7 ຄຸນປະໂຫຍດດີໆທີ່ມີຢູ່ໃນແກ່ນໝາກອຶ

ທັນຍາພືດຊະນິດໜຶ່ງທີ່ອາດຈະບໍ່ໄດ້ເປັນທີ່ນິຍົມພໍປານໃດ ພວກເຮົາກຳລັງເວົ້າເຖິງ “ແກ່ນໝາກອຶ”ທ່ານໃດທີ່ກິນໝາກອຶເປັນປະຈຳ ຮູ້ຫລືບໍ່ວ່າ ແກ່ນໝາກອຶ ເປັນອີກໜຶ່ງທັນຍາພືດທີ່ອຸດົມໄປດ້ວຍຄຸນປະໂຫຍດນາໆຊະນິດ, ໃຜທີ່ກຳລັງເບື່ອທັນຍາພືດແບບເກົ່າໆຢູ່ກໍສາມາດລອງປ່ຽນມາບໍລິໂພກແກ່ນໝາກອຶແທນໄດ້ ເຊິ່ງມີປະໂຫຍດຫຍັງແດ່ນັ້ນ ມີດັ່ງນີ້ :

1. ອຸດົມໄປດ້ວຍສານ (tryptophan): ທຣິບໂຕຟານ ແມ່ນໜຶ່ງໃນກົດອະມິໂນຈຳເປັນທັງ 8 ຊະນິດທີ່ຮ່າງກາຍບໍ່ສາມາດຜະລິດຂຶ້ນເອງໄດ້ ຕ້ອງອາໄສການກິນອາຫານຈຳພວກນົມ, ເນີຍ, ໄຂ່ແດງ, ຊີ້ນສັດ, ປາ, ຖົ່ວດິນ, ໝາກກ້ວຍ, ແກ່ນໝາກອຶ ແລະ ອາຫານຊະນິດອື່ນໆທີ່ມີໂປຣຕິນສູງ ເມື່ອຮ່າງກາຍຂອງເຮົາໄດ້ຮັບກົດອະມິໂນຊະນິດດັ່ງກ່າວນີ້ກໍຈະປ່ຽນເປັນຮໍໂມນເຊໂຣໂທນິນ ຫລື ຮໍໂມນນອນຫລັບ ແລະ ທ່ານກໍຈະສາມາດພັກຜ່ອນນອນຫລັບໄດ້ຢ່າງເຕັມອີ່ມຫລັງຈາກທີ່ອິດເມື່ອຍມາໝົດມື້. ດັ່ງນັ້ນ, ກ່ອນເຂົ້ານອນປະມານ 3 – 4 ຊົ່ວໂມງ ຫລື ໃນຄາບອາຫານ ທ່ານສາມາດກິນແກ່ນໝາກອຶເພື່ອໃຫ້ພັກຜ່ອນໄດ້ເຕັມອີ່ມ.
2. ສັບພະຄຸນຕ້ານການອັກເສບ :ມີການສຶກສາວິໄຈທີ່ຄົ້ນພົບວ່າ ໃນນຳ້ມັນແກ່ນໝາກອຶມີສານເຊິ່ງມີລິດຊ່ວຍຫລຸດຜ່ອນອາການອັກເສບພາຍໃນຮ່າງກາຍ ໂດຍແກ່ນໝາກອຶ ຫລື ນຳ້ມັນແກ່ນໝາກອຶນີ້ຈະເຮັດໜ້າທີ່ຄືກັບຢາ ອິນໂດເມທາຊິນ (Indomethacin) ທີ່ຊ່ວຍຫລຸດຜ່ອນອາການປວດຂໍ້ ຫລື ກ້າມຊີ້ນ, ແຕ່ວ່າຢາເຫລົ່ານີ້ຊຳ້ພັດມີຜົນຂ້າງຄຽງຫາກກິນຕິດຕໍ່ກັນຍາວນານ ທ່ານສາມາດເລືອກໃຊ້ນຳ້ມັນແກ່ນໝາກອຶທົດແທນ ເນື່ອງຈາກມີສັບພະຄຸນຊ່ວຍຫລຸດຜ່ອນອາການອັກເສບ ແລະ ຍັງຊ່ວຍປິ່ນປົວພະຍາດຂໍ້ຕໍ່ອັກເສບໄດ້ນຳ.
3. ຊ່ວຍຕໍ່ຕ້ານພະຍາດເບົາຫວານ : ແກ່ນໝາກອຶມີປະໂຫຍດຢ່າງຍິ່ງຕໍ່ຜູ້ທີ່ກຳລັງເປັນພະຍາດເບົາຫວານ ຫລື ຜູ້ທີ່ກຳລັງສ່ຽງຕໍ່ການເປັນພະຍາດດັ່ງກ່າວ ເນື່ອງຈາກໃນແກ່ນໝາກອຶມີສານທີ່ສາມາດຊ່ວຍຄວບຄຸມລະດັບຮໍໂມນອິນຊູລິນພາຍໃນຮ່າງກາຍໃຫ້ເໝາະສົມ ໂດຍຮໍໂມນຊະນິດນີ້ຈະມີໜ້າທີ່ຄວບຄຸມການເຜົາຜານຄາໂບໄຮເດຣດກັບໄຂມັນ ເພື່ອບໍ່ໃຫ້ນຳ້ຕານຕົກຄ້າງໃນກະແສເລືອດ (ສາເຫດຂອງພະຍາດເບົາຫວານ) ແລະ ຍັງມີສ່ວນຊ່ວຍໃນການປິ່ນປົວພະຍາດເບົາຫວານປະເພດທີ 1.
4. ອຸດົມໄປດ້ວຍກົດໄຂມັນໂອເມກ້າ 3 : ຮູ້ຫລືບໍ່ວ່າແກ່ນໝາກອຶ ຫລື ທັນຍາພືດ ແລະ ຖົ່ວຊະນິດຕ່າງໆນັ້ນເປັນແຫ່ລງຂຸມຊັບມະຫາສານຂອງກົດໄຂມັນໂອເມກ້າ 3 ຊະນິດທີ່ສາມາດພົບໄດ້ໃນພືດ ເຊິ່ງກົດໄຂມັນໂອເມກ້າ 3 ນີ້ກໍລ້ວນແຕ່ເປັນປະໂຫຍດຕໍ່ຮ່າງກາຍຂອງເຮົາທັງໝົດ ພຽງແຕ່ທ່ານກິນແກ່ນໝາກອຶ ຫລື ພືດຜັກຊະນິດອື່ນໆເພື່ອໃຫ້ຮ່າງກາຍໄດ້ຮັບໂອເມກ້າ 3 ຢ່າງພຽງພໍ ກໍຈະຊ່ວຍປົກປ້ອງເຮົາຈາກພະຍາດຕ່າງໆ ເຊັ່ນ : ພະຍາດຫົວໃຈ ແລະ ບຳລຸງລະບົບພູມຕ້ານທານໃຫ້ແຂງແຮງ.
5. ເປັນແຫ່ລງຂອງແຮ່ທາດສັງກະສີ : ແຮ່ທາດ (zinc) ແມ່ນອີກໜຶ່ງຄຸນປະໂຫຍດທີ່ພົບໄດ້ໃນແກ່ນໝາກອຶ ເພາະເຮົາຄົງຮູ້ກັນດີຢູ່ແລ້ວວ່າແຮ່ທາດສັງກະສີເປັນແຮ່ທາດທີ່ຈຳເປັນຕໍ່ຮ່າງກາຍບໍ່ໜ້ອຍໄປກ່ວາແຮ່ທາດອື່ນໆ ເຊິ່ງແຮ່ທາດສັງກະສີຈະຊ່ວຍເສີມສ້າງຄວາມແຂງແຮງໃຫ້ກັບລະບົບພູມຕ້ານທານ, ບຳລຸງຜິວ ທັງຍັງມີບົດບາດໃນການຊ່ວຍຮັກສາຄວາມດຸ່ນດ່ຽງຂອງອາລົມແລະ ການພັກຜ່ອນ ເຮົາຈະຮູ້ສຶກອ່ອນເພຍ, ສິວຂຶ້ນ ແລະ ປ່ວຍຕະຫລອດ ເມື່ອຮ່າງກາຍຂາດແຮ່ທາດສັງກະສີ.
6. ອຸດົມໄປດ້ວຍແມັກນີຊຽມ :ແກ່ນໝາກອຶພຽງເຄິ່ງຖ້ວຍນ້ອຍກໍສາມາດເຮັດໃຫ້ຮ່າງກາຍຂອງເຮົາໄດ້ຮັບແມັກນີຊຽມຢ່າງພຽງພໍໃນແຕ່ລະມື້ ໂດຍທີ່ແຮ່ທາດແມັກນີຊຽມນີ້ມີໜ້າທີ່ຊ່ວຍສະໜັບສະໜຸນການເຮັດວຽກຂອງລະບົບຕ່າງໆພາຍໃນຮ່າງກາຍຂອງມະນຸດເຮົາ ເຊັ່ນ : ບຳລຸງແຂ້ວ ແລະ ກະດູກໃຫ້ແຂງແຮງ, ຊ່ວຍສັງເຄາະຂະບວນການເຮັດວຽກຂອງ DNA ແລະRNAທັງຍັງຊ່ວຍຄວບຄຸມອັດຕາການເຕັ້ນຂອງຫົວໃຈໃຫ້ເປັນປົກກະຕິ ແລະ ເມື່ອຮ່າງກາຍຂອງທ່ານມີແມັກນີຊຽມພຽງພໍກໍຍັງຈະຊ່ວຍປ້ອງກັນອາການຫົວໃຈວາຍ ແລະ ໄຂມັນອັດຕັນເສັ້ນເລືອດໄດ້ນຳ.
7. ດູແລສຸຂະພາບຫົວໃຈ ແລະ ຕັບ : ອະໄວຍະວະຫລວງຫລາຍໃນຮ່າງກາຍຂອງທ່ານລ້ວນແຕ່ຕ້ອງການຄົນດູແລ ແລະ ແກ່ນໝາກອຶກໍຈະເປັນຜູ້ດູແລທີ່ດີຂອງຫົວໃຈ ແລະ ຕັບ ເພາະອຸດົມໄປດ້ວຍໄຍອາຫານ, ໄຂມັນທີ່ມີປະໂຫຍດ ແລະ ສານຕໍ່ຕ້ານອະນຸມູນອິດສະລະຫລາຍຊະນິດທີ່ເປັນປະໂຫຍດຕໍ່ການເຮັດວຽກຂອງຫົວໃຈ ແລະ ຕັບ ທັງຍັງຊ່ວຍປ້ອງກັນພະຍາດທີ່ກ່ຽວຂ້ອງກັບຕັບທັງຫລາຍ ຫລື ອາການຫົວໃຈລົ້ມເຫລວໄດ້ນຳອີກ. ເຖິງວ່າແກ່ນໝາກອຶຈະເປັນທັນຍາພືດຂະໜາດນ້ອຍ ແລະ ອາດບໍ່ໄດ້ຮັບຄວາມນິຍົມຄືກັບທັນຍາພືດຊະນິດອື່ນໆ, ແຕ່ຄຸນປະໂຫຍດທີ່ມີກໍຫລາຍຄືກັນ ທັງຍັງຫາກິນໄດ້ງ່າຍ ດ້ວຍລາຄາທີ່ບໍ່ແພງຈົນເກີນໄປ ແລະ ກໍເຮັດໃຫ້ທຸກທ່ານມີສຸຂະພາບທີ່ດີໄດ້.