ທ່ານ ທຣຳ ຢາກພົບປະກັບປະທານາທິບໍດີ ປູຕີນ ກ່ອນວັນເລືອກຕັ້ງ

ສຳນັກຂ່າວ Zing ໂດຍອ້າງອີງແຫຼ່ງຂ່າວຈາກ NBC ໃຫ້ຮູ້ວັນທີ 16 ສິງຫານີ້ວ່າ: ປະທານາທິບໍດີ ດໍໂນທຣຳ ຂອງສະຫະລັດ ຢາກພົບປະກັບ ປະທານາທິບໍດີຂອງລັດເຊຍ ວະລາດີເມຍ ປູຕີນ ກ່ອນວັນເລືອກຕັ້ງປະທານາທິບໍດີສະຫະລັດໃນເດືອນພະຈິກທີ່ຈະມາເຖິງ.

ແຫຼ່ງຂ່າວ NBC News ໃຫ້ຮູ້ວ່າ: ເຈົ້າໜ້າທີ່ໃນລັດຖະບານຂອງ ທຣຳ ກຳລັງພິຈາລະນາສະຖານທີ່ ແລະ ວັນເວລາທີ່ຈະຈັດຕັ້ງການພົບປະລະຫວ່າງປະທານາທິບໍດີສະຫະລັດ ກັບ ປະທານາທິບໍດີຂອງລັດເຊຍຢູ່ໃນຂະນະນີ້ ແລະ ມີຄວາມເປັນໄປໄດ້ວ່າ ທ່ານປູຕີນ ອາດຈະບິນໄປ ນິວຢອກໃນເດືອນພະຈິກທີ່ຈະມາເຖິງ.

ຈຸດປະສົງຂອງການພົບປະສຸດຍອດໃນຄັ້ງນີ້,  ເພື່ອໃຫ້ຜູ້ນຳທັງສອງປະເທດປະກາດທິດທາງການຕົກລົງຄວບຄຸມອາວຸດນິວເຄຣຍໃໝ່ລະຫວ່າງສະຫະລັດ ແລະ ລັດເຊຍ.

ໂຄສົກຂອງທຳນຽບ Kremlin ຍັງບໍ່ທັນມີປະຕິກິລິຍາຫຍັງກັບບັນຫາດັ່ງກ່າວ. ວັນທີ 14 ສິງຫາ ກະຊວງການຕ່າງປະເທດຂອງສະຫະລັດໄດ້ປະກາດວ່າ: ຄະນະຜູ້ແທນລັດຖະບານຄວບຄຸມອາວຸດ, ທ່ານ Marshall Billingslea ມີແຜນຈະພົບປະກັບຮອງລັດຖະມົນຕີການຕ່າງປະເທດລັດເຊຍ Sergey Ryabkov ຢູ່ທີ່ວຽນນາໃນວັນທີ 17 ສິງຫາ ເພື່ອກະກຽມໃຫ້ແກ່ການພົບປະລະຫວ່າງສະຫະລັດກັບລັດເຊຍກ່ຽວກັບຂໍ້ຕົກລົງຄວບຄຸມອາວຸດ.

ຂ່າວ: ລູກເມືອງພວນ.