ສະຫະລັດເອົາສາຂາ ຫົວເຫວີຍ ຫຼາຍສິບສາຂາ ເຂົ້າໃນບັນຊີດຳ

ສຳນັກຂ່າວ vnnet ໃຫ້ຮູ້ວັນທີ 17 ສິງຫານີ້້ວ່າ: ລັດຖະບານ ທຣຳ ໄດ້ປະກາດເປີດກວ້າງການລົງໂທດຕໍ່ຫົວເຫວີຍ ເພື່ອແນໃສ່ຈຳກັດການຕອບສະໜອງ ຊີບ(chip) ໃຫ້ບໍລິສັດຍັກໃຫ່ຍຂອງຈີນ.

ຂ່າວຈາກ Reuters ໃຫ້ຮູ້ວ່າ: ສະຫະລັດໄດ້ເອົາສາຂາຫົວເຫວີຍ 38 ແຫ່ງຕື່ມອີກເຂົ້າຢູ່ໃນບັນຊີດຳ, ຊຶ່ງໃນນັ້ນລວມທັງສາຂາທີ່ກຳລັງດຳເນີນກິດຈະການຢູ່ຕ່າງປະເທດນຳອີກດ້ວຍ.

ນັບແຕ່ເດືອນ ພຶດສະພາ 2019 ມາເຖິງຂະນະນີ້, ສະຫະລັດໄດ້ມີ 152 ສາຂາຂອງຫົວເຫວີຍຢູ່ໃນກຳມືແລ້ວ. ສາຂາເຫຼົ່ານັ້ນ ຖືກຫ້າມບໍ່ໃຫ້ຊື້ອຸປະກອນ ແລະ ເຄື່ອງອາໄຫຼ່ຈາກບໍລິສັດຂອງສະຫະລັດ ຖ້າຫາກບໍ່ໄດ້ຮັບການເຫັນດີຈາກລັດຖະບານ ທຣຳ.

RT ໃຫ້ຮູ້ວ່າ: ແຫຼ່ງຂາວຈາກໜ້າໜັງສືພິມວັນທີ 17 ສິງຫານີ້, ລັດຖະມົນຕີການຕ່າງປະເທດຂອງສະຫະລັດ ໄມພອມແພວ(Mike Pompeo)  ໄດ້ຍ້ອງຍໍຊົມເຊີຍການຕັດສິນໃຈຂອງກະຊວງການຄ້າຂອງສະຫະລັດທີ່ໄດ້ເປີດກວ້າງການຈຳກັດການສົ່ງອອກຂອງສະຫະລັດໃຫ້ແກ່ຫົວເຫວີຍ. ການປະກາດດັ່ງກ່າວໄດ້ກ່າວຫາວ່າ: “ຈີນລົບຫຼີກ” ຂໍ້ກຳນົດທີ່ຖືກນຳໃຊ້ແຕ່ເດືອນພຶດສະພາເປັນຕົ້ນມາ.

ທຣຳ ໄດ້ຮຽກຮ້ອງໃຫ້ພັນທະມິດຂອງຕົນປະຕິບັດການຈຳກັດຫົວເຫວີຍ ຄືກັນກັບສະຫະລັດໄດ້ປະຕິບັດໃນຂະນະນີ້. ການທີ່ເຮັດຄືແນວນີ້ແມ່ນມີຄວາມຈຳເປັນເພື່ອປົກປ້ອງ “ຄວາມສະຫງົບຂອງໂລກ”.

ຂ່າວ: ລູກເມືອງພວນ.