ລັດເຊຍເລີ່ມຂະບວນການຜະລິດວັກຊີນໂຄວິດ-19 ແລ້ວ

ຂ່າວຈາກ vnExpress ວັນທີ 16 ສິງຫານີ້ໃຫ້ຮູ້ວ່າ: ວັນທີ 15 ສິງຫາ ກະຊວງສາທາລະນະສຸກລັດເຊຍ ໄດ້ເລີ່ມຂະບວນການຜະລິດວັກຊີນໂຄວິດ-19 ແລ້ວ, ໂດຍສະຖາບັນຄົ້ນຄວ້າວິທະຍາສາດພະຍາດລະບາດວິທະຍາ ແລະ ຈຸລະຊີບວິທະຍາ Gamaleya ເປັນຜູ້ພັດທະນາ.
ຫວ່າງອາທິດກ່ອນນີ້, ລັດເຊຍເປັນຊາດທຳອິດປະກາດຂຶ້ນທະບຽນຈົດລີຂະສິດວັກຊີນຕ້ານໂຄວິດ-19 ເປັນປະເທດທຳອິດຂອງໂລກ. ວັກຊີນດັ່ງກ່າວມີຊື່ວ່າ sputnik v ແລະ ໄດ້ຜ່ານການກວດກາທຸກຂັ້ນຕອນທີ່ຈຳເປັນແລ້ວ ທັງໄດ້ພິສູດໃຫ້ເຫັນວ່າ ມີຄວາມສາມາດສ້າງຄສາມຄຸ້ມກັນໄວຣັດໄດ້.
ບັນດາເຈົ້າໜ້າທີ່ລັດເຊຍໃຫ້ຮູ້ວ່າ: ລັດເຊຍມີຄວາມສາມາດຜະລິດວັກຊີນ Sputnik V ໄດ້ 500 ໂດສ ໃນ 12 ເດືອນຂ້າງໜ້າ. ຄາດວ່າການຜະລິດຈະໄດ້ດຳເນີນຢູ່ຕ່າງປະເທດ ແລະ ການທົດລອງໄລຍະ 3 ກັບຄົນເຈັບແມ່ນຈະໄດ້ດຳເນີນຢູ່ໃນບັນດາປະເທດອາຣັບ, ຊາອຸດີອາຣາເບຍ ແລະ ຟີລິບປິນ.
ຂ່າວ: ລູກເມືອງພວນ.