ອົງການ USAID ແລະ UNICEF ສືບຕໍ່ສະໜັບສະໜູນວຽກງານຮັກສາ ສຸຂະພາບ ແລະ ໂພຊະນາການຂອງແມ່ ແລະ ເດັກໃນລາວ
ວັນທີ 7 ສິງຫານີ້, ອົງການ USAID ແລະ ອົງການສະຫະປະຊາຊາດສໍາລັບເດັກ (UNICEF) ໃຫ້ຄໍາໝັ້ນສັນຍາວ່າຈະສືບຕໍ່ສະໜັບສະໜູນລັດຖະບານລາວ ເພື່ອປັບປຸງດ້ານສຸຂະພາບ ແລະ ໂພຊະນາການຂອງແມ່ ແລະ ເດັກທີ່ອາໄສຢູ່ເຂດຊຸມຊຸມຫ່າງໄກສອກຫຼີກທີ່ມີຄວາມຫຍຸ້ງຍາກໃນການເຂົ້າເຖິງການບໍລິການດ້ານສຸຂະພາບ ໂດຍອົງການ USAID ໄດ້ມອບທຶນຊ່ວຍເຫຼືອ 2,8 ລ້ານໂດລາສະຫະລັດ ໃຫ້ແກ່ອົງການ UNICEF ສໍາລັບແຜນງານ 5 ປີ ເພື່ອປະຕິບັດວຽກງານດັ່ງກ່າວ ເຊິ່ງຄາດວ່າເຮັດວຽກຕົວຈິງໃນເດືອນກັນຍາທີ່ຈະມາເຖິງນີ້, ພາຍຫລັງເຫັນວ່າ ສປປ ລາວ ມີຄວາມກ້າວໜ້າຫຼາຍໃນການປັບປຸງຊີວິດການເປັນຢູ່ຂອງເດັກນ້ອຍ ແລະ ແມ່ດີຂຶ້ນ ເຮັດໃຫ້ອັດຕາການຕາຍຂອງແມ່ຫຼຸດລົງຈາກ 905/100.000 ໃນປີ 1990 ຍັງເຫຼືອ 197/100.000 ໃນປີ 2015. ອັດຕາການຕາຍຂອງເດັກນ້ອຍລຸ່ມ 5 ປີ ແລະ ເດັກອ່ອນຫຼຸດລົງເຖິງໃນລະດັບເຄິ່ງໜຶ່ງຖ້າທຽບໃສ່ປີ 1990 ຄືຈາກ 46 ມາເປັນ 40/1.000 ຄົນ. ເຖິງວ່າຈະມີຄວາມຄືບໜ້າໃນການປັບປຸງຜົນໄດ້ຮັບດ້ານສຸຂະພາບ ແລະ ໂພຊະນາການສຳລັບເດັກ ແລະ ແມ່, ແຕ່ຍັງມີເດັກນ້ອຍອາຍຸລຸ່ມ 5 ປີ ຈໍານວນໜຶ່ງຍັງເສຍຊີວິດຈາກພະຍາດທີ່ສາມາດປ້ອງກັນ ຫຼື ປິ່ນປົວໄດ້ເຊັ່ນ: ອັກເສບປອດ, ຖອກທ້ອງ ແລະ ຂາດສານອາຫານ. ຄວາມຄືບໜ້າໃນການແກ້ໄຂບັນຫາການຂາດສານອາຫານໃນເດັກນ້ອຍຍັງຊັກຊ້າ. ອັດຕາສັດສ່ວນຂອງເດັກເຕ້ຍ (ລວງສູງທຽບໃສ່ອາຍຸ) ໂດຍສະເລ່ຍໃນທົ່ວປະເທດແມ່ນ 33% ແລະ ສໍາລັບເດັກອາຍຸລຸ່ມ 5 ປີ ຍັງພົບຫຼາຍກວ່າ 40% ໃນກຸ່ມດ້ອຍໂອກາດ.
