ປະທານາທິບໍດີຟີລິບປິນ ອາສາທົດລອງວັກແຊງ ໂຄວິດຂອງຣັດເຊຍ ຄົນທຳອິດຂອງປະເທດ
ທ່ານ ໂຣດຣິໂກ ດູເຕີເຕ ປະທານາທິບໍດີຟີລິບປິນ ອາສາທົດລອງວັກແຊງໂຄວິດ Sputnik V ຂອງຣັດເຊຍ ຄົນທຳອິດຂອງປະເທດ.
ວັນທີ 12 ສິງຫານີ້, ສຳນັກຂ່າວອານາໂດລູ ລະບຸວ່າ: ທ່ານ ໂຣດຣິໂກ ດູເຕີເຕ ປະທານາທິບໍດີຟີລິບປິນ ອາສາຈະທົດລອງວັກແຊງໂຄວິດຂອງຣັດເຊຍດ້ວຍຕົນເອງເປັນຄົນທຳອິດຂອງປະເທດ ໂດຍຈະຖ່າຍທອດທົດການສັກວັກແຊງທາງໂທລະພາບອີກດ້ວຍ.
ທ່ານ ດູເຕີເຕ ກ່າວເຖິງວັກແຊງຂອງຣັດເຊຍ ທີ່ພັດທະນາໂດຍສະຖາບັນກາມາເລຍາວ່າ: “ຂ້າພະເຈົ້າຈະເປັນຄົນທຳອິດທີ່ຈະທົດລອງສັກວັກແຊງຊະນິດນີ້, ຂ້າພະເຈົ້າເຊື່ອວ່າ: ວັກແຊງທີ່ຣັດເຊຍຜະລິດໄດ້ ເປັນສິ່ງທີ່ດີຕໍ່ມະນຸດ”.
ພ້ອມກັນນີ້, ທ່ານຍັງບອກວ່າ: ສະຖາບັນອາຫານ ແລະ ຢາຂອງຟີລິບປິນຈະເປັນໜ່ວຍງານພິຈາລະນາ ແລະ ຟີລິບປິນພ້ອມຈະໃຫ້ການຮ່ວມມືໃນການທົດລອງ, ຈຳໜ່າຍ, ແຈກຢາຍ ແລະ ຜະລິດວັກແຊງດັ່ງກ່າວ.
ຣັດເຊຍຕັ້ງຊື່ວັກແຊງນີ້ວ່າ: Sputnik V ຕາມຊື່ດາວທຽມຂອງສະຫະພາບໂຊວຽດ ໂດຍຣັດເຊຍ ແລະ ຫຸ້ນສ່ວນຕ່າງປະເທດພ້ອມຈະຜະລິດປະລິມານ 500 ລ້ານເຂັມຕໍ່ປີໃນ 5 ປະເທດ ເຊິ່ງລັດຖະບານຟີລິບປິນຕົກລົງສັ່ງວັກແຊງຫລາຍລ້ານເຂັມຈາກຣັດເຊຍແລ້ວ, ເຖິງວ່າວັກແຊງຈະຍັງບໍ່ຜ່ານການທົດລອງທາງຄລີນິກກໍຕາມ.
ສຳລັບຟີລິບປິນ ປັດຈຸບັນມີຜູ້ຕິດເຊື້ອ 139.538 ຄົນ ສູງທີ່ສຸດໃນອາຊຽນ, ສ່ວນຜູ້ເສຍຊີວິດມີ 2.312 ຄົນ.
