ໜ້າເປັນຫ່ວງການລະບາດໄຂ້ຍຸງລາຍຢູ່ນະຄອນຫລວງວຽງຈັນສູງຕິດອັນດັບ 1
ກະຊວງສາທາລະນະສຸກລາຍງານໃຫ້ຮູ້ວ່າ: ປັດຈຸບັນສະພາບການລະບາດຂອງໄຂ້ຍຸງລາຍນັບວ່າຮ້າຍແຮງ, ໂດຍສະເພາະຢູ່ນະຄອນຫລວງວຽງຈັນ ເຊິ່ງນັບແຕ່ຕົ້ນປີນີ້ມີຜູ້ຕິດເຊື້ອ 768 ຄົນ, ໃນນັ້ນມີຜູ້ເສຍຊີວິດແລ້ວ 3 ຄົນ ແລະ ກາຍເປັນອັນດັບ 1 ຂອງການລະບາດພະຍາດດັ່ງກ່າວ.
ນັບແຕ່ວັນທີ 1 ມັງກອນ 2020 ຫາ ວັນທີ 22 ກໍລະກົດ 2020 ໃນທົ່ວປະເທດມີຜູ້ຕິດເຊື້ອສະສົມທັງໝົດ 3.614 ຄົນ. ໃນນັ້ນແຂວງທີ່ມີການລາຍງານຫລາຍກວ່າໝູ່ແມ່ນນະຄອນຫລວງວຽງຈັນເຊິ່ງມີເຖິງ 768 ຄົນ, ຖັດລົງມາແມ່ນແຂວງ ວຽງຈັນ 412 ຄົນ, ບໍລິຄຳໄຊ 435 ກໍລະນີ ແລະ ແຂວງອັດຕະປື 360 ກໍລະນີ. ມີຜູ້ເສຍຊີວິດແລ້ວ 8 ຄົນ (ນະຄອນຫລວງ 3 ຄົນ, ບໍລິຄຳໄຊ 2 ຄົນ, ຄຳມ່ວນ 1 ຄົນ, ໄຊຍະບູລີ 1 ຄົນ ແລະຊຽງຂວາງ 1 ຄົນ).
ດັ່ງນັ້ນ, ຕໍ່ສະພາບການດັ່ງກ່າວ ພວກເຮົາຕ້ອງພ້ອມກັນປະຕິບັດຄຳຂັວນທີ່ວ່າ “ບໍ່ມີໜອນນ້ຳຍຸງລາຍ ກໍ່ບໍ່ມີຍຸງລາຍ ແລະ ບໍ່ມີໄຂ້ເລືອດອອກ” ແລະພ້ອມກັນປະຕິບັດ 5 ປ ຢ່າງເຄັ່ງຄັດໃຫ້ເປັນປະຈຳຈຶ່ງສາມາດທຳລາຍແຫຼ່ງເພາະພັນຂອງຍຸງລາຍໄດ້.
