ຫວຽດນາມ ແລະ ກຳປູເຈຍ ມອບ-ຮັບແຜ່ນທີ່ເສັ້ນຊາຍແດນນຳກັນ

ສຳນັກຂ່າວສານຫວຽດນາມໃຫ້ຮູ້ໃນວັນທີ 2 ສິງຫານີ້ວ່າ: ວັນທີ 1 ສິງຫາ ຫວຽດນາມ ແລະ ກຳປູເຈຍ ໄດ້ມອບ-ຮັບແຜ່ນທີ່ເສັ້ນຊາຍແດນນຳກັນ. ຕາງໜ້າຝ່າຍຫວຽດນາມແມ່ນທ່ານ ເລຮວາຍຈຸງ, ຮອງລັດຖະມົນຕີການຕ່າງປະເທດ, ປະທານຄະນະກຳມະການປະສານງານປັກຫຼັກໝາຍຊາຍແດນຫວຽດນາມ-ກຳປູເຈຍ ເປັນຫົວໜ້າຄະນະ, ຕາງໜ້າຝ່າຍກຳປູເຈຍແມ່ນທ່ານ ວາກີມຮົງ, ລັດຖະມົນຕີລະດັບສູງຮັບຜິດຊອບວຽກງານຊາຍແດນ, ປະທານຄະນະກຳມະການປັກຫຼັກໝາຍຊາຍແດນກຳປູເຈຍ-ຫວຽດນາມ ເປັນຫົວໜ້າຄະນະ ໄດ້ພົບປະຫາລື ແລກປ່ຽນບົດຮຽນນຳກັນ ແລະ ໄດ້ມອບ-ຮັບແຜ່ນທີ່ແບ່ງເສັ້ນຊາຍແດນອັດຕາສ່ວນ 1/25.000 ລະຫວ່າງ ສສ ຫວຽດນາມ ແລະ ລາຊະອານາຈັກກຳປູເຈຍຢູ່ທີ່ດ່ານສາກົນ ມົກບາຍ ແຂວງ ໄຕນິງຂອງຫວຽດນາມ ທີ່ເຕັມໄປດ້ວຍດ້ວຍບັນຍາກາດມິດຕະພາບ, ເຕັມໄປດ້ວຍຄວາມເຂົ້າອົກເຂົ້າໃຈຊຶ່ງກັນ ແລະ ກັນ.

ທັງສອງຝ່າຍໄດ້ກວດກາຄືນ ແລະ ເປັນເອກກະພາບກັນກ່ຽວກັບ ແຜ່ນທີ່ເສັ້ນຊາຍແດນ 500 ສະບັບ, ໃນນັ້ນ 250 ສະບັບເປັນພາສາຫວຽດນາມ-ຂະແມ ແລະ ອີກ 250 ສະບັບເປັນພາສາ ຂະແມ-ຫວຽດນາມ ຊຶ່ງມີບັນດາລາຍເຊັນຂອງຂັ້ນຕ່າງໆທີ່ມີອຳນາດຂອງທັງສອງປະເທດ ແລະ ໄດ້ຮັບການຫຍິບເປັນຫົວຢ່າງແໜ້ນໜາ ຖາວອນ ທີ່ຖືກຕ້ອງກັບວິທີການທາງດ້ານເຕັກນິກຈາກຫວຽດນາມ.

ຂ່າວ: ລູກເມືອງພວນ