ສະຫລຸບບັນຫາໜ້າສົນໃຈທົ່ວໂລກປະຈຳວັນທີ 27 ກໍລະກົດ 2020
- ຈຳນວນຜູ້ຕິດເຊື້ອ COVID-19 ທົ່ວໂລກຫລ້າສຸດສູງເຖິງ 16 ລ້ານຄົນຮຽບຮ້ອຍແລ້ວ ແລະ ມີຢ່າງໜ້ອຍ 644.000 ຄົນທີ່ໄດ້ເສຍຊີວິດຈາກພະຍາດນີ້. ຂະນະທີ່ ອົງການອະນາໄມໂລກເຕືອນວ່າສະພາບແວດລ້ອມຂອງການດຳລົງຊີວິດຈະບໍ່ກັບໄປເປັນແບບເກົ່າທີ່ເຮົາຄຸ້ນເຄີຍໃນມໍ່ໆນີ້ຢ່າງແນ່ນອນ ເນື່ອງຈາກການລະບາດຂອງໄວຣັສໄດ້ທະວີຄວາມຮຸນແຮງຂຶ້ນ.
ມີຜູ້ຕິດເຊື້ອໃໝ່ຫລາຍກວ່າ 1 ລ້ານຄົນພາຍໃນໄລຍະເວລາພຽງ 4 ວັນ ແລະ ເກືອບ 40 ປະເທດທົ່ວໂລກໄດ້ລາຍງານຜູ້ຕິດເຊື້ອແຕ່ລະມື້ເພີ່ມຂຶ້ນເປັນສະຖິຕິສູງສຸດໃໝ່ໃນຊ່ວງມື້ພັກທ້າຍອາທິດຜ່ານມາ.
- ປະເທດອັງກິດ, ນອກແວ ແລະ ປະເທດອື່ນໆ ອີກຫລາຍປະເທດໄດ້ປັບໃຊ້ມາດຕະການກັກຂັງນັກທ່ອງທ່ຽວຈາກປະເທດແອັສປາຍອີກເທື່ອໜຶ່ງ ຫລັງຈາກມີການເພີ່ມຂຶ້ນຂອງຜູ້ຕິດເຊື້ອໃໝ່ພາຍໃນ Catalonia ເຊິ່ງເປັນເຂດປົກຄອງຕົນເອງພາຍໃນປະເທດແອັສປາຍ.
ບໍລິສັດ Tui ເຊິ່ງເປັນຜູ້ປະກອບການດ້ານການທ່ອງທ່ຽວລາຍໃຫຍ່ທີ່ສຸດຂອງເອີຣົບ ໄດ້ສັ່ງຍົກເລີກທົວທ່ອງທ່ຽວຊ່ວງມື້ພັກພາຍໃນປະເທດແອັສປາຍເປັນໄລຍະເວລາ 2 ອາທິດຕໍ່ຈາກນີ້.
ຂະນະດຽວກັນ ໜັງສືພິມ EI Pais ໄດ້ເຜີຍແຜ່ຜົນການກວດສອບ ເຊິ່ງຄິດໄລ່ວ່າຈຳນວນຜູ້ເສຍຊີວິດຊາວແອັສປາຍຈາກພະຍາດ COVID-19 ອາດສູງກວ່າຕົວເລກທີ່ລັດຖະບານປະກາດອອກມາເຖິງ 60% ໂດຍຕົວເລກທີ່ລັດຖະບານປະກາດອອກມາຫລ້າສຸດມີຜູ້ເສຍຊີວິດ 28.432 ຄົນ ເຊິ່ງຖ້າບວກເພີ່ມໄປ 60% ຈະກາຍເປັນ 45.491 ຄົນ.
- ພາຍຸ “ຮັນນາ” (Hanna) ເຊິ່ງເປັນພາຍຸເຮີລິເຄນໃນມະຫາສະໝຸດອັດລັງຕິກຫົວທຳອິດຂອງປີ 2020 ໄດ້ອ່ອນກຳລັງລົງຈາກພາຍຸເຮີລິເຄນລະດັບ 1 ທີ່ມີລະດັບຄວາມໄວລົມນັບແຕ່ 118 ເຖິງ 153 ກິໂລແມັດ/ຊົ່ວໂມງ ກາຍເປັນພາຍຸເຂດຮ້ອນ ເຊິ່ງມີລະດັບຄວາມໄວລົມຕໍ່າກວ່າ 118 ກິໂລແມັດ/ຊົ່ວໂມງ ຫລັງຈາກທີ່ພັດຂຶ້ນໄປສູ່ແຄມຝັ່ງຂອງລັດ Texas.
ເຖິງຢ່າງໃດກໍຕາມ, ພາຍຸດັ່ງກ່າວໄດ້ເຮັດໃຫ້ເກີດການສູນເສຍໃນພື້ນທີ່ຂອງປະເທດອາເມລິກາ ເຊິ່ງກ່ອນໜ້ານີ້ໄດ້ຮັບຜົນກະທົບຢ່າງຮຸນແຮງຈາກການລະບາດມາແລ້ວຄັ້ງໜຶ່ງ.
ປັດຈຸບັນມີເຮືອນ ແລະ ທຸລະກິດ 283.000 ກວ່າແຫ່ງທີ່ບໍ່ສາມາດໃຊ້ໄຟຟ້າໄດ້ ເນື່ອງຈາກຜົນກະທົບຂອງພາຍຸດັ່ງກ່າວ. ຂະນະທີ່ Greg Abbott ເຈົ້າຄອງລັດ Texas ໄດ້ອອກຖະແຫລງການແຈ້ງເຕືອນເຖິງໄພຄຸກຄາມດັ່ງກ່າວໃຫ້ແກ່ 32 ປະເທດ ເຊິ່ງຢູ່ໃນເສັ້ນທາງຂອງພາຍຸຮັນນາ.
- ລັດຖະສະພາຂອງປະເທດໂຊມາລີໄດ້ລົງມະຕິເພື່ອຂັບໄລ່ Hassan Ali Khaire ເຊິ່ງເປັນນາຍົກລັດຖະມົນຕີຂອງປະເທດອອກຈາກຕຳແໜ່ງໃນການອະພິປາຍບໍ່ໄວ້ວາງໃຈຄັ້ງຫລ້າສຸດນີ້.
ການໂຄ່ນລົ້ມນາຍົກລັດຖະມົນຕີຂອງພວກເຂົາເກີດຂຶ້ນທ່າມກາງການຍາດຊີງຕຳແໜ່ງກັນລະຫວ່າງ Hassan Ali Khaire ແລະ Mohamed Abdullahi Mohamed ເຊິ່ງເປັນປະທານາທິບໍດີຂອງປະເທດ ໂດຍການເລືອກຕັ້ງຈະຈັດຂຶ້ນໃນເດືອນກຸມພາ ປີ 2021.
ເຖິງຢ່າງໃດກໍຕາມ Hassan Ali Khaire ໄດ້ຢືນຢັນຈະເດີນໜ້າຕໍ່ໄປ. ຂະນະທີ່ Mohamed Abdullahi Mohamed ໄດ້ປະກາດເລື່ອນການເລືອກຕັ້ງອອກໄປ ເນື່ອງຈາກຄວາມກັງວົນດ້ານຄວາມປອດໄພຂອງປະເທດ.
- ເຈົ້າໜ້າທີ່ມອດໄຟ 700 ກວ່າຄົນກຳລັງຕໍ່ສູ້ກັບໄຟໄໝ້ປ່າ ເຊິ່ງກຳລັງໄໝ້ຜ່ານກາງເມືອງຂອງປະເທດປອກຕຸຍການ ໃກ້ໆຕົວເມືອງໃນເຂດ Oleiros ໂດຍຫລ້າສຸດມີເຈົ້າໜ້າທີ່ 1 ຄົນເສຍຊີວິດຈາກອຸປະຕິເຫດດັ່ງກ່າວ ໃນຂະນະທີ່ຄວາມພະຍາຍາມຄວບຄຸມການລຸກລາມຂອງໄຟ ແລະ ມີອີກ 6 ຄົນໄດ້ຮັບບາດເຈັບ.
ຂະນະດຽວກັນ ຢູ່ປະເທດຝຣັ່ງ ກໍມີອາສາສະໝັກຂອງໂບດ Namtes Cathedral ອອກມາຍອມຮັບວ່າລາວເປັນຜູ້ກໍ່ເຫດ ເຊິ່ງໄດ້ທຳລາຍໂບດເກົ່າແກ່ທີ່ສ້າງຂຶ້ນມາແຕ່ສະຕະວັດທີ 17.
- ຜູ້ປະທ້ວງ Black Lives Matter ຍັງມີການປະທ້ວງຢ່າງຕໍ່ເນື່ອງໃນຫລາຍປະເທດ ແລະ ຫລາຍເມືອງທົ່ວໂລກ ຫລັງຈາກຫລ້າສຸດມີ 1 ຄົນຖືກສັງຫານຈາກການລອບຍິງໃນລະຫວ່າງການເດີນຂະບວນປະທ້ວງຢູ່ເມືອງ Austin ລັດ Texas.
ສ່ວນຢູ່ເມືອງ Portland ລັດ Oregon ຫລ້າສຸດໄດ້ມີການປະທະກັນລະຫວ່າງກຸ່ມຜູ້ຊຸມນຸມປະທ້ວງ ແລະ ກອງກຳລັງຂອງລັດຖະບານກາງ. ຂະນະທີ່ຜູ້ປະທ້ວງໃນປະເທດອົດສະຕຣາລີໄດ້ວາງແຜນຈະໂຈະການປະທ້ວງໃນອາທິດນີ້ອອກໄປ ເນື່ອງຈາກຄຳສັ່ງຂອງສານ ແລະ ຄວາມກັງວົນຂອງຕຳຫລວດທີ່ວ່າການຊຸມນຸມອາດເຮັດໃຫ້ການແຜ່ລະບາດທະວີຄວາມຮຸນແຮງຍິ່ງຂຶ້ນ.
- ກ່ອນຈະຮອດວັນແຫ່ງການສະເຫລີມສະຫລອງໄຊຊະນະໃນສົງຄາມປົດປ່ອຍ ສປປ ເກົາຫລີ (Day of Victory in the Great Fatherland Liberation War) ລັດຖະບານໄດ້ປະກາດພາວະສຸກເສີນ ແລະ ມາດຕະການ Lockdown ຢູ່ເມືອງຕ່າງໆອ້ອມບໍລິເວນຊາຍແດນຂອງປະເທດ ຫລັງຈາກມີລາຍງານຜູ້ຕິດເຊື້ອ COVID-19 ເປັນຄົນທຳອິດຂອງປະເທດ ເຊິ່ງບຸກຄົນດັ່ງກ່າວເປັນຜູ້ອົບພະຍົບທີ່ລັດຖະບານລາຍງານວ່າຂ້າມຈາກທາງຕອນໃຕ້ມາຢ່າງຜິດກົດໝາຍ.
ສປປ ເກົາຫລີ ນັ້ນຖືກຕັ້ງຂໍ້ສົງໄສໂດຍປະເທດອື່ນໆວ່າຈະມີການລະບາດຂອງໄວຣັສ ແລະ ຈຳນວນຜູ້ຕິດເຊື້ອຫລາຍກວ່າທີ່ລັດຖະບານລາຍງານອອກມາ. ຂະນະທີ່ການຮັບຮູ້ເຖິງຜູ້ຕິດເຊື້ອຄົນທຳອິດຂອງປະເທດອາດກາຍມາເປັນຂໍ້ອ້າງໃນການຂໍຄວາມຊ່ວຍເຫລືອຈາກປະເທດອື່ນໆ.
