ຈັບເປົ້າໝາຍຄ້າຂາຍຢາເສບຕິດພ້ອມຂອງກາງຈຳນວນໜຶ່ງ

ໃນວັນທີ 25 ກໍລະກົດຜ່ານມານີ້, ພະແນກຕໍາຫລວດເສດຖະກິດ ກອງບັນຊາການ ປກສ ແຂວງວຽງຈັນ ສົມທົບກັບ ກອງບັນຊາການ ປກສ ເມືອງວັງວຽງ    ສະກັດ ແລະ ກວດຄົ້ນລົດປາຣາໂດ້ ສີປອນທອງ ໝາຍເລກທະບຽນ ກສ 8342 ກໍາແພງນະຄອນ ທີ່ເປັນລົດເປົ້າໝາຍຄະດີຢາ ຢູ່ເສັ້ນທາງເລກທີ່ 13 ເໜືອ ເຂດບ້ານນາດາວ ເມືອງວັງວຽງ ແຂວງວຽງຈັນ.

ຜ່ານການກວດກາພາຍໃນລົດ ພົບຢາເສບຕິດ ປະເພດຢາໄອສ໌ ຈໍານວນ 72 ຖົງ ເທົ່າ 72 ກິໂລກຼາມ, ເຮໂຣອິນ ຈໍານວນ 2 ແທ່ງ ແລະ 1 ຖົງ, ໂທລະສັບ 6 ເຄື່ອງ, ພາສສະປອດ 2 ຫົວ, ເງິນ 2.399.000 ກີບ, ເງິນບາດ 18.250 ບາດ ພ້ອມທັງກັກຕົວຜູ້ຖືກຫາໄດ້ 3 ຄົນ ຊື່ ທ້າວ ເຊິນລູ ອາຍຸ 34 ປີ ຢູ່ບ້ານຜົ້ງສາລີ ເມືອງ-ແຂວງຜົ້ງສາລີ, ທ້າວ ເຊັງໄຮພົງ ແລະ ທ້າວ ກາງ ສຽວຮົ່ວ ເຊື້້ອຊາດ ສັນຊາດຈີນ.

ຄະດີດັ່ງກ່າວ, ພະແນກຕໍາຫລວດ ສະກັດກັ້ນ ແລະ ຕ້ານຢາເສບຕິດ ພວມດໍາເນີນການສືບສວນ-ສອບສວນຂະຫຍາຍຜົນຫາຜູ້ຮ່ວມຂະບວນການ ເພື່ອຕິດຕາມຕົວໄປດໍາເນີນຄະດີຕາມກົດໝາຍ.