ການນຳພັກ-ລັດ ແລະ ມວນຊົນເມືອງທ່າແຕງຕ້ອນຮັບຂະບວນແຫ່ພຣະເຈົ້າໄຊຍະເຊດຖາທິຣາດ

ການນໍາພັກ-ລັດເມືອງທ່າແຕງ ແຂວງເຊກອງນໍາໂດຍ ທ່ານ ສົມເພັດ ເອີດລັດດາ ເຈົ້າເມືອງທ່າແຕງໄດ້ອອກຕ້ອນຮັບຂະບວນແຮ່ຮູບຫຼໍ່ພະເຈົ້າໄຊເສດຖາທິຣາດທີ່ໄດ້ເຂື່ອນຍ້າຍອອກຈາກນະຄອນປາກເຊໃນຕອນເຊົ້າວັນທີ 31 ກໍລະກົດ 2020 ນີ້, ທີ່ເທດສະບານເມືອງ ທ່າແຕງ ແຂວງ ເຊກອງ ມີພະສົງສາມະເນນ ພ້ອມດ້ວຍ ມວນຊົນເຂົ້າຮ່ວມຢ່າງຫຼວງຫຼາຍ.

ທ່ານ ລົດແກ້ວ ເພັງພູນສະຫວັດ ຮອງເລຂາພັກເມືອງ ທ່າແຕງ ປະທານແນວລາວສ້າງຊາດເມືອງທ່າແຕງກ່າວວ່າ: ພິທີຕ້ອນຮັບຂະບວນການແຫ່ພຣະເຈົ້າໄຊຍະເຊດຖາທິຣາດ ພ້ອມໂຕຊ້າງເປືອກມຸງຄຸນໃນຄັ້ງນີ້ ເພື່ອອຸທິດບຸນກຸສົນ ແລະ ສະແດງເຖິງຄວາມກະຕັນຍູຮູ້ບຸນຄຸນຕໍ່ບັນພະບຸລຸດ ໂດຍສະເພາະ ພຣະເຈົ້າໄຊຍະເຊດຖາທິຣາດ ມະຫາຣາດ ວິລະກະສັດຜູ້ອົງອາດກ້າແກ່ນ,​ ພະອົງເປັນກະສັດອົງໜຶ່ງທີ່ມີຄຸນງາມຄວາມດີ ຕໍ່ປະເທດຊາດບ້ານເມືອງ, ເປັນຜູ້ນຳພາສ້າງບ້ານແປງເມືອງເປັນຕົ້ນແມ່ນການສະຖາປະນານະຄອນຫລວງວຽງຈັນ ເປັນນະຄອນຫຼວງຂອງປະເທດ,ສ້າງພະທາດຫຼວງວຽງຈັນ,ພະພຸດທະຮູບ, ວັດວາອາຣາມ ແລະ ສະຖານບູຮານຕ່າງໆທີ່ເປັນພື້ນຖານທາງດ້ານວັດທະນະທຳຂອງປະເທດຊາດ ແລະ ພຸດທະສາສະໜາ ໄດ້ສືບທອດມາເຖິງທຸກວັນນີ້,ເຊິ່ງຈະເຮັດໃຫ້ທຸກຊັ້ນຄົນ-ຮຸ່ນໜຸ່ມ ຈະໄດ້ສຶກສາຮຽນຮູ້,ປົກປັກຮັກສາ ແລະ ເສີມຂະຫຍາຍຕໍ່ໄປ.

ເຊິ່ງຂະບວນການແຫ່ດັ່ງກ່າວ ພາຍຫລັງສໍາເລັດພິທີທໍາສາດສະໜາຢູ່ເມືອງ ທ່າແຕງແລ້ວ ແມ່ນໄດ້ເຄື່ອນຍ້າຍໄປພັກຊົ່ວຄາວຢູ່ແຂວງ ເຊກອງ ແລະ ຈະສືບຕໍ່ເຄື່ອນຍ້າຍໄປປະດິດສະຖານທີ່ແຂວງ ອັດຕະປື.