຈະເນັ້ນການສົ່ງເສີມພັດທະນາໃນຮຸ່ນເຍົາວະຊົນ ແລະ ຊາວໜຸ່ມ ຕັ້ງແຕ່ສູນກາງເຖິງທ້ອງຖິ່ນ ໃຫ້ມີຫຼາກຫຼາຍກວ້າງຂວາງ ມີບົດບາດ ແລະ ບາດກ້າວໃໝ່ ກໍຄື ຈະສົ່ງເສີມກົກງຈັກການຈັດຕັ້ງເຂັ້ມແຂງ ພ້ອມທັງຊ່ວຍເຫຼືອໃນດ້ານອຸປະກອນ ແລະ ຊຸກຍູ້ໃຫ້ມີການແຂ່ງຂັນຫຼາຍຂຶ້ນ ເພື່ອເຮັດໃຫ້ບັນລຸໄດ້ຄືແນວນັ້ນ ຈະພະຍາຍາມໃຫ້ມີຄູຝຶກ ພາຍໃນ ແລະ ຕ່າງປະເທດເຂົ້າຊ່ວຍພັດທະນາ ເພື່ອສ້າງພື້ນຖານເຕັກນິກໃນແກ່ນັກກິລາຕັ້ງແຕ່ເຍົາໄວ ແລະ ຈະຈັດການແຂ່ງຂັນກິລາດອກປ່ກໄກ່ໃຫ້ໄດ້ຫຼາຍລະດັບ ໂດຍສະເພາະໃນຮຸ່ນມັດທະຍົມຕົ້ນ, ມັດທະຍົມປາຍ, ລະດັບມະຫາວິທະຍາໄລ ແລະ ຮຸ່ນທົ່ວໄປ
ສຳລັບຄະນະບໍລິຫານງານ ສດລ ຊຸດໃໝ່ ປະກອບມີ ຄະນະປະທານທີ່ປືກສາ 4 ທ່ານ ໂດຍແມ່ນທ່ານ ສັນຕິພາບ ພົມວິຫານ ເປັນປະທານ ສ່ວນທ່ານ ບຸນເຫຼືອ ສິນໄຊວໍຣະວົງ ເປັນປະທານ ສດລ ແລະ ທ່ານ ສຸລິວັດ ສຸວັນນະຈຸມຄຳ, ທ່ານ ສົມບູນ ສີຫານາດ, ທ່ານ ນາງ ພວງທອງ ສ ສດລ ແລະ ທ່ານ ສຸລິວັດ ສຸວັນນະຈຸມຄຳ, ທ່ານ ສົມບູນ ສີຫານາດ, ທ່ານ ນາງ ພວງທອງ ສຸຍະວົງ, ທ່ານ ວົງເພັດ ວິໄລພອນ ແລະ ທ່ານ ວຽງສະຫວັນ ແສງຈັນ ເປັນຮອງປະທານ ສດລ ແລະ ທ່ານ ໄຊບັນດິດ ຣາຊະພົນ ເປັນເລຂາທິການ, ທ່ານ ບຸນຍະແສງ ນະຊຽງຄຳ ເປັນຮອງເລຂາທິການ ພ້ອມດ້ວຍຄະນະກຳມະການອີກ 11 ທ່ານ.
