ເອົາເງິນກູ້ຊ່ວຍເຫລືອໂຄວິດ 4 ລ້ານໂດລາ ໄປຊື້ Lamborghini ຈົນຖືກຈັບ
ຊາຍໜຸ່ມຊາວອາເມລິກາໂກງກັນແບບເຫັນໆ ໃຊ້ເງິນຂອງລັດຖະບານທີ່ປ່ອຍກູ້ຊ່ວຍທຸລະກິດເອົາໄປຊື້ຂອງຟຸມເຟືອຍຈົນຖືກຈັບ.
ຊາຍຊາວອາເມລິກາຢູ່ຟໍຣິດາທີ່ໄດ້ຮັບເງິນກູ້ຢືມຈາກລັດຖະບານກາງເກືອບ 4 ລ້ານໂດລາສະຫະລັດ ເພື່ອຊ່ວຍເຫລືອທຸລະກິດທີ່ຕ້ອງສູ້ຊົນໃນຊ່ວງການລະບາດຂອງໂຄວິດ-19 ພັດເອົາເງິນໄປຊື້ລົດສະປອດ Lamborghini Huracan ຄັນໃໝ່ ແລະ ຍັງໄປຊື້ເຄື່ອງອື່ນໆທີ່ບໍ່ກ່ຽວຂ້ອງກັບການກະຕຸ້ນເສດຖະກິດ ເຮັດໃຫ້ລາວຖືກຈັບກຸມ ແລະ ຖືກຕັ້ງຂໍ້ຫາອາຍາ 3 ຂໍ້ຫາ.
ຊາຍໜຸ່ມຄົນນີ້ຄື David T. Hines ອາຍຸ 29 ປີຈາກເມືອງໄມອາມີຖືກດຳເນີນຄະດີໃນຂໍ້ຫາສໍ້ໂກງທາງທະນາຄານ ໂດຍໃຫ້ຂໍ້ມູນປອມຕໍ່ສະຖາບັນສິນເຊື່ອ ແລະ ເຮັດທຸລະກຳທີ່ຜິດກົດໝາຍຕາມລາຍງານຈາກໄອຍະການສານແຂວງອາເມລິກາໃນເຂດທາງຕອນໃຕ້ຂອງລັດຟໍຣິດາ. ເຈົ້າໜ້າທີ່ຂອງສຳນັກງານໄອຍະການກ່າວວ່າ: ຖ້າຖືກຕັດສິນລົງໂທດໃນຂໍ້ຫາທັງໝົດ ຜູ້ຊາຍຄົນນີ້ຕ້ອງຮັບໂທດຈຳຄຸກເຖິງ 70 ປີ.
ໃນເດືອນເມສາ, Hines ເປັນໜຶ່ງໃນເຈົ້າຂອງທຸລະກິດຈຳນວນຫລາຍທີ່ຂໍການຊ່ວຍເຫລືອທາງການເງິນຈາກໂຄງການຄຸ້ມຄອງຂອງລັດຖະບານກາງ ເຊິ່ງເປັນໂຄງການເງິນກູ້ເພື່ອຊ່ວຍໃຫ້ທຸລະກິດຮັກສາພະນັກງານເອົາໄວ້ ໂດຍບໍ່ຕ້ອງໄລ່ຄົນອອກໃນຊ່ວງການລະບາດຂອງໂຄໂຣນາໄວຣັສ.
ໃນໃບສະໝັກຂໍເງິນກູ້, Hines ກ່າວວ່າ: ລາວດຳເນີນທຸລະກິດ 4 ແຫ່ງໂດຍມີພະນັກງານ 70 ຄົນ ແລະ ມີຄ່າໃຊ້ຈ່າຍແຕ່ລະເດືອນປະມານ 4 ລ້ານໂດລາສະຫະລັດ.
ໃນເດືອນຕໍ່ມາ, Hines ເລີ່ມໄດ້ຮັບເງິນຈາກໂຄງການສິນເຊື່ອ, ລາວໄດ້ຮັບເງິນສາມຄັ້ງລວມເປັນເງິນ 3.984.557 ໂດລາສະຫະລັດ ຕາມຂໍ້ມູນຂອງທາງການ. ເມື່ອເງິນດັ່ງກ່າວເຂົ້າມາ, Hines ຍັງສົ່ງຄຳຮ້ອງຂໍເງິນທຶນເພີ່ມຕື່ມ ໃນທີ່ສຸດຄຳຂໍຂອງລາວມີມູນຄ່າລວມ 13.542.741 ໂດລາສະຫະລັດ.
ສິ່ງທີ່ເກີດຂຶ້ນຕໍ່ມາ ແທນທີ່ Hines ຈະເອົາເງິນໄປຊ່ວຍທຸລະກິດ ລາວພັດໃຊ້ຈ່າຍເງິນແບບມ່ວນຊື່ນ ເຊິ່ງລວມທັງການຊື້ເຄື່ອງປະດັບຫລູຫລາ, ເສື້ອຜ້າລາຄາແພງ, ໄປທ່ຽວລີສອດຢູ່ໄມອາມີ ແລະ ຄ່າໃຊ້ຈ່າຍໃນເວັບໄຊຫາຄູ່.
ການໃຊ້ເງິນຈຳນວນຫລາຍທີ່ສຸດເກີດຂຶ້ນໃນວັນທີ 18 ພຶດສະພາ ເມື່ອ Hines ຊື້ Lamborghini ສີຟ້າລາຄາ 318.497 ໂດລາສະຫະລັດ ລາວລົງທະບຽນຍານພາຫະນະພາຍໃຕ້ຊື່ຂອງລາວ ແລະ ໜຶ່ງໃນທຸລະກິດຂອງລາວ.
ໃນຄວາມເປັນຈິງແລ້ວ ຄ່າໃຊ້ຈ່າຍແຕ່ລະເດືອນຂອງ Hines ມີພຽງ 200.000 ໂດລາສະຫະລັດ ເຊິ່ງຕໍ່າກວ່າທີ່ລາວບອກໄວ້ໃນຄຳຮ້ອງຂໍກູ້ຢືມເງິນ.
