ສໍາມະນາກ່ຽວກັບການສ້າງຍີ່ຫໍ້ສິນຄ້າລາວ

ໃນວັນທີ 24 ກໍລະກົດນີ້ ສະພາການຄ້າ ແລະ ອຸດສາຫະກຳແຫ່ງຊາດລາວ (ສຄອຊ) ໄດ້ຈັດສຳມະນາກ່ຽວກັບການສ້າງ ແລະ ພັດທະນາຍີ່ຫໍ້ສິນຄ້າຂອງລາວ ແລະ ການສ້າງຂີດຄວາມສາມາດຜູ້ຜະລິດໃນຂະແໜງກະສິກຳຕໍ່ກັບວຽກງານການຄ້າທາງເອເລັກໂຕນິກ ເຊິ່ງວ່າການສ້າງສິນຄ້າ ແລະ ຍີ່ຫໍ້ລາວນີ້ຕ້ອງໄດ້ໃຊ້ເວລາ. ສະນັ້ນ ມື້ນີ້ເຮົາມາຮຽນຮູ້ນຳກັນວ່າການສ້າງສິນຄ້າ ແລະ ການສ້າງຍີ່ຫໍ້ຂອງສິນຄ້ານັ້ນມີວິທີການແນວໃດ ເພື່ອເຮັດໃຫ້ລູກຄ້າສາມາດຈື່ໄດ້ງ່າຍ ແລະ ເປັນທີ່ໂດດເດັ່ນ ພ້ອມທັງການສົ່ງເສີມການຜະລິດສິນຄ້າລາວໃຫ້ກ້າວໄປສູ່ຕະຫລາດອາຊຽນ ແລະ ຕະຫລາດໂລກໃຫ້ຫລາຍຂຶ້ນ ເປັນຕົ້ນການນຳເຂົ້າຈຳໜ່າຍໃນຮ້ານມິນິມາກ, ມິນິບິກຊີ ເຊິ່ງມີຫລາຍສາຂາໃນທົ່ວນະຄອນຫລວງວຽງຈັນ ແລະ ການກະຈາຍສິນຄ້າອອກໄປທົ່ວປະເທດ ໂດຍການນຳໃຊ້ຊ່ອງທາງເອເລັກໂຕນິກທີ່ສາມາດກະຈາຍສິນຄ້າໄດ້ຢ່າງວ່ອງໄວ ແລະ ກວ້າງຂວາງໃນປັດຈຸບັນ. ນອກຈາກນີ້, ຜູ້ເຂົ້າຮ່ວມສຳມະນາທຸກທ່ານຍັງໄດ້ແລກປ່ຽນບົດຮຽນ ແລະ ປະສົບການທາງດ້ານການດຳເນີນທຸລະກິດ, ການກະຈາຍສິນຄ້າຂອງແຕ່ລະບໍລິສັດນຳອີກ.