ສະຫລຸບບັນຫາໜ້າສົນໃຈທົ່ວໂລກວັນທີ 28 ກໍລະກົດ 2020
- ລາຄາຄຳເພີ່ມສູງຂຶ້ນຮອດລະດັບສູງສຸດຄັ້ງໃໝ່ ສູງກວ່າ 1.960 $/Oz ໂດຍໄດ້ຮັບແຮງສະໜັບສະໜູນຈາກເງິນໂດລາທີ່ອ່ອນຄ່າລົງ ແລະ ຄວາມກັງວົນກ່ຽວກັບການເຕີບໃຫຍ່ຂອງເສດຖະກິດໂລກ.
ໂດຍລວມແລ້ວ ລາຄາຄຳໄດ້ເພີ່ມຂຶ້ນຮອດປະມານ 2 ໃນ 3 ຫລື 66,66% ພາຍໃນໄລຍະເວລາ 2 ປີຜ່ານມາ ເຊິ່ງໄດ້ແຮງສະໜັບສະໜູນຄັ້ງທຳອິດເກີດຈາກສົງຄາມການຄ້າລະຫວ່າງ ອາເມລິກາ-ຈີນ ແລະ ອັດຕາດອກເບ້ຍຢູ່ອາເມລິກາທີ່ຫລຸດຕໍ່າລົງສູ່ລະດັບ 0%, ຕໍ່ຈາກນັ້ນຈຶ່ງໄດ້ຮັບແຮງສະໜັບສະໜູນຈາກຜົນກະທົບທາງເສດຖະກິດທີ່ເກີດຈາກການລະບາດຂອງເຊື້ອ COVID-19.
- ຮົງກົງກຽມສັ່ງຫ້າມການຊຸມນຸມຫລາຍກວ່າ 2 ຄົນຂຶນໄປໃນຮ້ານອາຫານທີ່ເປັນສະຖານທີ່ປິດ ແລະ ໄດ້ອອກກົດໝາຍບັງຄັບໃຫ້ປະຊາຊົນທຸກຄົນຕ້ອງໃສ່ຜ້າປິດປາກ-ດັງຢູ່ສະຖານທີ່ສາທາລະນະ ນັບແຕ່ວັນທີ 29 ກໍລະກົດເປັນຕົ້ນໄປ ເຊິ່ງຖືເປັນຄວາມພະຍາຍາມຂອງລັດຖະບານທີ່ຈະຄວບຄຸມການແຜ່ລະບາດຂອງໄວຣັສ.
ໃນວັນທີ 27 ກໍລະກົດ ພາຍໃນເມືອງໄດ້ມີລາຍງານຜູ້ຕິດເຊື້ອໃໝ່ເຖິງ 145 ຄົນ (142 ຕາມລາຍງານຂອງ Bloomberg) ຖືເປັນສະຖິຕິສູງສຸດໃໝ່ແຕ່ລະມື້ຂອງເມືອງນັບແຕ່ມີການລະບາດເກີດຂຶ້ນ.
ຂະນະດຽວກັນ ປະເທດແບນຊິກ ເຊິ່ງກຳລັງມີຈຳນວນຜູ້ຕິດເຊື້ອເພີ່ມຂຶ້ນຢ່າງວ່ອງໄວ ໄດ້ຫລຸດຂະໜາດ “ຟອງສະບູຂອງສັງຄົມ” (Social Bubbles) ລົງ ເຊິ່ງໝາຍເຖິງການຫລຸດຈຳນວນຂອງສະມາຊິກທີ່ອະນຸຍາດໃຫ້ໄປມາຫາສູ່ກັນລະຫວ່າງຄອບຄົວແຕ່ລະຫລັງ ຈາກສູງສຸດບໍ່ເກີນ 15 ຄົນກາຍເປັນສູງສຸດບໍ່ເກີນ 5 ຄົນ.
- ຜູ້ມີອຳນາດຂອງຫວຽດນາມເລີ່ມອົບພະຍົບນັກທ່ອງທ່ຽວອອກຈາກເມືອງ Danang ໂດຍສະເພາະຢູ່ສູນກາງຂອງຕົວເມືອງ ຫລັງຈາກມີລາຍງານຂອງຜູ້ຕິດເຊື້ອເພີ່ມຂຶ້ນຫລາຍໃນມື້ພັກທ້າຍອາທິດຜ່ານມາ.
ກ່ອນໜ້ານີ້ ປະເທດຫວຽດນາມໄດ້ຕັດສິນໃຈຈະຕໍ່ສູ້ກັບພະຍາດລະບາດ ໂດຍໃຊ້ມາດຕະການຄວບຄຸມຢ່າງເຂັ້ມງວດ ແລະ ກໍໄດ້ຜົນອອກມາປະສົບຜົນສຳເລັດຫລາຍ.
ເຖິງຢ່າງໃດກໍຕາມ, ຫລ້າສຸດມີລາຍງານຜູ້ຕິດເຊື້ອໃໝ່ຫລາຍຮ້ອຍຄົນ ເຖິງວ່າຈະຍັງບໍ່ມີຜູ້ໃດເສຍຊີວິດເພີ່ມ. ຂະນະທີ່ປະເທດໄດ້ສັ່ງປິດຊາຍແດນສຳລັບນັກທ່ອງທ່ຽວຕ່າງປະເທດ ແຕ່ຊາວຫວຽດນາມຫລາຍຄົນຍັງສາມາດສະຫລອງມື້ພັກຂອງພວກເຂົາໄດ້ຕາມປົກກະຕິພາຍໃນເມືອງ Danang.
- ແຜນຊ່ວຍເຫລືອຜົນກະທົບຈາກ COVID-19 ທີ່ສະເໜີໂດຍສະມາຊິກວຸດທິສະພາຝ່າຍ Republican ຂອງອາເມລິກາ ຈະຕັດຜົນປະໂຫຍດແຕ່ລະອາທິດຂອງສະຫວັດດີການລົງຈາກ 600 ໂດລາເຫລືອພຽງ 200 ໂດລາ ໄປຈົນກວ່າລັດຖະບານຈະສາມາດປັບປຸງຜົນປະໂຫຍດໃຫ້ຢູ່ໃນລະດັບທີ່ມີຄວາມເໝາະສົມກັບລາຍໄດ້ຂອງແຕ່ລະບຸກຄົນໃນໄລຍະກ່ອນເກີດການລະບາດ.
ມາດຕະການສະໜັບສະໜູນ 600 ໂດລາຕໍ່ອາທິດໃນປັດຈຸບັນ ເຊິ່ງເປັນສ່ວນໜຶ່ງຂອງມາດຕະການສະໜັບສະໜູນເສດຖະກິດຄັ້ງທຳອິດທີ່ລັດຖະບານປະກາດອອກມານັບແຕ່ເດືອນມີນາ 2020 ກຳລັງຈະໝົດອາຍຸລົງພາຍໃນອາທິດນີ້ (ທ້າຍເດືອນ). ຂະນະທີ່ສະພາຄອງເກຣດຍັງບໍ່ໄດ້ມີການອະນຸມັດທີ່ຈະຂະຫຍາຍໄລຍະເວລາຂອງມາດຕາດັ່ງກ່າວ.
- ຫຸ້ນໃນກຸ່ມອຸດສາຫະກຳການທ່ອງທ່ຽວຂອງເອີຣົບໄດ້ປັບຫລຸດລົງ ຫລັງຈາກການລະບາດຂອງ COVID-19 ຮຸນແຮງຂຶ້ນໃນຫລາຍປະເທດ. ຂະນະທີ່ລັດຖະບານໄດ້ປະກາດມາດຕະການກັກກັນສະບັບໃໝ່ ແລະ ບໍລິສັດຕ່າງໆໄດ້ລາຍງານຜົນກຳໄລທີ່ໜ້າຜິດຫວັງ.
Ryanair Holdings plc ບໍລິສັດສາຍການບິນຕົ້ນທຶນຕໍ່າທີ່ໃຫຍ່ທີ່ສຸດເປັນອັນດັບ 2 ຂອງເອີຣົບກ່າວວ່າ: ຈຳນວນຜູ້ໂດຍສານຂອງພວກເຂົາຫລຸດລົງເຖິງ 99% ໃນໄຕມາດທີ 2 ນີ້ເມື່ອທຽບໃສ່ໄລຍະດຽວກັນຂອງປີ 2019 ໂດຍບໍລິສັດລາຍງານຜົນຂາດທຶນແຕ່ລະໄຕມາດເຖິງ 216 ລ້ານໂດລາ ທຽບໃສ່ການລາຍງານຜົນກຳໄລ 286 ລ້ານໂດລາໃນໄຕມາດທີ 2 ຂອງປີ 2019.
- Robert O’Brien ທີ່ປຶກສາດ້ານຄວາມໝັ້ນຄົງແຫ່ງຊາດຂອງປະທານາທິບໍດີ ໂດນັລ ທຣຳ ໄດ້ມີຜົນທົດສອບ COVID-19 ເປັນບວກ ເຊິ່ງທ່ານຫາກໍຖືກພົບວ່າຢູ່ກັບທ່ານ ໂດນັລ ທຣຳ ໃນສະຖານທີ່ສາທາລະນະເມື່ອວັນທີ 10 ກໍລະກົດຜ່ານມາ. ນອກຈາກນີ້ ຍັງເປັນບຸກຄົນທີ່ເຮັດວຽກໃກ້ກັບປະທານາທິບໍດີຫລາຍທີ່ສຸດ ສຳລັບເລື່ອງການຄວບຄຸມພະຍາດລະບາດ.
ສະມາຊິກລະດັບອາວຸໂສທີ່ເປັນຝ່າຍບໍລິຫານຄົນອື່ນໆ ຈຳເປັນຕ້ອງເຂົ້າຮັບການທົດສອບ COVID-19 ໃນທຸກໆວັນ ແລະ ທ່ານເປັນຄົນຫລ້າສຸດທີ່ມີຜົນທົດສອບເປັນບວກ. ຂະນະທີ່ທ່ານ ໂດນັລ ທຣຳ ເອງ ໃນອາທິດຜ່ານມາກໍໄດ້ອອກມາປຸກລະດົມໃຫ້ຄົນໃສ່ຜ້າປິດປາກ-ດັງຢູ່ສະຖານທີ່ສາທາລະນະເພື່ອປ້ອງກັນຕົນເອງຈາກ COVID-19 ເຖິງວ່າກ່ອນໜ້ານີ້ທ່ານຈະສະແດງທ່າທີບໍ່ຍອມຮັບການໃສ່ຜ້າປິດປາກ-ດັງກໍຕາມ.
- ຍອດຄຳສັ່ງຊື້ຂອງສິນຄ້າຄົງທົນ (durable goods) ເຊັ່ນ: ເຮືອນ, ລົດ ແລະ ສິນຄ້າຄົງທົນອື່ນໆຢູ່ອາເມລິກາ ໄດ້ເພີ່ມຂຶ້ນ 7,3% ໃນເດືອນມິຖຸນາຜ່ານມາ ເຊິ່ງຖືເປັນການເພີ່ມຂຶ້ນຕາມຄວາມຄາດຫວັງຂອງນັກເສດຖະສາດ.
ນອກຈາກນີ້ ຍັງເປັນເດືອນທີ 2 ຕິດຕໍ່ກັນຂອງການຟື້ນຕົວໃນຍອດຄຳສັ່ງຊື້ ນັບແຕ່ລະດັບການລົງທຶນພາຍໃນປະເທດໄດ້ຫລຸດລົງເມື່ອລັດຖະບານໄດ້ປະກາດບັງຄັບໃຊ້ມາດຕະການ Lockdowns.
ເຖິງຢ່າງໃດກໍຕາມ, ນັກພະຍາກອນຍັງມີຄວາມກັງວົນວ່າ: ການຟື້ນຕົວຄັ້ງນີ້ອາດຢຸດສະງັກ ແລະ ຫລຸດລົງອີກ ຖ້າຈຳນວນຜູ້ຕິດເຊື້ອ COVID-19 ໃໝ່ຍັງເພີ່ມສູງຂຶ້ນຢ່າງຕໍ່ເນື່ອງຢູ່ອາເມລິກາ.
