ລາວຍັງບໍ່ພົບຜູ້ຕິດເຊື້ອໂຄວິດ-19 ເພີ້ມ ຂະນະທີ່ທົ່ວໂລກຍັງໜ້າເປັນຫ່ວງ
ໃນວັນທີ 11 ສິງຫາ 2020 ກະຊວງສາທາລະນະສຸກ ຢືນຢັນວ່າ ລາວຍັງບໍ່ພົບຜູ້ຕິດເຊື້ອໂຄວິດ-19 ເພີ້ມ ຕົວເລກສະສົມ 20 ຄົນ, ໃນນັ້ນຮັກສາຫາຍດີ 19 ຄົນ ແລະ 1 ຄົນກຳ ລັງປິ່ນປົວຮັກສາ ໃນຂະນະທີ່ການລະບາດໃນທົ່ວໂລກ ຍັງໜ້າເປັນຫ່ວງ ຕົວເລກຜູ້ຕິດເຊື້ອສູງເຖິງ 20.230.801 ແລະ ເສຍຊີວິດ 737.647 ຄົນ.
ທ່ານ ດຣ.ສີສະຫວາດ ສຸດທານີລະໄຊ ຮອງຫົວໜ້າກົມຄວບຄຸມພະຍາດຕິດຕໍ່, ກະຊວງສາທາ ລະນະສຸກ ກ່າວວ່າ: ອີງໃສ່ສະພາບການຂອງໂລກ ເຫັນວ່າມີຫລາຍປະເທດ ຍັງມີການລະບາດເປັນວົງກ້ວາງ ມີຜູ້ຕິດເຊື້ອ ແລະ ເສຍຊີວິດປະຈຳວັນເປັນຈຳນວນຫລາຍ. ສະນັ້ນ, ຮຽກຮ້ອງໃຫ້ພໍ່ແມ່ ປະຊາຊົນບັນດາເຜົ່າ, ອົງການຈັດຕັ້ງທຸກພາກສ່ວນ ຈົ່ງສືບຕໍ່ຮ່ວມມືເປັນເຈົ້າການສືບຕໍ່ຈັດຕັ້ງປະຕິບັດ ແຈ້ງການ, ບັນດາຂໍ້ແນະນຳຕ່າງໆ ຂອງຄະນະສະເພາະກິດວາງອອກຢ່າງເຂັ້ມງວດ, ພ້ອມກັນປ້ອງກັນຕົນເອງ, ປ້ອງກັນຄອບຄົວ ແລະ ຜູ້ທີ່ຮັກແພງໃກ້ຊິດ ກັບບັນດາທ່ານ ຈາກການຕິດເຊື້ອພະຍາດໂຄວິດ-19 ທັງເປັນການປະກອບສ່ວນອັນສໍາຄັນ ໃຫ້ແກ່ປະເທດຊາດ.
ທ່ານ ດຣ. ສີສະຫວາດ ສຸດທານີລະໄຊ ໄດ້ລາຍງານໃຫ້ຮູ້ວ່າ: ມາຮອດວັນທີ 10 ສິງຫາ 2020, ໄດ້ເກັບຕົວຢ່າງມາກວດວິເຄາະທັງໝົດ 419 ຄົນ, ໃນນັ້ນແຮງງານລາວມາແຕ່ໄທ 60 ຕົວຢ່າງ, ແຮງງານຈີນ 45 ຕົວຢ່າງ, ແຮງງານລາວມາແຕ່ຈີນ 2 ຕົວຢ່າງ, ບຸກຄົນທົ່ວໄປທີ່ມີອາ ການ 1 ຕົວຢ່າງ ແລະ ບຸກຄົນທົ່ວໄປທີ່ບໍ່ມີອາການ 389 ຕົວຢ່າງ, ຜົນກວດວິເຄາະທັງໝົດແມ່ນບໍ່ພົບເຊື້ອ ສັງລວມການກວດວິເຄາະແຕ່ເດືອນມັງກອນ ຮອດ ວັນທີ 10 ສິງຫາ 2020 ໄດ້ເກັບຕົວ ຢ່າງມາກວດທັງໝົດ 31.374 ຕົວຢ່າງ ແລະ ກວດພົບເຊື້ອສະສົມ 20 ຄົນ.
