ໄດ້ແລ້ວນາງສາວຈຳນວນ 20 ຄົນທີ່ຈະເຂົ້າຮ່ວມການປະກວດນາງສາວນະຄອນຫລວງວຽງຈັນປີ 2017
ປະທານໂຄງການຈັດການປະກວດດັ່ງກ່າວ ໃຫ້ຮູ້ວ່າ: ການຈັດງານຄັ້ງນີ້ ກໍເພື່ອນຳສະເໜີໂສມໜ້າຂອງນາງສາວລາວ ຈຳນວນ 20 ຄົນທີ່ຜ່ານເຂົ້າຮອບຄັດເລືອກເຂົ້າຮ່ວມການປະກວດນາງສາວນະຄອນຫລວງວຽງຈັນ ທີ່ຈະຈັດຂຶ້ນໃນວັນທີ 8 ເມສານີ້, ທີ່ນະຄອນຫລວງວຽງຈັນ, ຊຶ່ງນາງສາວທີ່ຜ່ານເຂົ້າຮອບມານີ້, ແມ່ນຄະນະກຳມະການພວກເຮົາໄດ້ຄັດເລືອກເອົານາງສາວຜູ້ມີຮູບໂສມງາມ, ໃບໜ້າສົດໃສ, ມີຄຸນນະສົມບັດທີ່ພຽບພ້ອມ, ກິລິຍາມາລະຍາດສົມບູນແບບ ແລະ ມີພອນສະຫວັນໃນຕົວ, ຊຶ່ງຢູ່ໃນເງື່ອນໄຂຂອງກອງປະກວດ, ສຳລັບເງິນລາງວັນຂອງແຕ່ລະຕຳແໜ່ງປະກອບມີ: ອັນດັບທີ 1 ຈະໄດ້ຮັບເງິນສົດ 20 ລ້ານກີບ, ຮອງອັນດັບທີ 1 ຈະໄດ້ຮັບເງິນສົດ 10 ລ້ານກີບ, ຮອງອັບດັບທີ 2 ຈະໄດ້ຮັບເງິນສົດ 5 ລ້ານກີບ, ຮອງອັນດັບທີ 3 ຈຳນວນ 4 ຄົນ ຈະໄດ້ຮັບເງິນສົດຄົນລະ 3 ລ້ານກີບ, ນາງສາວຂວັນໃຈຊ່າງພາບ, ນາງສາວຂວັນໃຈມະຫາຊົນ, ນາງສາວຂວັນໃຈມິດຕະພາບ ຈະໄດ້ຮັບຄົນລະ 3 ລ້ານກີບເຊັ່ນກັນ, ນອກນີ້ ຍັງຈະໄດ້ຮັບເງິນລາງວັນ ແລະ ຂອງລາງວັນຕ່າງໆຢ່າງຫລວງຫລາຍຈາກຜູ້ໃຫ້ການສະໜັບສະໜູນອີກດ້ວຍ.
