ການຍາດຊີງຊັບຈະຖືກລົງໂທດຕັດອິດສະລະພາບ 6 ເດືອນ ຫາ 5 ປີ ແລະ ຈະຖືກປັບໄໝ 3-10 ລ້ານກີບ
ໃນໄລຍະນີ້ ຢູ່ນະຄອນຫລວງວຽງຈັນມັກຈະເກີດມີປະກົດການຫຍໍ້ທໍ້ເກີດຂຶ້ນຫລາຍເຊັ່ນ: ການດຶງກະເປົາຊີງຊັບ, ລັກເລັກຂະໂມຍນ້ອຍ.
ເຊິ່ງໃນອາທິດຜ່ານມານີ້ມີສື່ສັງຄົມອອນລາຍໄດ້ເຜີຍແຜ່ຄລິບວີດີໂອຄົນດຶງກະເປົາຢູ່ຕະຫລາດຂົວດິນ ແລະ ເຂດບ້ານ ວັດຈັນ ເມືອງຈັນທະບູລີ ຕັ້ງ 2-3 ຄັ້ງ ແລະ ຫລາຍເສັ້ນທາງອື່ນໆກໍເກີດມີບັນຫາດັ່ງກ່າວ ເປັນໄລຍະຖີ່ຂຶ້ນເລື້ອຍໆ.ແຕ່ມາຮອດປັດຈຸບັນເຈົ້າຫນ້າທີ່ກໍບໍ່ສາມາດຈັບຕົວຜູ້ຕ້ອງຫາມາດຳເນີນຄະດີໄດ້.
ຊຶ່ງຕາມກົດໝາຍອາຍາ ມາດຕາ 232 ວ່າດ້ວຍການຍາດຊີງຊັບ ໄດ້ລະບຸວ່າ: ບຸກຄົນໃດຫາກໄດ້ເອົາຊັບຂອງຜູ້ອື່ນມາເປັນຂອງຕົນເອງດ້ວຍວິທີຍາດຊີງ ຈະຖືກລົງໂທດຕັດອິດສະລະພາບ ແຕ່ 6 ເດືອນ ຫາ 5 ປີ ແລະ ຈະຖືກປັບໄໝແຕ່ 3 ລ້ານ-10 ລ້ານກີບ.
ໃນກໍລະນີຜູ້ກະທຳຜິດ ຫາກໄດ້ເອົາການຍາດຊີງຊັບເປັນອາຈິນ, ມີການຈັດຕັ້ງເປັນກຸ່ມ ຫລື ເຮັດໃຫ້ຜູ້ອື່ນບາດເຈັບສາຫັດ ຫລື ເສຍຊີວິດ, ໃນກໍລະນີກໍ່ຄວາມເສຍຫາຍຫລວງຫລາຍຈະຖືກລົງໂທດຕັດອິດສະລະພາບແຕ່ 3-8 ປີ ແລະ ຈະຖືກປັບໃໝ່ແຕ່ 10 -30 ລ້ານກີບ.
ດັ່ງນັ້ນ, ຂໍຮຽກຮ້ອງມາຍັງພໍ່ແມ່ປະຊາຊົນ ແລະ ຜູ້ເດີນທາງສັນຈອນໄປ-ມາຕາມຖະໜົນຈົ່ງໄດ້ມີສະຕິລະວັງຕົວ ແລະ ເປັນເຈົ້າການປົກປັກຮັກສາວັດຖຸສິ່ງຂອງອັນມີຄ່າຂອງຕົນໄວ້ໃຫ້ດີ, ພ້ອມກັນນັ້ນກໍຮຽກຮ້ອງມາຍັງເຈົ້າໜ້າທີ່ແລະ ອຳນາດການປົກຄອງທຸກຂັ້ນ, ຈົ່ງໄດ້ເພີ່ມທະວີໃນການຕິດຕາມ, ກວດກາ ແລະ ມີວິທີສະກັດກັ້ນ, ຕ້ານກັບບັນດາປາກົດການດັ່ງກ່າວໃຫ້ມີປະສິດທິຜົນ ເພື່ອຄວາມສະຫງົບສຸກຂອງສັງຄົມ, ປະຊາຊົນໄດ້ດຳລົງຊີວິດຢູ່ດ້ວຍຄວາມປອດໄພດີ.
