ໂຮມສະຖາບັນຄົ້ນຄວ້າເສດຖະກິດ ແລະ ວິທະຍາສາດສັງຄົມແຫ່ງຊາດ ເຂົ້າກັນເປັນສະຖາບັນຄົ້ນຄວ້າເສດຖະກິດ-ສັງຄົມແຫ່ງຊາດ
ໃນວັນທີ 12 ສິງຫານີ້, ນາຍົກລັດຖະມົນຕີ ໄດ້ອອກດຳລັດເລກທີ 477/ນຍ ວ່າດ້ວຍການໂຮມສະຖາບັນຄົ້ນຄວ້າເສດຖະກິດແຫ່ງຊາດ ແລະ ສະຖາບັນວິທະຍາສາດສັງຄົມແຫ່ງຊາດ ເຂົ້າກັນເປັນສະຖາບັນຄົ້ນຄວ້າເສດຖະກິດ-ສັງຄົມແຫ່ງຊາດ ຕາມກົດໝາຍວ່າດ້ວຍລັດຖະບານແຫ່ງ ສປປ ລາວ, ມະຕິຕົກລົງຂອງກອງປະຊຸມຄະນະບໍລິຫານງານສູນກາງພັກ ຄັ້ງທີ 10 ສະໄໝທີ X ແລະ ທິດຊີ້ນຳຂອງກອງປະຊຸມກົມການເມືອງສູນກາງພັກ ຄັ້ງວັນທີ 29 ພຶດສະພາ 2020 ແລະ ການສະເໜີຂອງກະຊວງພາຍໃນ ແລະ ສອງສະຖາບັນດັ່ງກ່າວ.
ການໂຮມສອງສະຖາບັນນີ້ແມ່ນໂຮມທັງດ້ານກົນຈັກການຈັດຕັ້ງ, ບຸກຄະລາກອນ, ງົບປະມານ, ຕຶກອາຄານ ແລະ ຍານພາຫະນະຮັບໃຊ້ໃນການເຄື່ອນໄຫວວຽກງານ ບົນພື້ນຖານຮັກສາຄວາມສະຫງົບ, ຄວາມເປັນລະບຽບຮຽບຮ້ອຍ ແລະ ຄວາມສາມັກຄີຮັກແພງພາຍໃນການຈັດຕັ້ງ.
ໂດຍມອບໃຫ້ສະຖາບັນຄົ້ນຄວ້າເສດຖະກິດ-ສັງຄົມແຫ່ງຊາດ ປະສານສົມທົບກັບກະຊວງພາຍໃນຄົ້ນຄວ້າຮ່າງດຳລັດວ່າດ້ວຍການຈັດຕັ້ງ ແລະ ການເຄື່ອນໄຫວຂອງສະຖາບັນດັ່ງກ່າວໃຫ້ມີຄວາມຈະແຈ້ງ ແລະ ຮັດກຸມ.
