ຄວາມຍຸຕິທຳມີແທ້ ! ຕໍ່ສູ້ 20 ປີ ເພື່ອຄວາມບໍລິສຸດຈົນພົ້ນໂທດປະຫານ
ໃນວັນທີ 6 ສິງຫາ, ສຳນັກຂ່າວຊິນຮົວ ລາຍງານວ່າ: ສານຈີນປີ້ນຄຳຕັດສິນໃຫ້ທ້າວ ຈາງ ວີ່ ຮວນ ນັກໂທດຊາຍຊາວຈີນ ປັດຈຸບັນອາຍຸ 52 ປີ ພົ້ນຜິດຈາກຄະດີຄາດຕະກຳເດັກນ້ອຍຜູ້ຊາຍ 2 ຄົນໃນປີ 1993 ຫລັງຈາກນັກໂທດຜູ້ນີ້ຕິດຄຸກມາແລ້ວ 27 ປີ ໂດຍສານຊີ້ວ່າ: ບໍ່ມີພະຍານຫລັກຖານພຽງພໍທີ່ຈະພິສູດໄດ້ວ່າທ້າວ ຈາງ ກະທຳຄວາມຜິດໃນຄະດີຄາດຕະກຳດັ່ງກ່າວ.
ໂດຍສານສູງປະຊາຊົນໃນມົນທົນຈຽງຊີ ທາງຕາເວັນອອກຂອງຈີນ ມີຄຳຕັດສິນຄະດີນີ້ເມື່ອວັນທີ 4 ສິງຫາຜ່ານມາ ຊີ້ວ່າ: ຫລັງຈາກສານໄດ້ພິຈາລະນາວັດຖຸພະຍານຕ່າງໆ ບໍ່ພົບຫລັກຖານທີ່ພິສູດໄດ້ວ່າ: “ທ້າວ ຈາງ ກະທຳຄວາມຜິດ ຈຶ່ງຂໍປະກາດໃຫ້ທ້າວ ຈາງ ເປັນຜູ້ບໍລິສຸດ”.
ສຳນັກຂ່າວຊິນຮົວລາຍງານວ່າ: ທ້າວ ຈາງ ເປັນນັກໂທດທີ່ຖືກສານຕັດສິນຜິດພາດວ່າລາວກະທຳຜິດ ເຊິ່ງຖືກຈອງຈຳຢູ່ໃນຄຸກຍາວນານທີ່ສຸດໃນປະເທດຈີນ. ຂະນະທີ່ການຕັດສິນຊີ້ຂາດຄະດີນີ້ ສານໄດ້ແຕ່ພຽງກ່າວຂໍໂທດທ້າວ ຈາງ ຈາກການຕັດສິນຜິດພາດທີ່ເຮັດໃຫ້ທ້າວ ຈາງ ຕ້ອງຕິດຄຸກຟຣີເຖິງ 27 ປີ.
ທັງນີ້ໃນປີ 1995 ທ້າວ ຈາງ ຖືກສານພິພາກສາໂທດປະຫານຊີວິດ, ແຕ່ລາວໄດ້ຮັບການຫລຸດໂທດລົງເຫລືອຕິດຄຸກຕະຫລອດຊີວິດ ຫລັງຈາກຕິດຄຸກມາແລ້ວ 2 ປີ. ຜ່ານມາທ້າວ ຈາງ ຍື່ນອຸທອນເພື່ອຂໍ້ສູ້ຄະດີມາແລ້ວຫລາຍເທື່ອ ແຕ່ບໍ່ເຄີຍປະສົບຜົນສຳເລັດ ໂດຍທ້າວ ຈາງ ຍັງກ່າວວ່າ: ລາວຖືກຕຳຫລວດທຳຮ້າຍຮ່າງກາຍ ແລະ ບັງຄັບໃຫ້ສາລະພາບ, ກ່ອນໃນເດືອນມີນາປີຜ່ານມາ ສານຢູ່ມົນທົນຈຽງຊີຈະເຫັນພ້ອມໃຫ້ມີການສືບສວນຄະດີທ້າວ ຈາງ ຄືນໃໝ່. ກະທັ້ງມີຄຳຕັດສິນໃຫ້ທ້າວ ຈາງ ພົ້ນຜິດ ເນື່ອງຈາກບໍ່ມີພະຍານຫລັກຖານທີ່ຈະພິສູດຄວາມຜິດໄດ້.
ສຳນັກຂ່າວຊິນຮົວລາຍງານວ່າ: ຫລັງຈາກໄດ້ຮັບອິດສະຫລະພາບ, ທ້າວ ຈາງ ໄດ້ກັບໄປຢູ່ກັບຄອບຄົວ ແລະ ອາຫານຄາບທຳອິດທີ່ລາວໄດ້ກິນຫລັງຕິດຄຸກເຖິງ 27 ປີ ຄືບົວລອຍ ແລະ ຕົ້ມເຄັມໄຂ່.
ສ່ວນທະນາຍຄວາມຂອງທ້າວ ຈາງ ເປີດເຜີຍຕໍ່ສື່ທາງການຈີນອີກສຳນັກວ່າ: ລູກຄວາມຂອງຕົນຕ້ອງການການຊົດເຊີຍຄວາມເສຍຫາຍ ແລະ ຕ້ອງການໃຫ້ມີຜູ້ທີ່ມີສ່ວນກ່ຽວຂ້ອງຕໍ່ການຕັດສິນຄະດີຜິດພາດ ມາຮັບຜິດຊອບຕໍ່ການກະທຳດັ່ງກ່າວ.
