ລາວຕີລາຄາຄືນຄວາມຄືບໜ້າ ຂອງການຫັນເປັນທັນສະໄໝໃນການຊຳລະ ສະສາງ

ໃນວັນທີ 3 ສິງຫານີ້, ໄດ້ມີກອງປະຊຸມເພື່ອຕິດຕາມຄວາມຄືບໜ້າການຈັດຕັ້ງປະຕິບັດວຽກງານຂອງ ຄະນະສະເພາະກິດ ການຫັນເປັນທັນສະໄໝ ໃນການຊຳລະສະສາງ ແລະ ການເກັບລາຍຮັບເຂົ້າງົບປະມານ ຜ່ານລະບົບໂທລະສັບມືຖື ໂດຍການເປັນປະທານຂອງທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະມົນຕີ ກະຊວງການເງິນ.

ການຊຳລະສະສາງແບບດີຈີຕອນ ເປັນປັດໄຈໜຶ່ງທີ່ສຳຄັນໃນການສົ່ງເສີມ ແລະ ອຳນວຍຄວາມສະດວກໃຫ້ແກ່ປະຊາຊົນໃນສະພາບການລະບາດຂອງພະຍາດໂຄວິດ-19 ແລະ ການນໍາໃຊ້ຊີວິດໃນຍຸກ New Normal ນີ້. ນອກຈາກນັ້ນ, ຍັງຈະເປັນເຄື່ອງມືໜຶ່ງທີ່ສາມາດຊ່ວຍໃຫ້ລັດຖະບານເກັບລາຍຮັບເຂົ້າງົບປະມານໄດ້ຢ່າງມີປະສິດຕິພາບອີກດ້ວຍ.

​ໃນ​ກອງ​ປະຊຸມຍັງໄດ້ຮັບຟັງລາຍງານຄວາມພ້ອມທາງດ້ານເຕັກນິກ ເພື່ອເຊື່ອມຕໍ່ພື້ນຖານໂຄງລ່າງຂອງທະນາຄານ, ກະຊວງການເງິນ ແລະ ກະຊວງໄປສະນີ ໂທລະຄົມມະນາຄົມ ແລະ ການສື່ສານ ເພື່ອຫັນການຊຳລະສະສາງໃຫ້ເປັນທັນສະໄໝ ​ເພື່ອ​ຜູ້​ເຂົ້າຮ່ວມໄດ້ແລກປ່ຽນຄຳຄິດຄຳເຫັນ ແນໃສ່ໃຫ້ສາມາດຈັດຕັ້ງປະຕິບັດວຽກງານດັ່ງກ່າວມີປະສິດຕິພາບ ແລະ ປະສິດຕິຜົນສູງສຸດ.