ຮອງນາຍົກລັດຖະມົນຕີ ຮ່ວມຖອດຖອນບົດຮຽນກ່ຽວກັບ ຜົນການສືບສວນ-ສອບສວນ ສາເຫດເຂື່ອນເຊປຽນ-ເຊນ້ຳນ້ອຍເເຕກ

ກອງປະຊຸມຖອດຖອນບົດຮຽນ ກ່ຽວກັບຜົນການກວດກາ, ການສືບສວນ-ສອບສວນສາ ເຫດເຂື່ອນໄຟຟ້າເຊປຽນ-ເຊນ້ຳນ້ອນເເຕກ ຈັດຂຶ້ນໃນວັນທີ 27 ກໍລະກົດ 2020 ທີ່ຫ້ອງວ່າການປົກ ຄອງແຂວງອັດຕະປື ໂດຍການເປັນປະທານຂອງ ທ່ານ ບຸນທອງ ຈິດມະນີ ກຳມະການກົມການເມືອງສູນກາງພັກ, ເລຂາທິການສູນກາງພັກ, ຮອງນາຍົກລັດຖະມົນຕີ, ປະທານຄະນະກວດກາສູນກາງພັກ, ປະທານອົງການກວດກາລັດຖະບານ ແລະ ຫົວໜ້າອົງການຕ້ານການສໍ້ລາດບັງຫລວງຂັ້ນສູນກາງ, ມີບັນດາລັດຖະມົນຕີ, ຮອງລັດຖະມົນຕີ, ເຈົ້າແຂວງ, ຮອງເຈົ້າແຂວງ,​ ຮອງປະທານອົງການກວດກາລັດຖະບານ ​ແລະ ພະນັກງານທີ່ກ່ຽວຂ້ອງ ເຂົ້າຮ່ວມ.

ທ່ານ ສີໃນ ມຽງລາວັນ ຮອງປະທານຄະນະກວດກາສູນກາງພັກ ແລະ ອົງການກວດກາລັດ ຖະບານ ໄດ້ລາຍງານກ່ຽວກັບຜົນການກວດກາຄວາມຮັບຜິດຊອບຂອງ ເຈົ້າໜ້າທີ່ລັດທີ່ກ່ຽວຂ້ອງກັບການອານຸມັດກໍ່ສ້າງ ແລະ ເຕືອນໄພລ່ວງໜ້າກ່ອນຄູກັນນໍ້າເຂື່ອນໄຟຟ້າເຊປຽນ-ເຊນໍ້ານ້ອຍແຕກ ໂດຍໄດ້ຍົກໃຫ້ເຫັນເຖິງຈຸດບົກຜ່ອງໃນການປະສານງານ ລະຫວ່າງ ພາກສ່ວນຕ່າງໆ ກ່ອນເຫດການຄູກັນນໍ້າແຕກພັງ ນັບທັງບໍລິສັດຜູ້ຮັບເໝົາ, ອໍານາດການປົກຄອງທ້ອງຖິ່ນ ແລະ ສູນກາງ ​ເຊິ່ງຕ້ອງໄດ້ມີການປັບປຸງຄືນໃໝ່ ແລະ ຕິດຕັ້ງລະບົບແຈ້ງເຕືອນໄພທີ່ທັນສະໄໝອີກ.

ຈາກນັ້ນ, ທ່ານ ສິງເພັດ ບຸນສະຫວັດທິພັນ ໄດ້ລາຍງານຜົນການສືບສວນ-ສອບສວນສາເຫດທີ່ພາໃຫ້ຄູກັນນໍ້າເຂື່ອນໄຟຟ້າເຊປຽນເຊນໍ້ານ້ອຍແຕກ, ເຊິ່ງໄດ້ຍົກໃຫ້ເຫັນເຖິງຂະບວນການ, ຂັ້ນຕອນ, ການທົດລອງຂອງການກວດກາ, ​ສືບສວນ-ສອບສວນສາເຫດຂອງການແຕກພັງ ໂດຍໄດ້ເຊີນເອົາຊ່ຽວຊານຈາກອົງການຈັດຕັ້ງສາກົນ, ບັນດາປະເທດອ້ອມຂ້າງ ແລະ ຜູ້ສັງເກດການຈາກປະເທດຕ່າງໆ ເພື່ອມາຊ່ວຍໃນການກວດກາ, ສືບສວນ-ສອບສວນຫາສາເຫດການແຕກພັງຄັ້ງນີ້ ຈົນສາມາດຮູ້ສາເຫດທີ່ແທ້ຈິງ ແລະ ປະກາດໃຫ້ປະຊາຊົນລາວ ກໍຄື ຊາວໂລກຮັບຮູ້ໃນກາງປີ 2019 ທີ່ຜ່ານມາ.

ໂອກາດນີ້, ທ່ານຮອງນາຍົກລັດຖະມົນຕີ ກໍໄດ້ເນັ້ນໜັກໃຫ້ເພີ່ມທະວີວຽກງານສຶກສາອົບຮົມການເມືອງ-ແນວຄິດໃຫ້ເລິກເຊິ່ງ, ຄະນະພັກ, ອົງການປົກຄອງ, ກະຊວງ ແລະ ທ້ອງຖິ່ນຕ້ອງຖືເອົາວຽກງານນີ້ເປັນກົກ ເພື່ອສຶກສາອົບຮົມພະນັກງານ, ສະມາຊິກພັກ ແລະ ລັດຖະກອນເປັນປະຈຳ; ກະ ຊວງທີ່ກ່ຽວຂ້ອງຕ້ອງເພີ່ມທະວີການປະຕິບັດພາລະບົດບາດ ຄຸ້ມຄອງມະຫາພາກໃຫ້ເຂັ້ມແຂງກວ່າເກົ່າ, ເປັນຕົ້ນ ການປັບປຸງ ແລະ ສ້າງນິຕິກໍາຕ່າງໆໃຫ້ຄົບຊຸດ, ຮັດກຸມຕື່ມໂດຍສະເພາະ ນິຕິກໍາດ້ານການຄຸ້ມຄອງພະລັງງານ ແລະ ສິ່ງແວດລ້ອມທີ່ລະອຽດ ພ້ອມທັງນໍາພາ-ຊີ້ນໍາປະຕິບັດໃຫ້ຖືກຕ້ອງ-ເຂັ້ມງວດ; ກະຊວງພະລັງງານ ແລະ ບໍ່ແຮ່ເພີ່ມທະວີການຕິດຕາມ, ກວດກາຄືນບັນດາໂຄງການໄຟຟ້າທີ່ກຳລັງກໍ່ສ້າງ ແລະ ກໍ່ສ້າງສຳເລັດແລ້ວໃນຂອບເຂດທົ່ວປະເທດວ່າ ກໍ່ສ້າງໄດ້ມາດຕະຖານ, ຕາມການອອກແບບທີ່ກົມວິຊາການຮັບຮອງ ແລະ ຕາມສັນຍາສໍາປະທານ ຫລືບໍ່ ເພື່ອຮັບປະກັນຄວາມປອດໄພຂອງໂຄງການ ແລະ ບໍ່ສ້າງຜົນກະທົບຕໍ່ສິ່ງແວດລ້ອມ ຖ້າກໍລະນີພົບເຫັນບັນຫາທີ່ບໍ່ຖືກຕ້ອງສອດຄ່ອງຕ້ອງສົມທົບກັບບໍລິສັດທີ່ກ່ຽວຂ້ອງ ເພື່ອແກ້ໄຂໃຫ້ທັນເວລາ; ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ ຕ້ອງເພີ່ມທະວີການຕິດຕາມ, ກວດກາຄືນແຜນການຄຸ້ມຄອງ ແລະ ຕິດຕາມກວດກາດ້ານສິ່ງແວດລ້ອມສັງຄົມ ແລະ ທຳມະຊາດ ທີ່ກະຊວງຮັບຮອງໄປແລ້ວນັ້ນ ລວມທັງບັນດາໂຄງການທີ່ກໍາລັງກໍ່ສ້າງ ແລະ ກໍ່ສ້າງສໍາເລັດແລ້ວໃນຂອບເຂດທົ່ວປະເທດ ເພື່ອເບິ່ງວ່າສອດຄ່ອງກັບສະພາບຄວາມເປັນຈິງແລ້ວບໍ່ ຄວນມີການລົງກວດກາເກັບກໍາຂໍ້ມູນ ຢູ່ສະຖານທີ່ພາກສະໜາມຕົວຈິງ ຕໍ່ກັບບັນ ຫາທີ່ເຫັນວ່າບໍ່ທັນຈະແຈ້ງສອດຄ່ອງຊັດເຈນ ເພື່ອຮັບປະກັນຄວາມຖືກຕ້ອງຕາມຕົວຈິງ; ຕ້ອງມີແຜນຕອບໂຕ້ກໍລະນີສຸກເສີນໃນທຸກໂຄງການ ແລະ ຮັບປະກັນໃຫ້ມີລະບົບເຕືອນໄພທີ່ທັນສະໄໝ ມີປະສິດທິຜົນເພື່ອຮັບປະກັນເຮັດໃຫ້ປະຊາຊົນທີ່ຢູ່ເຂດລຸ່ມໂຄງການ ມີຄວາມປອດໄພໃນເມື່ອມີເຫດການສຸກເສີນ; ກະຊວງ ແລະ ອົງການປົກຄອງທ້ອງຖິ່ນທີ່ກ່ຽວຂ້ອງຕ້ອງເອົາໃຈໃສ່ ແລະ ມີຄວາມຮັບຜິດຊອບສູງໃນການອະນຸມັດ, ຮັບຮອງການກໍ່ສ້າງໂຄງການພັດທະນາໄຟຟ້າໃນຕໍ່ໜ້າ ຕ້ອງໃຫ້ເປັນໄປຕາມຂັ້ນຕອນຂອງລະບຽບກົດໝາຍຢ່າງເຂັ້ມງວດ ແລະ ເຕັກນິກ ໂດຍໃຊ້ໄລຍະເວລາທີ່ເໝາະສົມ, ຫລີກລ້ຽງການເຮັດແບບຟ້າວຟັ່ງ ຫລື ເອື່ອຍອີງໃສ່ແຕ່ການສະໜອງຂໍ້ມູນຈາກເຈົ້າຂອງໂຄງການ ແລະ ບໍລິສັດພຽງແຕ່ຝ່າຍດຽວ; ເພີ່ມທະວີວຽກງານຄຸ້ມຄອງບັນດາໂຄງການໄຟຟ້າ, ປຸກລະດົມທົ່ວສັງຄົມເຂົ້າຮ່ວມໃນການຄຸ້ມຄອງ ແລະ ປົກປັກຮັກສາດ້ວຍຄວາມເປັນເຈົ້າການ, ບ່ອນໃດທີ່ໄດ້ມີການອະນຸຍາດໃຫ້ພັດທະນາກໍ່ຕ້ອງມີການຄຸ້ມຄອງ, ຕິດຕາມ-ກວດກາໃຫ້ເປັນປົກກະຕິ ແລະ ຖືກຕ້ອງຕາມກົດໝາຍ, ຕ້ອງມີລະບຽບການ ແລະ ມາດຕະການລະອຽດຈະແຈ້ງເພື່ອຄຸ້ມຄອງໃຫ້ແທດເຖິງ ແລະ ເຂັ້ມງວດ; ຄະນະຮັບຜິດຊອບ ແລະ ກະຊວງທີ່ກ່ຽວຂ້ອງຕ້ອງເອົາໃຈໃສ່ປະສານສົມທົບກັບແຂວງອັດຕະປື ກໍຄື ເມືອງສະໜາມໄຊ ກວດກາຄືນການຈັດສັນທີ່ຢູ່ອາໄສ ແລະ ບ່ອນທໍາການຜະລິດຂອງປະຊາຊົນຜູ້ທີ່ຖືກຜົນກະທົບ ຈາກການແຕກພັງຂອງເຂື່ອນໃຫ້ໄວຂຶ້ນຕື່ມ ເຮັດໃຫ້ປະຊາຊົນມີຄວາມອຸ່ນອ່ຽນ ແລະ ໄດ້ ດໍາລົງຊີວິດທໍາມາຫາກິນເປັນປົກກະຕິໂດຍໄວ; ຄະນະພັກ, ອົງການປົກຄອງແຂວງອັດຕະປື ແລະ ເມືອງສະໜາມໄຊ ຕ້ອງເພີ່ມທະວີຄວາມຮັບຜິດຊອບໃນການຟື້ນຟູ ຊີວິດການເປັນຢູ່ຂອງປະຊາຊົນທີ່ຖືກຜົນກະທົບຈາກເຂື່ອນແຕກ ໃຫ້ກັບຄືນສູ່ສະພາບປົກກະຕິໄວເທົ່າໃດຍິ່ງເປັນການດີ, ໃນນີ້ໃຫ້ເອົາ ໃຈໃສ່ຕິດຕາມ, ກວດກາດ້ານຄວາມໂປ່ງໃສຂອງພາກສ່ວນຕ່າງໆ ໃນການຄຸ້ມຄອງທຶນຮອນ, ຊັບສິນ, ງົບປະມານຊົດເຊີຍ, ຊ່ວຍເຫລືອຜູ້ຖືກຜົນກະທົບບໍ່ໃຫ້ເກີດມີຊ່ອງຫວ່າງສວຍໂອກາດຕ່າງໆ.