ລັດເຊຍໃສ່ຊື່ວັກຊີນຕ້ານໂຄວິດ-19 ຂອງຕົນວ່າ: Sputnik V

ອີງຕາມແຫຼ່ງຂ່າວຈາກ VOV.VN ໃຫ້ຮູ້ວັນທີ 12 ສິງຫານີ້ວ່າ: ວັກຊີນຕ້ານໂຄວິດ-19 ທຳອິດຂອງລັດເຊຍທີ່ຈະຈົດທະບຽນກັບໂລກນັ້ນຈະໃສ່ຊື່ວ່າ: Sputnik V.

ການທີ່ໃສ່ຊື່ວັກຊີນຄືກັນກັບຊື່ຂອງຍານອາວະກາດ Sputnik V ນັ້ນ ກໍເພື່ອສົມທຽບໃຫ້ເຫັນວ່າ: ເຫດການດັ່ງກ່າວມີລັກສະນະເປັນຂີດໝາຍທາງປະຫວັດສາດທີ່ຍິ່ງໃຫ່ຍຂອງລັດເຊຍນັ້ນເອງ.

ຍານອາວະກາດ Sputnik V ທຽມ ໃນສະໄໝ ໂຊວຽດ ຖືກປ່ອຍຂຶ້ນສູ່ເສັ້ນວົງໂຄຈອນໃນປີ 1957 ຊຶ່ງເປັນການເປີດສັງກາດໃໝ່ ແຫ່ງການຄົ້ນຄວ້າອາວະກາດຂອງໂລກ. ດັ່ງນັ້ນ, ການໃສ່ຊື່ວັກຊີນຕ້ານໂຄວິດ-19 ເປັນຊື່ດຽວກັນກັບຍານອາວະກາດນັ້ນ ກໍແມ່ນບາດລ້ຽວປະຫວັດສາດແຫ່ງການຄົ້ນຄວ້າທີ່ມີຜົນສຳເລັດທາງດ້ານການແພດຂອງລັດເຊຍ. ປັດຈຸບັນ ໃນທົ່ວໂລກມີ 160 ຊະນິດວັກຊີນຕ້ານໂຄວິດ-19 ທີ່ຫຼາຍປະເທດໄດ້ທຳການຄົ້ນຄວ້າ.

ໃນວັນດຽວກັນ, ປະທານາທິບໍດີ ປູຕີນ ຂອງລັດເຊຍ ກໍໄດ້ອອກມາປະກາດວ່າ: ລັດເຊຍເປັນລັດທຳອິດໃນໂລກທີ່ໄດ້ລົງທະບຽນວັກຊີນຕ້ານໂຄວິດ-19 ຂອງໂລກ ພາຍຫຼັງມີການທົດລອງກັບຄົນບໍ່ເຖິງ 2 ເດືອນ.

ຂ່າວ: ລູກເມືອງພວນ.