ຢູນີເທວ ເປີດຊຸດອົບຮົມສອນຫຼັກສູດໃນຫົວຂໍ້: ຄວາມປອດໄພທາງດ້ານລະບົບ ໄອທີ“Cyber Security” ໄລຍະສັ້ນ
ໃນວັນທີ 27 ກໍລະກົດ 2020 ຢູນີເທວ ໄດ້ເປີດຊຸດອົບຮົມສອນຫຼັກສູດ Cyber Securityໄລຍະສັ້ນ,ເຊິ່ງມີນັກສໍາມະນາກອນຈາກ 18 ກະຊວງ ແລະ 4 ອົງການທຽບເທົ່າ, ເຂົ້າຮ່ວມທັງໝົດ: 50 ຄົນໄລຍະເວລາ 5 ວັນ, ເລີ່ມແຕ່ ວັນທີ 27 ກໍລະກົດ 2020 -31 ກໍລະກົດ 2020.ເປັນກຽດເຂົ້າຮ່ວມພິທີເປີດງານສຳມະນາ-ຝຶກອົບຮົມໄລຍະສັ້ນ ຄັ້ງນີ້ ມີ:
ທ່ານສຸລິຍາ ແສງດາລາວົງ ຮອງກົມເຕັກໂນໂລຊີ ດີຈີຕອນ ກະຊວງ ວິທະຍາສາດ ເຕັກໂນໂລຊີ
ທ່ານ ປອ. ສົມພອນ ກັນທະວົງ ຫົວໜ້າພາກວິຊາວິສະວະກຳຄອມພິວເຕີ ແລະ ເຕັກໂນໂລຊີຂໍ້ມູນຂ່າວສານ, ຄະນະວິສະວະກຳສາດ, ມະຫາວິທະຍາໄລແຫ່ງຊາດລາວ.
ທ່ານ ບຸນມີ ມາລາວົງ ຄະນະອຳນວຍການໃຫຍ່ ບໍລິສັດ ສະຕາໂທລະຄົມ ຜູ້ຊີ້ນຳວຽກງານສູນລູກຄ້າລະດັບ ບໍລິສັດ
ການຈັດງານສຳມະນາ-ຝຶກອົບຮົມໄລຍະສັ້ນ ຄັ້ງນີ້, (Unitel)ຮ່ວມກັບກົມເຕັກໂນໂລຊີດີຈິຕອນ ກະຊວງວິທະຍາສາດ ແລະ ເຕັກໂນໂລຊີ, ໃນຫົວຂໍ້: ຄວາມປອດໄພທາງດ້ານລະບົບ ໄອທີ “Cyber Security”
ສອນໂດຍ ອາຈານ-ຊ່ຽວຊານ ຮັບເຊີນຈາກ ພາກວິຊາວິສະວະກຳຄອມພິວເຕີແລະເຕັກໂນໂລຊີຂໍ້ມູນຂ່າວສານ,ຄະນະວິສະວະກຳສາດ,ມະຫາວິທະຍາໄລແຫ່ງຊາດລາວ.
ຈຸດປະສົງເພື່ອແນ່ໃສຍົກລະດັບຄວາມຮູ້ທາງດ້ານວຽກງານ ICTໃຫ້ພະນັກງານໃນຂົງເຂດບໍລິຫານຢ່າງທົ່ວເຖິງເວົ້າລວມ, ເວົ້າສະເພາະແມ່ນພະນັກງານທີ່ເຮັດວຽກຕິດພັນກັບວຽກງານໄອທີ ໃນຍຸກປະຕິວັດ ອຸດສາຫະກໍາ 4.0, ເຊິ່ງເປັນຍຸກຂອງເຕັກໂນໂລຊີຂໍ້ມູນຂ່າວສານ, ໃນການນໍາໃຊ້ເຕັກໂນໂລຊີຂໍ້ມູນຂ່າວສານເຂົ້າໃນທຸກຂົງເຂດວຽກງານ ກໍ່ຄືການດໍາລົງຊີວິດປະຈໍາວັນຂອງຄົນເຮົາແມ່ນມີຄວາມຈໍາເປັນທີ່ສຸດ.
ຮູບແບບການຝຶກອົບຮົມ ແມ່ນການນໍາສະເໜີເປັນພາກທິດສະດີ ແລະ ພາກປະຕິບັດຕົວຈິງ ພາຍຫຼັງສໍາເລັດຫຼັກສູດຝຶກອົບຮົມ ຈະໄດ້ມີການຕີລາຄາຄວາມຮັບຮູ້ ຂອງນັກສໍາມະນາກອນເຂົ້າຮ່ວມທັງໝົດ ພ້ອມມອບໃບຢັ້ງຢືນ ຈາກພາກວິຊາ ວິສະວະກຳຄອມພິວເຕີ ແລະ ເຕັກໂນໂລຊີຂໍ້ມູນຂ່າວສານ, ຄະນະວິສະວະກຳສາດ, ມະຫາວິທະຍາໄລແຫ່ງຊາດລາວ.
ການຈັດງານສຳມະນາ-ຝຶກອົບຮົມໄລຍະສັ້ນ ຄັ້ງນີ້ແມ່ນເປັນຄັ້ງທີ II ແລະ ຢູນີເທວຈະສືບຕໍ່ ຮ່ວມມືກັບອົງການຈັດຕັ້ງທີ່ກ່ຽວຂ້ອງ ໃນການພັດທະນາດ້ານບຸກຄະລາກອນເພື່ອຍົກລະດັບວຽກງານຄວາມຮູ້ຄວາມສາມາດ ແກ່ວິຊາການໄອທີ ໃນຍຸກ 4.0, ໃຫ້ມີຄວາມຊໍານານງານ ແລະ ເຫັນໄດ້ຄວາມສໍາຄັນຕໍ່ກັບການນໍາໃຊ້ລະບົບເທັກໂນໂລຊີຂໍ້ມູນຂ່າວສານທີ່ທັນໄໝໃຫ້ທຽບເທົ່າກັບສາກົນ.
