ອາຟຣິກາໃຕ້ສັ່ງປິດໂຮງຮຽນລັດທົ່ວປະເທດ ຫລັງຍອດຕິດໂຄວິດ-19 ສູງເຖິງ 4 ແສນຄົນ ຕິດເຊື້ອສະສົມທົ່ວໂລກ 15,6 ລ້ານຄົນ
ວັນທີ 24 ກໍລະກົດ, ທາງການອາຟຣິກາໃຕ້ປະກາດສັ່ງປິດໂຮງຮຽນລັດທົ່ວປະເທດເປັນໄລຍະເວລາ 4 ອາທິດ ຫລັງປະທານາທິບໍດີ ໄຊຣິລ ຣາມາໂຟຊາ ຢືນຢັນຈຳນວນຜູ້ຕິດໂຄວິດ-19 ໃນປະເທດເພີ່ມສູງເຖິງ 4 ແສນຄົນແລ້ວ ສູງທີ່ສຸດເປັນອັນດັບ 5 ຂອງໂລກໃນປັດຈຸບັນ ໂດຍລະບຸວ່າ: ສະຖານສຶກສາຈະຕ້ອງບໍ່ກາຍເປັນສະຖານທີ່ແຜ່ກະຈາຍເຊື້ອໃນໄລຍະເວລາທີ່ມີການລະບາດຂອງພະຍາດໃນຫລາຍພື້ນທີ່ທົ່ວປະເທດ.
ການແຜ່ລະບາດຂອງໂຄວິດ-19 ກຳລັງກ້າວເຂົ້າສູ່ເດືອນທີ 7 ທົ່ວໂລກມີຜູ້ຕິດເຊື້ອສະສົມເກີນ 15,6 ລ້ານຄົນແລ້ວ (15.640.172), ປິ່ນປົວຫາຍ 9,5 ລ້ານກວ່າຄົນ (9.528.723 ຄົນ) ຫລື ເກືອບ 2 ໃນ 3 ຂອງຜູ້ຕິດເຊື້ອທັງໝົດ, ເສຍຊີວິດແລ້ວ 635.602 ຄົນ ອັດຕາການເສຍຊີວິດ 4,06% ໂດຍພົບຜູ້ຕິດເຊື້ອເພີ່ມເກີນມື້ລະ 1 ແສນຄົນຕິດຕໍ່ກັນເຖິງ 58 ມື້ ນັບແຕ່ວັນທີ 27 ພຶດສະພາຜ່ານມາ.
ອາເມລິກາຍັງເປັນປະເທດທີ່ພົບຜູ້ຕິດເຊື້ອສະສົມຫລາຍທີ່ສຸດໃນໂລກ (4.169.170 ຄົນ) ພົບຜູ້ຕິດເຊື້ອໃໝ່ເພີ່ມ 68.295 ຄົນໃນມື້ດຽວ, ຕາມມາແມ່ນເບຣຊິນ (2.287.475 ຄົນ) ຕິດເຊື້ອເພີ່ມ 59.961 ຄົນ, ອິນເດຍ (1.288.130 ຄົນ) ຕິດເຊື້ອເພີ່ມ 48.446 ຄົນ, ຣັດເຊຍ (795.038 ຄົນ) ແລະ ອາຟຣິກາໃຕ້ (408.052 ຄົນ) ໂດຍອີຣັກເປັນປະເທດຫລ້າສຸດ ປະເທດທີ 23 ທີ່ມີຍອດຜູ້ຕິດເຊື້ອສະສົມເຖິງຫລັກແສນຄົນ.
ຫລ້າສຸດ ອົງການອະນາໄມໂລກເຜີຍ ສະຖານະການການແຜ່ລະບາດຢູ່ອາຟຣິກາມີທ່າອ່ຽງຮຸນແຮງຂຶ້ນ ໂດຍມີອາຟຣິກາໃຕ້ເປັນຈຸດແຜ່ກະຈາຍທີ່ສຳຄັນຂອງທະວີບນີ້ ມີຍອດຜູ້ຕິດເຊື້ອສະສົມໃນທະວີບ 7,5 ແສນກວ່າຄົນ ເຈົ້າໜ້າທີ່ສາທາລະນະສຸກທີ່ເຮັດວຽກຢູ່ໃນ 40 ກວ່າປະເທດທົ່ວທະວີບອາຟຣິກາຕິດໂຄວິດ-19 ຫລາຍກວ່າ 10.000 ຄົນແລ້ວ.
