6 ທັດສະນະຂອງພັກຕໍ່ວຽກງານສື່ມວນຊົນ
(ລະນຶກວັນສ້າງຕັ້ງສື່ມວນຊົນ ແລະ ການພິມຈຳໜ່າຍ)
ຮຽບຮຽງໂດຍ: ຂ. ຊານຸບານ
ໃນມະຕິ 36 ຂອງກົມການເມືອງສູນກາງພັກກ່ຽວກັບການເພີ່ມທະວີການນຳພາຂອງພັກ ແລະ ການຄຸ້ມຄອງຂອງລັດຕໍ່ສື່ມວນຊົນໃນໄລຍະໃໝ່ນີ້ ເພື່ອແນໃສ່ຍົກສູງລັກສະນະສຶກສາອົບຮົມ, ລັກສະນະຕໍ່ສູ້ ແລະ ລັກສະນະຕົວຈິງຂອງວຽກງານແນວຄິດ ກໍຄືການປັບປຸງ ແລະ ຍົກສູງຄຸນນະພາບຂອງວຽກງານໂຄສະນາຖະແຫລງຂ່າວໃຫ້ທັນກັບຄວາມຮຽກຮ້ອງຕ້ອງການຂອງສັງຄົມໃນໄລຍະໃໝ່, ພັກເຮົາໄດ້ລະບຸໄວ້ວ່າ: ພາຫະນະສື່ມວນຊົນແມ່ນເຄື່ອງມືດ້ານການເມືອງແນວຄິດຂອງບັນດາອົງການຈັດຕັ້ງໃນລະບົບການເມືອງ ເຊິ່ງມີພັກທີ່ເປັນແກນນຳທີ່ປະກອບມີສື່ສິ່ງພິມ, ຂ່າວສານ, ວິທະຍຸກະຈາຍສຽງ, ໂທລະພາບ ແລະ ສື່ໃໝ່ອື່ນໆ ທີ່ໄດ້ຮັບການປະຕິບັດດ້ວຍພາຫະນະເຕັກນິກທີ່ແຕກຕ່າງກັນ.
ໃນພາລະກິດແຫ່ງການສືບຕໍ່ສ້າງ ແລະ ຂະຫຍາຍລະບອບປະຊາທິປະໄຕປະຊາຊົນ ກໍຄືພາລະກິດປ່ຽນແປງໃໝ່ຮອບດ້ານຢ່າງມີຫລັກການຂອງພັກເຮົານັ້ນ, ພາຫະນະສື່ມວນຊົນຍິ່ງມີບົດບາດສຳຄັນໃນການເສີມສ້າງຄວາມສາມັກຄີປອງດອງທົ່ວປວງຊົນທັງຊາດໃນການໂຄສະນາປຸກລະດົມ, ຊຸກຍູ້ການພັດທະນາເສດຖະກິດ-ສັງຄົມຂອງປະເທດເຮົາ, ຫັນປ່ຽນເສດຖະກິດທຳມະຊາດເປັນເສດຖະກິດສິນຄ້າໃນການສຶກສາອົບຮົມການເມືອງແນວຄິດ, ສ້າງທັດສະນະຫລັກໝັ້ນ ແລະ ຄວາມເຊື່ອໝັ້ນຕໍ່ອຸດົມຄະຕິ ແລະ ການນຳພາຂອງພັກໃນການຊຸກຍູ້ປຸກລະດົມທົ່ວປວງຊົນເຮັດໜ້າທີ່ປ້ອງກັນຊາດ-ປ້ອງກັນຄວາມສະຫງົບໃນການໂຄສະນາດຶງດູດເອົາການຮ່ວມມື, ການຊ່ວຍເຫລືອ ແລະ ການລົງທຶນຈາກຕ່າງປະເທດ ຕະຫລອດເຖິງການເສີມຂະຫຍາຍປະຊາທິປະໄຕ ແລະ ຕໍ່ສູ້ຕ້ານປາກົດການຫຍໍ້ທໍ້ຕ່າງໆທີ່ເກີດຂຶ້ນ ແລະ ອື່ນໆອີກ. ດ້ວຍເຫດຜົນນີ້ ພາຫະນະສື່ມວນຊົນຕ້ອງມີລັກສະນະຕໍ່ສູ້, ລັກສະນະສຶກສາອົບຮົມ, ລັກສະນະຊີ້ນຳມະຫາຊົນ ແລະ ລັກສະນະຕົວຈິງ. ດັ່ງນັ້ນ ມວນຊົນຈະຕ້ອງເຊື່ອມຊຶມກຳແໜ້ນບັນດາທັດສະນະຂອງພັກຄື:
- ຕ້ອງເປັນເຄື່ອງມືອັນແຫລມຄົມຂອງພັກ ແລະ ລັດເຮົາໃນການໂຄສະນາເຜີຍແຜ່ແນວທາງ, ແຜນນະໂຍບາຍຂອງພັກ ແລະ ລະບຽບກົດໝາຍ-ນະໂຍບາຍຂອງລັດ, ໃຫ້ການສຶກສາອົບຮົມທາງດ້ານການເມືອງ-ແນວຄິດແກ່ມະຫາຊົນ, ປຸກລະດົມຊຸກຍູ້ເຂົາເຈົ້າປະກອບສ່ວນເຂົ້າໃນການປະຕິບັດສອງໜ້າທີ່ຍຸດທະສາດ ກໍຄືພາລະກິດແຫ່ງການສືບຕໍ່ສ້າງ ແລະ ຂະຫຍາຍລະບອບປະຊາທິປະໄຕປະຊາຊົນ, ສ້າງບັນດາປະຖົມປັດໄຈໃຫ້ແກ່ການກ້າວຂຶ້ນສູ່ສັງຄົມນິຍົມເທື່ອລະກ້າວ.
- ຕ້ອງເປັນເວທີຂອງມະຫາຊົນ, ເປັນສາຍໄຍຜູກພັນມະຫາຊົນກັບພັກ. ໝາຍວ່າສື່ມວນຊົນນອກຈາກເປັນພາຫະນະ, ເປັນເຄື່ອງມືທີ່ນຳເອົາແນວຄິດ, ແນວທາງ, ທັດສະນະຂອງພັກໄປສູ່ມະຫາຊົນແລ້ວ ຍັງຕ້ອງເປັນເວທີໃຫ້ມະຫາຊົນໄດ້ສະແດງຄວາມຄິດຄວາມເຫັນ, ທັດສະນະອັນສ້າງສັນກ່ຽວກັບການນຳພາຂອງພັກ ແລະ ການຄຸ້ມຄອງຂອງລັດເຮົາ ຫລື ເວົ້າອີກຢ່າງໜຶ່ງແມ່ນເປັນເວທີແຫ່ງການເສີມຂະຫຍາຍປະຊາທິປະໄຕ ແລະ ສິດເປັນເຈົ້າປະເທດຊາດຂອງປະຊາຊົນເຜົ່າຕ່າງໆຢ່າງແທ້ຈິງ ເຮັດໃຫ້ພັກກັບມະຫາຊົນໃກ້ຊິດຕິດພັນກັນສະໜິດແໜ້ນຂຶ້ນເລື້ອຍໆ. ຢາກເຮັດໄດ້ແນວນັ້ນ ຕ້ອງໄດ້ຮັບປະກັນສິດໄດ້ຮັບຂ່າວ ແລະ ສິດໄດ້ຖະແຫລງຂ່າວຂອງມະຫາຊົນ.
- ສື່ມວນຊົນຕ້ອງມີຫລາຍຮູບຫລາຍສີ ແລະ ອຸດົມຮັ່ງມີດ້ານເນື້ອໃນ. ໝາຍວ່າສື່ມວນຊົນຕ້ອງສ້າງຄວາມນິຍົມຊົມຊອບຄວາມສົນອົກສົນໃຈ, ຕ້ອງການນຳເອົາຜົນປະໂຫຍດທາງກົງ ແລະ ທາງອ້ອມໄປໃຫ້ຜູ້ອ່ານ, ຜູ້ຟັງ ແລະ ຜູ້ເບິ່ງ. ສະນັ້ນ ຕ້ອງມີຫລາຍຮູບຫລາຍສີທີ່ສອດຄ່ອງກັບຄວາມມັກ ແລະ ຄວາມຕ້ອງການຂອງຄົນ, ທັງມີເນື້ອຫາສາລະອັນອຸດົມຮັ່ງມີ, ຕ້ອງການໃຫ້ຂໍ້ມູນຂ່າວສານ, ຄວາມຮູ້ໃນດ້ານຕ່າງໆ, ໃຫ້ທັງສາລະຄະດີ ແລະ ຄວາມເບີກບານ ໄປຄຽງຄູ່ກັບການສຶກສາອົບຮົມຈັດຕັ້ງປຸກລະດົມມະຫາຊົນ.
- ອົງການ, ຂະແໜງການ, ພະນັກງານນຳພາຂອງພັກ ແລະ ລັດຂັ້ນຕ່າງໆ ມີຄວາມຮັບຜິດຊອບ ແລະ ຕ້ອງເອົາໃຈໃສ່ຊີ້ນຳ, ຊ່ວຍເຫລືອສື່ມວນຊົນໃຫ້ສາມາດປະຕິບັດໜ້າທີ່ໄດ້ຢ່າງຖືກຕ້ອງ ແລະ ມີປະສິດທິຜົນສູງຂຶ້ນເລື້ອຍໆ.
- ມີນະໂຍບາຍອັນເໝາະສົມຕໍ່ສື່ມວນຊົນໃນເງື່ອນໄຂທີ່ພວກເຮົາຫັນໄປສູ່ກົນໄກໃໝ່ນີ້ ຄວນມີຄວາມເຂົ້າໃຈທີ່ຖືກຕ້ອງກ່ຽວກັບນະໂຍບາຍຕໍ່ສື່ມວນຊົນ, ໃນດ້ານໜຶ່ງ ພວກເຮົາຄວນຮັບຮູ້ວ່າ ຈະແມ່ນໃນລະບອບໃດ ຫລື ເງື່ອນໄຂຂອງກົນໄກອັນໃດກໍຕາມ ແມ່ນລ້ວນແຕ່ຈຳເປັນຕ້ອງມີສື່ມວນຊົນ ເພື່ອຕອບສະໜອງຄວາມຕ້ອງການທາງດ້ານຈິດໃຈຂອງຄົນ. ສະນັ້ນ ຈຶ່ງຕ້ອງມີກ້ອນທຶນໃນລະດັບອັນຈຳເປັນ ເພື່ອຮັບປະກັນໃຫ້ແກ່ການເຄື່ອນໄຫວອັນເປັນປົກກະຕິ ແລະ ມີຄຸນປະໂຫຍດຕໍ່ສັງຄົມ. ສ່ວນໃນດ້ານໜຶ່ງອີກ ສື່ມວນຊົນກໍຕ້ອງຮູ້ຊອກຫາຊ່ອງທາງ, ວິທີການ ເພື່ອຫັນໄປສູ່ອັນໃໝ່ ເພື່ອສ້າງລາຍຮັບສະໜອງຄວາມຕ້ອງການໃຊ້ຈ່າຍຂອງຕົນ, ສ່ວນໃດສ່ວນໜຶ່ງດ້ວຍການລະດົມການປະກອບສ່ວນຈາກມະຫາຊົນ ແລະ ພາກສ່ວນເສດຖະກິດຕ່າງໆ ເພື່ອຫລຸດຜ່ອນການແບກຫາບດ້ານງົບປະມານຂອງລັດຕໍ່ສື່ມວນຊົນ, ແຕ່ບໍ່ໃຫ້ສື່ມວນຊົນເຮັດໜ້າທີ່ໜັກໄປທາງທຸລະກິດ ອັນຈະເຮັດໃຫ້ບົດບາດສຶກສາອົບຮົມ, ຈັດຕັ້ງປຸກລະດົມຈືດຈາງໄປ, ເຄື່ອນໄຫວບໍ່ຖືກຕາມຈຸດປະສົງ ແລະ ເປົ້າໝາຍຮັບໃຊ້ໜ້າທີ່ການເມືອງຂອງຕົນ.
