ສິ້ນສຸດ 35 ປີ Toshiba ຂາຍຫຸ້ນທີ່ເຫລືອໃຫ້ Sharp ປິດສຸກ ‘ທຸລະກິດຄອມພິວເຕີສ່ວນບຸກຄົນ’ ຖາວອນ
ຫລັງຈາກຢູ່ໃນທຸລະກິດນີ້ມາຍາວນານ 35 ປີ ໃນທີ່ສຸດ Toshiba ໜຶ່ງໃນຍັກໃຫຍ່ເຄື່ອງໃຊ້ໄຟຟ້າຂອງຍີ່ປຸ່ນ ໄດ້ຕັດສິນໃຈອອກຈາກທຸລະກິດຄອມພິວເຕີສ່ວນບຸກຄົນຢ່າງຖາວອນແລ້ວ.
ຕາມຖະແຫລງການຂອງ Toshiba ລະບຸວ່າ: ໄດ້ຂາຍຫຸ້ນທີ່ເຫລືອອີກ 19,9% ທີ່ມີໃນທຸລະກິດແລັບທ໊ອບໃຫ້ Sharp ເຊິ່ງກ່ອນໜ້ານີ້ຊື້ຫຸ້ນໃຫຍ່ 80,1% ໃນປີ 2018 ລາຄາ 36 ລ້ານໂດລາສະຫະລັດ ນັບແຕ່ນັ້ນເປັນຕົ້ນມາ ບໍລິສັດຍ່ອຍທີ່ຜະລິດພີຊີຖືກດຳນີນການພາຍໃຕ້ຊື່ໃໝ່ທີ່ເອີ້ນວ່າ Dynabook ໂດຍປ່ຽນຊື່ຢ່າງເປັນທາງການໃນເດືອນມັງກອນ 2019.
Toshiba ຖືວ່າມີຊື່ສຽງຫລາຍໃນທຸລະກິດຄອມພິວເຕີສ່ວນບຸກຄົນ ຫລັງຈາກເປີດຕົວຄອມພິວເຕີແບບພົກພາ T1100 ໃນປີ 1985 ເຊິ່ງສ້າງມາດຕະຖານໃຫ້ແກ່ອຸດສາຫະກຳແລັບທ໊ອບໃນເວລານັ້ນຢ່າງວ່ອງໄວ ເພາະເປັນນະວັດຕະກຳໃໝ່ທີ່ມີຄຸນສົມບັດເຊັ່ນ: ແບັດເຕີຣີທີ່ຊາກໄດ້, ໜ້າຈໍ LCD, ຟອບປີ້ດິສໄດຣຂະໜາດ 3,5 ນິ້ວ ແລະ ຍັງມີລາຄາທີ່ໜັກຊໍ່າກັບໜ່ວຍ 2.000 ໂດລາສະຫະລັດ.
ນັບແຕ່ນັ້ນເປັນຕົ້ນມາ Toshiba ຖືເປັນຜູ້ນຳໃນອຸດສາຫະກຳແລັບທ໊ອບ ໂດຍສະເພາະຊ່ວງທົດສະວັດທີ 1990 ແລະ 2000 ແຕ່ຫລັງຈາກນັ້ນຄວາມໂດດເດັ່ນທີ່ມີກໍຫາຍໄປ ເຊິ່ງມາຈາກຫລາຍປັດໄຈເຊັ່ນ: ການເດີມພັນ HD DVD ທີ່ລົ້ມເຫລວ ເພາະຖືກ Blu-ray ແລະ ສະຕຣີມມິງເຂົ້າມາຕີຕະຫລາດ.
ຂະນະດຽວກັນ ໄດ້ຖືກຕີຕະຫລາດຈາກ Ultraportable ຫລື ແລັບທ໊ອບລຸ້ນບາງ ທີ່ນຳໂດຍ MacBook Air ຂອງ Apple ລວມທັງຄູ່ແຂ່ງຄົນອື່ນໆເຊັ່ນ: Dell ແລະ Lenovo ເຊິ່ງ Toshiba ສູ້ບໍ່ໄດ້ ຈົນເຮັດໃຫ້ Toshiba ລ້າຫລັງກວ່າຄູ່ແຂ່ງ ແລະ ເດີນທາງມາເຖິງຈຸດທີ່ຕ້ອງອອກຈາກຕະຫລາດຢ່າງຖາວອນ.
