ສະຫລຸບບັນຫາໜ້າສົນໃຈທົ່ວໂລກປະຈຳວັນທີ 3 ສິງຫາ 2020
- ອາຟຣິກາໃຕ້ ປະເທດທີ່ມີການແຜ່ລະບາດຂອງ COVID-19 ຮຸນແຮງທີ່ສຸດອັນດັບ 5 ຂອງໂລກ ຫລ້າສຸດມີຈຳນວນຜູ້ຕິດເຊື້ອເຖິງ 500.000 ຄົນຮຽບຮ້ອຍແລ້ວ ໂດຍຜູ້ຕິດເຊື້ອທັງໝົດພາຍໃນປະເທດຄິດເປັນກວ່າ 50% ຂອງຜູ້ຕິດເຊື້ອທັງໝົດໃນທະວີບອາຟຣິກາ.
ຂະນະດຽວກັນ ອິນເດຍໄດ້ລາຍງານຜູ້ຕິດເຊື້ອໃໝ່ 50.000 ກວ່າຄົນພາຍໃນ 5 ວັນຜ່ານມາ ເຮັດໃຫ້ຈຳນວນຜູ້ຕິດເຊື້ອພາຍໃນປະເທດເພີ່ມຂຶ້ນສູ່ລະດັບ 1,75 ລ້ານຄົນ, ສ່ວນຢູ່ຟີລິບປິນ ຫລ້າສຸດມີຜູ້ຕິດເຊື້ອເຖິງ 100.000 ຄົນແລ້ວເຊັ່ນກັນ.
- ການເພີ່ມຂຶ້ນຂອງຜູ້ຕິດເຊື້ອ COVID-19 ເຮັດໃຫ້ລັດ Victoria ຂອງປະເທດອົດສະຕຣາລີຕ້ອງປັບໃຊ້ມາດຕະການ Lockdowns ສະບັບໃໝ່ ເຊິ່ງມີຄວາມເຂັ້ມງວດເພີ່ມຂຶ້ນ ເຖິງວ່າປະເທດຈະປະສົບຜົນສຳເລັດໃນການຄວບຄຸມການແຜ່ລະບາດໃນຊ່ວງກ່ອນໜ້ານີ້.
Victoria ຖືເປັນລັດທີ່ມີປະຊາກອນໜາແໜ້ນທີ່ສຸດອັນດັບ 2 ຂອງປະເທດ ແລະ ໄດ້ມີລາຍງານຜູ້ຕິດເຊື້ອໃໝ່ເພີ່ມຂຶ້ນຢ່າງວ່ອງໄວໃນອາທິດຜ່ານມາ ໂດຍມີ 671 ກວ່າຄົນທີ່ຕິດເຊື້ອໃນວັນທີ 2 ສິງຫາ. ຂະນະທີ່ມາດຕະການ Lockdowns ຖືກຂະຫຍາຍເວລາໄປຈົນເຖິງວັນທີ 13 ກັນຍາ 2020.
- Siemens Healthineers ບໍລິສັດດ້ານສຸຂະພາບສັນຊາດເຢຍລະມັນ ກ່າວວ່າ: ພວກເຂົາຈະເຂົ້າຊື້ກິດຈະການຂອງ Varian ດ້ວຍມູນຄ່າ 16.400 ລ້ານໂດລາ.
Varian ຄືບໍລິສັດທີ່ໃຊ້ AI ແລະ Machine-learning ລວມທັງ Data Analysis ເພື່ອພັດທະນາການປິ່ນປົວມະເຮັງຮູບແບບໃໝ່. ຂະນະທີ່ຂໍ້ຕົກລົງດັ່ງກ່າວຈະໄດ້ຮັບການສະໜັບສະໜູນທາງການເງິນຜ່ານທາງກາສານໜີ້ ແລະ ຫຸ້ນທີ່ອອກໃໝ່ໂດຍ Siemens Healthineers ແລະ ຄາດວ່າການຊື້ຂາຍກິດຈະການດັ່ງກ່າວຈະສິ້ນສຸດລົງພາຍໃນປີໜ້ານີ້.
- ຮູບຖ່າຍດາວທຽມຈາກອົງການອະວະກາດແຫ່ງຊາດຂອງເບຣຊິນ (Brazil’s National Space Agency) ໄດ້ເປີດເຜີຍວ່າມີໄຟໄໝ້ເພີ່ມຂຶ້ນເຖິງ 28% ໃນປີນີ້ ເມື່ອທຽບໃສ່ໄລຍະເວລາດຽວກັນຂອງປີກ່ອນ ສຳລັບເນື້ອທີ່ປ່າ Amazon ເມື່ອເດືອນກໍລະກົດຜ່ານມາ ເຖິງວ່າຈະມີການສັ່ງຫ້າມເຂົ້າພື້ນທີ່ປ່ານັບແຕ່ຕົ້ນເດືອນນັ້ນ.
ນັກວິທະຍາສາດກຳລັງກັງວົນກ່ຽວກັບການເກີດໄຟໄໝ້ປ່າຂະໜາດໃຫຍ່ຂຶ້ນແບບຊ້ຳໆ ເຊິ່ງໃນປີ 2019 ຜ່ານມາ ໄດ້ທຳລາຍຊັບພະຍາກອນໃນພາກພື້ນໄປຢ່າງຫລວງຫລາຍ ໂດຍສະເພາະເມື່ອ Jair Bolsonaro ປະທານາທິບໍດີຂອງປະເທດພວກເຂົາກໍມີທັດສະນະຄະຕິທີ່ເປັນລົບຕໍ່ປ່າຝົນ (Rainforest) ເຊັ່ນກັນ.
- ສະຫະລັດ ອາຣັບ ເອມິເຣດ (The United Arab Emirated, UAE) ໄດ້ປະສົບຜົນສຳເລັດໃນການສ້າງ ແລະ ດຳເນີນງານກ່ຽວກັບສະຖານີພະລັງງານນິວເຄຼຍຊື່ວ່າ Barakah ເປັນປະເທດທຳອິດຂອງປະເທດໃນເຂດອາຣັບ ໂດຍໂຮງງານດັ່ງກ່າວຖືກຄາດຫວັງໄວ້ວ່າຈະສາມາດຜະລິດພະລັງງານໄດ້ເຖິງ 25% ຂອງຄວາມຕ້ອງການທັງໝົດໃນປະເທດ.
ໂຄງການດັ່ງກ່າວສ້າງຄວາມບໍ່ພໍໃຈໃຫ້ແກ່ປະເທດກາຕາ ເຊິ່ງເປັນປະເທດໃກ້ຄຽງ ໂດຍພວກເຂົາປະກາດວ່າໂຄງການນີ້ “ເປັນໄພຄຸກຄາມຢ່າງຈະແຈ້ງ” ຕໍ່ຄວາມສະຫງົບໃນພາກພື້ນເມື່ອປີ 2019. ຂະນະທີ່ອີຣານຕ້ອງທຸກທໍລະມານພາຍໃຕ້ການຂວ້ຳບາດຂອງອາເມລິກາທີ່ຂັດຂວາງບໍ່ໃຫ້ພວກເຂົາພັດທະນາໂຄງການນິວເຄຼຍຂອງຕົນເອງ.
- Amit Shah ລັດຖະມົນຕີວ່າການກະຊວງພາຍໃນຂອງອິນເດຍໄດ້ມີຜົນການທົດສອບ COVID-19 ເປັນບວກ ແລະ ເຂົ້າຮັບການປິ່ນປົວຢູ່ໂຮງໝໍແລ້ວໃນຕອນຄໍ່າທີ່ຜ່ານມາ ໂດຍທ່ານເປັນພັນທະມິດເສນາທິການຄົນໜຶ່ງທີ່ຢູ່ໃກ້ຊິດກັບ Narendra Modi ນາຍົກລັດຖະມົນຕີຂອງປະເທດ.
Amit Shah ໄດ້ເຂົ້າຮ່ວມກອງປະຊຸມຄະນະລັດຖະບານຂອງປະເທດໃນວັນທີ 29 ກໍລະກົດຜ່ານມາ ເຊິ່ງເປັນການເພີ່ມຄວາມກັງວົນກ່ຽວກັບການລະບາດຂອງໄວຣັສໃນເຈົ້າໜ້າທີ່ລະດັບສູງຂອງອິນເດຍ.
ການຕິດເຊື້ອຂອງທ່ານເກີດຂຶ້ນພຽງບໍ່ເທົ່າວັນກ່ອນທີ່ Shah ຈະມີກຳນົດເຂົ້າຮ່ວມພິທີສ້າງຕັ້ງວັດຂອງສາສະໜາຮິນດູຢູ່ເມືອງ Ayodhya.
- ໄລຍະເວລາແຫ່ງການຈັດພິທີຮັດ (The Haj) ຢູ່ເມືອງມັກກະ ປະເທດຊາອຸດິອາຣະບີ ເຊິ່ງຖືເປັນການສະແຫວງບຸນທີ່ສັກສິດທີ່ສຸດຂອງຊາວມຸດສະລິມກຳລັງໃກ້ເຂົ້າມາແລ້ວ. ຂະນະທີ່ລັດຖະບານຊາອຸດິອາຣະບີ ອະນຸຍາດໃຫ້ຜູ້ມີຈິດສັດທາພຽງ 10.000 ຄົນເທົ່ານັ້ນທີ່ສາມາດເຂົ້າຮ່ວມພິທີດັ່ງກ່າວໄດ້ພາຍໃນປີນີ້ ເມື່ອທຽບໃສ່ປີກ່ອນທີ່ມີຜູ້ເດີນທາງມາຮ່ວມພິທີເຖິງ 2,5 ລ້ານຄົນ.
