ຜູ້ພັດທະນາໂຄງການເຂື່ອນໄຟຟ້າ ຕ້ອງເພີ່ມທະວີການປະຕິ ບັດລະບຽບກົດໝາຍ ກ່ຽວກັບການຄຸ້ມຄອງນ້ຳໃນເຂື່ອນ
ທ່ານ ຄໍາມະນີ ອິນທິລາດ ລັດຖະມົນຕີກະຊວງ ພະລັງງານ ແລະ ບໍ່ແຮ່ ໄດ້ເນັ້ນໃຫ້ຜູ້ອຳນວຍການ ລັດວິສາຫະກິດ, ອົງການຈັດຕັ້ງສາກົນ ແລະ ຜູ້ພັດທະນາໂຄງການເຂື່ອນໄຟຟ້າຕ່າງໆ ໃນຂອບເຂດທົ່ວປະເທດ ຕ້ອງເພີ່ມທະວີຄວາມສັກສິດ ໃນການປະຕິບັດກົດໝາຍ, ລະບຽບການ ແລະ ຈັດຕັ້ງປະຕິບັດພາລະບົດບາດ ແລະ ໜ້າທີ່ ຂອງພາກສ່ວນຄຸ້ມຄອງມະຫາພາກ ກ່ຽວກັບການຄຸ້ມຄອງນ້ຳ, ຄຸ້ມຄອງແຫ່ງຊັບພະຍາກອນອ່າງນ້ຳໃຫ້ດີຂຶ້ນ ພວກເຮົາຈະຕ້ອງໄດ້ພ້ອມກັນຄົ້ນ ຄວ້າ, ປຶກສາຫາລື ແລະ ວາງວິທີການ, ມາດຕະການແກ້ໄຂ ໂດຍສະເພາະແມ່ນແນໃສ່ເພື່ອຮັບ ປະກັນໃຫ້ແຕ່ລະເຂື່ອນມີຄວາມປອດໄພ, ເຮັດໃຫ້ການບໍລິຫານຈັດການນໍ້າມີຄຸນນະພາບສູງ, ສ້າງເງື່ອນໄຂໃຫ້ການຜະລິດພະລັງງານໄຟຟ້າມີປະສິດທິຜົນ, ເຮັດໃຫ້ການປ້ອງກັນໄພທໍາມະຊາດ ແລະ ການຮັບມືສຸກເສີນທັນກັບສະພາບການ.
ທ່ານລັດຖະມົນຕີ ກະຊວງ ພະລັງງານ ແລະ ບໍ່ແຮ່ ໄດ້ເນັ້ນຕື່ມວ່າ: ການບໍລິຫານຈັດການອ່າງນ້ຳຂອງເຂື່ອນຕ່າງໆ ພວກເຮົາຕ້ອງໄດ້ສືບຕໍ່ຮ່ວມມືກັນນຳໄປປັບປຸງ, ນຳໄປຈັດຕັ້ງປະຕິບັດໃຫ້ເປັນຮູບປະທໍາ ເພື່ອເຮັດໃຫ້ການຄຸ້ມຄອງ, ການບໍລິຫານຈັດການນໍ້າ, ການຜະລິດພະລັງງານໄຟຟ້າມີຄວາມຮັບປະກັນ, ປອດໄພ ແລະ ໄດ້ຮັບຜົນປະໂຫຍດສູງສຸດ ຕໍ່ໂຄງການ, ສັງຄົມ ແລະ ປະເທດຊາດ; ພາກລັດຕ້ອງໄດ້ສຶກສາຄົ້ນຄ້ວາ ສ້າງລະບຽບການຈຳນວນໜຶ່ງຕື່ມຢ່າງເປັນລະບົບຄົບຊຸດ ເພື່ອເປັນເຄື່ອງມືອັນສໍາຄັນໃນການຄຸ້ມຄອງ; ພວກເຮົາຕ້ອງໄດ້ຮ່ວມກັນເພື່ອດໍາເນີນການສຶກສາຄົ້ນຄວ້າ ເພື່ອກ້າວໄປສູ່ການສ້າງສູນບັນຊານໍ້າ ລະດັບອ່າງໂຕ່ງ, ລະດັບກະຊວງ ແລະ ລະດັບແຫ່ງຊາດ.
ນອກຈາກນີ້, ຕ້ອງສຶກສາຄົ້ນຄວ້າ ເພື່ອສ້າງຕັ້ງຄະນະກຳມະການນໍ້າ ໃນລະດັບອ່າງໂຕ່ງ, ລະດັບກະຊວງ ແລະ ລະດັບແຫ່ງຊາດ; ຕ້ອງໄດ້ສືບຕໍ່ຈັດກອງປະຊຸມປະຈຳປີ ເພື່ອແລກປ່ຽນຂໍ້ມູນຂ່າວສານ, ແລກປ່ຽນປະສົບການ ໃນການຈັດການບໍລິຫານອ່າງນໍ້າ ຂອງເຂື່ອນໃນແຕ່ລະປີ. ພ້ອມນີ້, ຕ້ອງໄດ້ມີການປະສານສົມທົບ ລະຫວ່າງເຂື່ອນດ້ວຍກັນ ໃນການວາງແຜນນຳໃຊ້ນໍ້າຮ່ວມກັນຢ່າງຈິງຈັງ. ສຳລັບເຂື່ອນທີ່ມີອ່າງແລ້ວ ຕ້ອງໄດ້ເອົາໃຈໃສ ໃນການວາງແຜນໄລຍະສັ້ນ, ກາງ ແລະ ຍາວຢ່າງເຊັດເຈນ; ສະເໜີໃຫ້ບໍລິສັດໂຄງການ ເອົາໃຈໃສ່ເປັນພິເສດກ່ຽວກັບ ຄວາມປອດໄພເຂື່ອນການປ້ອງກັນນໍ້າຖ້ວມ ແລະ ປ້ອງກັນໄພແຫ້ງແລ້ງ ແລະ ການສ້າງແຜນຮັບມືສຸກເສີນໃຫ້ສາມາດປະຕິບັດໄດ້ ເພື່ອຫລີກລ້ຽງຜົນເສຍຫາຍ ທີ່ຈະຕາມມາດ້ານເສດຖະກິດ-ສັງຄົມ ແລະ ສິ່ງແວດລ້ອມ. ສະເໜີ ໃຫ້ບໍລິສັດໂຄງການເຂື່ອນ ເອົາໃຈໃສ່ແລກປ່ຽນຂໍ້ມູນຂ່າວສານ, ເປັນຕົ້ນແມ່ນການບໍລິຫານຈັດການອ່າງນໍ້າ, ການປ່ອຍນ້ຳ, ການກັກເກັບນ້ຳ, ການຜະລິດ, ແຜນການຮັບມືສຸກເສີນ ແລະ ອື່ນໆ ລະຫວ່າງ ພາກລັດ, ເຂື່ອນດ້ວຍກັນ ແລະ ມີມາດຕະການລະອຽດ ເພື່ອກຽມຄວາມພ້ອມຮັບມືກັບເຫດສຸກເສີນໃນທຸກກໍລະນີ.
