ລັດວິກຕໍເຣຍໂຄວິດ-19 ລະບາດໜັກ ທາງການສັ່ງໃສ່ຜ້າປິດປາກ-ດັງ ພົບຜູ້ຕິດເຊື້ອເພີ່ມ 300 ຄົນໃນມື້ດຽວ
ວັນທີ 24 ກໍລະກົດ, ທາງການວິກຕໍເຣຍຂອງອົດສະຕຣາລີເຜີຍ ພົບຜູ້ຕິດເຊື້ອໃໝ່ເພີ່ມສູງເຖິງ 300 ຄົນ ໃນ 24 ຊົ່ວໂມງ ຖືເປັນສະຖິຕິສູງສຸດຕໍ່ວັນນັບແຕ່ມີການແຜ່ລະບາດ ໂດຍກຸ່ມກ້ອນແຜ່ເຊື້ອສ່ວນຫລາຍເປັນເຮືອນພັກຜູ້ອາຍຸສູງ. ເບື້ອງຕົ້ນທາງການສັ່ງພົນລະເມືອງໃສ່ຜ້າປິດປາກ-ດັງໃນເວລາຢູ່ສະຖານທີ່ສາທາລະນະ ແລະ ເວັ້ນໄລຍະຫ່າງທາງສັງຄົມແລ້ວ.
ເຈົ້າໜ້າທີ່ຕຳຫລວດລັດວິກຕໍເຣຍເຜີຍ ສັ່ງປັບໄໝພົນລະເມືອງທີ່ບໍ່ໃສ່ຜ້າປິດປາກ-ດັງເມື່ອມໍ່ໆມານີ້ສູງກວ່າ 100 ຄົນ. ອີກທັງຍັງສັ່ງປັບໄໝສູນອອກກຳລັງກາຍແຫ່ງໜຶ່ງເປັນເງິນ 9.913 ໂດລາອົດສະຕຣາລີ ຫລັງຝ່າຝືນຄຳສັ່ງຂອງທາງການ ຍັງເປີດໃຫ້ບໍລິການຕາມປົກກະຕິ ເຊິ່ງອາດສົ່ງຜົນໃຫ້ສະຖານະການການແຜ່ລະບາດຮຸນແຮງຂຶ້ນຖ້າຮັບມືແບບບໍ່ຮັດກຸມ.
ຫລ້າສຸດ ອົດສະຕຣາລີມີຜູ້ຕິດເຊື້ອໂຄວິດ-19 ສະສົມ 13.595 ຄົນ, ພົບຜູ້ຕິດເຊື້ອໃໝ່ເພີ່ມ 309 ຄົນ, ເສຍຊີວິດແລ້ວ 139 ຄົນ ໂດຍລັດວິກຕໍເຣຍຍັງເປັນລັດທີ່ມີຜູ້ຕິດເຊື້ອສະສົມຫລາຍທີ່ສຸດຂອງປະເທດ (7.405 ຄົນ), ຕາມມາແມ່ນລັດນິວເຊົາເວລ (3.640 ຄົນ) ແລະ ລັດຄວີນແລນ (1.076 ຄົນ). ສ່ວນນໍເທິນເທຣຣິທໍຣີ ຍັງເປັນພື້ນທີ່ທີ່ມີຜູ້ຕິດເຊື້ອສະສົມໜ້ອຍທີ່ສຸດພຽງ 31 ຄົນ. ຂະນະທີ່ນິວຊີແລນບໍ່ພົບຜູ້ຕິດເຊື້ອໃໝ່ ແຕ່ຍັງມີຜູ້ຕິດເຊື້ອປິ່ນປົວຢູ່ 21 ຄົນ ແລະ ບໍ່ມີຜູ້ເສຍຊີວິດຈາກໂຄວິດ-19 ມາເກືອບ 2 ເດືອນແລ້ວ.
