ດ່ວນ ! ຫົວພັນອອກແຈ້ງການປິດຮ້ານບໍລິການ ແລະເຄື່ອງດື່ມທີ່ມີທາດເຫຼົ້າ ໃນໄລຍະສອບເສັງຈົບຊັ້ນ ມ7
ໃນວັນທີ 28 ກໍລະກົດນີ້ ຫ້ອງວ່າການແຂວງຫົວພັນ ໄດ້ອອກແຈ້ງການ ສະບັບເລກທີ 407/ຫວຂ.ຫພ ເລື່ອງ ການປິດຮ້ານບັນເທິງ, ຮ້ານອາຫານ, ຮ້ານຄາລາໂອເກະ, ຮ້ານ ເຫຼົ້າ-ເບຍ ທຸກຊະນິດ ແລະ ຮ້ານບໍລິການເຄື່ອງດື່ມທີ່ມີທາດເຫຼົ້າ ຢູ່ພາຍໃນຂອບເຂດເທດສະບານແຂວງ ແລະ 10 ເມືອງທົ່ວ ແຂວງຫົວພັນ ໃນໄລຍະການຈັດຕັ້ງ ການສອບເສັງຈົບຊັ້ນ ມັດທະຍົມຕອນປາຍ ມ7 ສົກຮຽນ2019- 2020 ໃນລະຫວ່າງວັນທີ 29 ຫາ30 ກໍລະກົດ2020
ໂດຍມີເນື້ອໃນລະອຽດ ດັ່ງນີ້:
1) ໃຫ້ປິດບັນດາຫ້າງຮ້ານອາຫານ, ຮ້ານບັນເທີງ, ຮ້ານຄາລາໂອເກະ, ຮ້ານ ເຫຼົ້າ-ເບຍ ທຸກຊະນິດ ແລະ ຮ້ານບໍລິການເຄື່ອງດື່ມທີ່ມີທາດເຫຼົ້າ ຢູ່ພາຍໃນຂອບເຂດເທດສະບານແຂວງ ແລະ 10 ເມືອງທົ່ວແຂວງຫົວພັນ, ນັບແຕ່ເວລາ13:30 ໂມງ ຂອງວັນທີ 29 ຮອດເວລາ 24:30 ໂມງ ຂອງວັນທີ 30 ກໍລະກົດ 2020.
2) ຫ້າມບໍ່ໃຫ້ນັກສຶກສາ, ນັກຮຽນຕັ້ງກຸ່ມ ເພື່ອຊຸມແຊວ ສັງສັນກິນເຫຼົ້າ-ເບຍຕາມສະຖານທີ່ຕ່າງໆ (ບໍ່ວ່າຈະເປັນພາຍໃນເຮືອນ ຫຼື ສະຖານທີ່ອື່ນໆ).
3) ມອບໃຫ້ພະແນກ ສຶກສາທິການ ແລະ ກິລາ ແຂວງ, ພະແນກ ຖະແຫຼ່ງຂ່າວ, ວັດທະນະທໍາ ແລະ ທ່ອງທ່ຽວແຂວງ, ກອງບັນຊາການ ປກສ ແຂວງ, ພາກສ່ວນທີ່ກ່ຽວຂ້ອງຂອງແຂວງ ແລະ 10 ເມືອງທົ່ວແຂວງ ນໍາເອົາເນື້ອໃນແຈ້ງການ ດັ່ງກ່າວລົງໄປເຜີຍແຜ່ບັນດາເປົ້າໝາຍໃຫ້ທົ່ວເຖິງ ແລະ ຈັດຕັ້ງປະຕິບັດໃຫ້ເຂັ້ມງວດ,
4) ມອບໃຫ້ກອງບັນຊາການ ປກສ ແຂວງ, ກອງບັນຊາການ ປກສ ເມືອງ 10 ເມືອງທົ່ວແຂວງຫົວພັນ ສົມທົບໜ່ວຍງານ ແລະ ພາກສ່ວນທີ່ກ່ຽວຂ້ອງໃນການຈັດຕັ້ງປະຕິບັດແຕ່ງຕັ້ງຄະນະສະເພາະກິດ, ລາດຕະເວນ, ເວນຍາມຕາມສະຖານທີ່ຕ່າງໆທີ່ກ່ຽວຂ້ອງ (ບັນດາຫ້າງຮ້ານອາຫານ, ຮ້ານກິນດື່ມ, ຮ້ານບັນເທີງ ທີ່ເຫັນວ່າເປັນຈຸດຫຼໍ່ແຫຼ່ມ, ເພື່ອຕິດຕາມຄວບຄຸມ ແລະ ປະຕິບັດມາດຕະການຕໍ່ກັບຜູ້ລ່ວງລະເມີດຕາມລະບຽບກົດໝາຍຢ່າງເຂັ້ມງວດ, ກໍລະນິພົບເຫັນຫ້າງຮ້ານໃດ ລະເມີດແຈ້ງການສະບັບນີ້, ມອບໃຫ້ເຈົ້າໜ້າທີ່ກ່ຽວຂ້ອງດໍາເນີນມາດຕະການຕໍ່ຫ້າງຮ້ານດັ່ງກ່າວຕາມລະບຽບກົດໝາຍ. – ສ່ວນງົບປະມານໃນການຈັດຕັ້ງປະຕິບັດແມ່ນໃຫ້ພາກສ່ວນທີ່ກ່ຽວຂ້ອງກຸ້ມຕົນເອງ, ໃນການຈັດຕັ້ງປະຕິບັດວຽກງານໃນຄັ້ງນີ້ໃຫ້ໄດ້ຮັບຜົນເປັນຢ່າງດີ.
5) ຫາກພົບເຫັນນັກຮຽນທີ່ລ່ວງລະເມີດຕໍ່ມາດຕະການທີ່ໄດ້ລະບຸໄວ້ໃນແຈ້ງການດັ່ງກ່າວ, ແມ່ນມອບໃຫ້ຄະນະຮັດຜິດຊອບພາກສ່ວນທີ່ກ່ຽວຂ້ອງດໍາເນີນມາດຕະການຕໍ່ຜູ້ລະເມັດຕາມລະບຽບກົດໝາຍຢ່າງເຂັ້ມງວດ ແລະ ສັງລວມລາຍຊື່ສົ່ງໃຫ້ພະແນກສຶກສາທິການ ແລະ ກິລາ ແຂວງ, ຫ້ອງການສຶກສາທິການ ແລະ ກິລາ ເມືອງ ເພື່ອຄົ້ນຄວ້າປະຕິບັດຕາມ ຕາມກົດລະບຽບຂອງກະຊວງສຶກສາທິການ ແລະ ກິລາ ສະບັບເລກທີ 1821/ສສກ ລົງວັນທີ 19 ພຶດສະພາ 2016 ແລະ ກົດໝາຍຂອງບ້ານເມືອງທີ່ວາງອອກ.
