ສະພາກາແດງເຢຍລະມັນ ມອບລົດຕູ້ 5 ຄັນໃຫ້ແກ່ກາແດງລາວ
ໃນຕອນບ່າຍຂອງວັນທີ 5 ສິງຫາ 2020 ທີ່ສູນເລືອດແຫ່ງຊາດ ອົງການກາແດງລາວໄດ້ມີພິທີ ມອບ – ຮັບ ພາຫະນະລົດຕູ້ ຈຳນວນ 05 ຄັນ ໃຫ້ແກ່ສູນເລືອດແຂວງຫົວພັນ, ຊຽງຊວາງ, ຈຳປາສັກ ແລະ ສູນເລືອດແຫ່ງຊາດ; ເຊິ່ງກ່າວມອບໂດຍ ພະນະທ່ານ ເຈນສ ລຸດເກນແຮມ (Jens Lutkenherm) ເອກອັກຄະລັດຖະທູດ ເຢຍລະມັນ ປະຈຳລາວ, ທ່ານ ດຣ. ທິມ ເບ (Tim Bray) ຜູ້ຕາງໜ້າສະພາກາແດງເຢັຍລະມັນ ແລະ ກ່າວຮັບໂດຍ ທ່ານ ຄຳຮຸ່ງ ເຮືອງວົງສີ ປະທານອົງການກາແດງລາວ.
ໃນໄລຍະຜ່ານມາ ອົງການກາແດງເຢຍລະມັນແມ່ນໄດ້ໃຫ້ການຊ່ວຍເຫຼືອສູນເລືອດແຫ່ງຊາດ ອົງການກາແດງລາວ ໂດຍສະເພາະຢູ່ຂັ້ນແຂວງ ແລະ ເມືອງ ໂດຍສະເພາະແມ່ນວຽກງານການບໍລິຈາກເລືອດມີຄວາມເຂັ້ມແຂງ, ປອດໄພທັງປະລິມານ ແລະ ຄຸນນະພາບ ຕາມມາດຕະຖານແຫ່ງຊາດ ແລະ ທິດຊີ້ນຳຂອງອົງການອະນາໄມໂລກ, ຫຼາຍປີຜ່ານມາ ວຽກງານເລືອດ ແມ່ນໄດ້ການປັບປຸງ ເຊິ່ງມັນສະແດງອອກໃນການລິຈາກເລືອດເພີ່ມຂຶ້ນ, ປະຈຸບັນການເຈາະເກັບເລືອດ ແມ່ນຫຼາຍກວ່າ 55.000ຖົງຕໍ່ປີ (ເປົ້າໝາຍປີ 2020 ແມ່ນ 60.700ຖົງ) ແຕ່ວ່າກໍ່ບໍ່ທັນພຽງພໍຕາມຄວາມຕ້ອງການ, ດັ່ງນັ້ນ; ມັນມີຄວາມຕ້ອງການທີ່ຈະຕ້ອງໄດ້ອັດຊ່ອງຫວ່າງນີ້ ໂດຍສະເພາະແມ່ນຂັ້ນແຂວງ ແລະ ຂັ້ນເມືອງ ແມ່ນມີຄວາມຕ້ອງເລືອດໃສ່ໃຫ້ຄົນເຈັບນັບມື້ນັບມີທ່າອ່ຽງເພີ່ມຂຶ້ນ, ຍ້ອນເຫັນຄວາມສຳຄັນໃນວຽກງານເລືອດ ທາງອົງການກາແດງເຢຍລະມັນຈຶ່ງໄດ້ມອບພາຫະນະ ເພື່ອນຳໃຊ້ເຂົ້າໃນວຽກງານການປຸກລະດົມບໍລິຈາກເລືອດຕາມສະຖານທີ່ເປົ້າໝາຍຕ່າງໆພາຍໃນແຂວງ ແນໃສ່ຮັບປະກັນໃຫ້ມີການຕອບສະໜອງເລືອດພຽງພໍ, ປອດໄພ ແລະ ທັນເວລາໃຫ້ແກ່ຄົນເຈັບ, ສຳລັບລົດຈຳນວນ 05 ຄັນ ທີ່ນຳມາມອບໃຫ້ຄັ້ງນີ້ ແມ່ນມີມູນຄ່າ 135.000 ໂດຣາສະຫະລັດ.
