7 ຊ່ວງເວລາທີ່ແມ່ຍິງມີສະເໜ່ຫລາຍທີ່ສຸດ
August 6, 2020 - 10:51 AM
- ເວລາບໍ່່ມັກນິນທາຄົນອື່ນ : ແມ່ຍິງລົມເກັ່ງ, ແຕ່ບໍ່ນິນທາ ກໍຖືວ່າເປັນອີກໜຶ່ງລັກສະນະຂອງແມ່ຍິງມີສະເໜ່ກໍວ່າໄດ້ ເຖິງແມ່ນວ່າການນິນທາຈະເປັນເລື່ອງປົກກະຕິຂອງແມ່ຍິງສ່ວນຫລາຍ ແຕ່ມັນກໍຄວນມີຂອບເຂດ ຈຶ່ງຈະເອີ້ນວ່າມີສະເໜ່ໄດ້ ເພາະນອກຈາກການນິນທາຈະເຮັດໃຫ້ທ່ານເບິ່ງເປັນຄົນບໍ່ມີສະເໜ່ແລ້ວ ມັນຍັງເຮັດໃຫ້ຄວາມໜ້າເຊື່ອຖືຫລຸດລົງໄປເລື້ອຍໆນຳອີກ.
- ເວລາທີ່ຮູ້ຈັກຄວບຄຸມອາລົມຄວາມຮູ້ສຶກ : ແມ່ຍິງມີສະເໜ່ນັ້ນຈະຄວບຄຸມອາລົມຄວາມຮູ້ສຶກຂອງຕົນເອງໄດ້ດີ ມີເລື່ອງໃຫ້ຫງຸດຫງິດກໍບໍ່ໂວຍວາຍ, ເສຍໃຈກໍບໍ່ຟູມຟາຍ, ເຫັນຜູ້ຊາຍຫລໍ່ກໍບໍ່ຮ້ອງໂຮ ນິ້ງໄວ້ກ່ອນ ຖືວ່າເປັນຄົນມີສະເໜ່ທີ່ສຸດ.
- ເວລາທີ່ມີຄວາມໝັ້ນໃຈ : ແມ່ຍິງມີສະເໜ່ຈະໝັ້ນໃຈໃນຕົນເອງ ບໍ່ຕ້ອງງາມກໍມີສະເໜ່ໄດ້ ຂໍພຽງແຕ່ທ່ານມີຄວາມໝັ້ນໃຈ ດຶງຈຸດເດັ່ນຂອງຕົນເອງອອກມາໃຊ້ໃຫ້ເປັນປະໂຫຍດ, ແຕ່ກໍຢ່າໝັ້ນໃຈເກີນໄປ ຈົນເຖິງຂັ້ນຕ້ອງໃຊ້ຄຳວ່າຍິ່ງທໍລະນົງ ແລ້ວນອກຈາກຄວາມໝັ້ນໃຈແລ້ວນັ້ນ ບຸກຄະລິກກະພາບກໍສຳຄັນເຊັ່ນກັນ ການແຕ່ງກາຍ, ການເລືອກເຄື່ອງນຸ່ງໃຫ້ເໝາະສົມ ກໍມີສ່ວນຊ່ວຍເພີ່ມຄວາມໝັ້ນໃຈໄດ້.
- ເວລາທີ່ໃຊ້ໂລກອອນລາຍໃຫ້ເປັນ : ທຸກມື້ນີ້ອັນໃດກໍຕ້ອງອາໄສໂລກອອນລາຍ ແລະ ບອກເລີຍວ່າແມ່ຍິງທີ່ມີສະເໜ່ຈະບໍ່ໂພສຫຍັງໄປທົ່ວເພື່ອຮຽກຮ້ອງຄວາມສົນໃຈໃດໆ ຍິ່ງດ່າຄົນນັ້ນຄົນນີ້ລົງໃນໂລກອອນລາຍ ຍິ່ງເປັນການຫລຸດສະເໜ່ຂອງຕົນເອງລົງ ເຮັດໃຫ້ຄົນອື່ນເບິ່ງທ່ານໃນດ້ານລົບ ແລະ ອາດຈະເຮັດໃຫ້ເຂົາລັງກຽດທ່ານໄປເລີຍກໍເປັນໄດ້.
- ເວລາທີ່ຮູ້ຈັກການວາງໂຕ : ການຮູ້ຈັກກາລະເທສະ ຖືວ່າເປັນອີກໜຶ່ງຄຸນສົມບັດ ແມ່ຍິງທີ່ມີສະເໜ່ຄວນຮູ້ວ່າຕ້ອງປະຕິບັດໂຕໃນສະຖານະການຕ່າງໆແນວໃດ ຢູ່ຕໍ່ໜ້າຜູ້ໃຫຍ່, ຢູ່ກັບໝູ່ກັບແຟນ ຕ້ອງເຮັດໂຕໃຫ້ເໝາະສົມໄດ້ແນວໃດ ເຊິ່ງຈະຊ່ວຍສ້າງສະເໜ່ໄດ້ດີເລີຍ.
- ເວລາທີ່ຍິ້ມເກັ່ງ : ແມ່ຍິງທີ່ມີສະເໜ່ ນາງຈະຍິ້ມເກັ່ງ, ການຍິ້ມຖືວ່າເປັນການສ້າງສະເໜ່ທີ່ເຮັດໄດ້ງ່າຍ ໃຜໆກໍເຮັດໄດ້ ບໍ່ຈຳເປັນຕ້ອງມີໜ້າຕາຈົບງາມ ໜ້າຮັກແບບເນັດໄອດອລ ທ່ານກໍມີສະເໜ່ໄດ້ດ້ວຍຮອຍຍິ້ມຂອງທ່ານ, ເປັນເລື່ອງຈິງທີ່ວ່າຮອຍຍິ້ມເຮັດໃຫ້ໂລກສົດໃສ ໂດຍສະເພາະຍິ້ມທີ່ອອກມາຈາກໃຈ. ສະນັ້ນ, ຈົ່ງປ່ຽນຕົນເອງເບິ່ງ ແລ້ວຈະຮັບຮູ້ໄດ້ເຖິງຄວາມປ່ຽນແປງ ນອກຈາກຈະເບິ່ງເປັນຄົນມີສະເໜ່ຕໍ່ຄົນອ້ອມຂ້າງຫລາຍຂຶ້ນແລ້ວ ຍັງຈະເຮັດໃຫ້ທ່ານມີຄວາມສຸກກັບຊີວິດຫລາຍຂຶ້ນນຳ.
- ເວລາທີ່ເປັນໂຕຂອງໂຕເອງ : ບໍ່ທຳທ່າ, ບໍ່ຝືນ, ເປັນຄົນແບບໃດກໍສະແດງອອກມາແບບນັ້ນ ທຸກຢ່າງຈະເບິ່ງເປັນທຳມະຊາດ ຖ້າເປັນໂຕຂອງໂຕເອງແຕ່ທຳອິດ. ຫາກພົບຄົນທີ່ຮັບໄດ້ກໍຖືວ່າດີໄປ ແຕ່ຫາກເຂົາບໍ່ມັກໃນຄວາມເປັນເຮົາ ກໍຖືວ່າເປັນການຄັດເລືອກຄົນທີ່ຈະເຂົ້າມາໃນຊີວິດ ເພາະຫາກທ່ານຝືນສະແດງໃນສິ່ງທີ່ບໍ່ແມ່ນ ນອກຈາກຈະເບິ່ງອອກວ່າເປັນການສະແດງແກ້ງທຳແລ້ວ ຫາກຮູ້ຈັກກັນໄປດົນໆທ່ານຈະສາມາດຝຶນຕົນເອງໄດ້ຕະຫລອດຫລືບໍ່ ແລ້ວທ່ານຈະມີຄວາມສຸກໄດ້ແນວໃດ ຖ້າທ່ານບໍ່ເປັນໂຕຂອງທ່ານເອງ.
