ຜົນກອງປະຊຸມລັດຖະບານນາຍົກເນັ້ນເພີ່ມທະວີຮັກສາຄວາມສະຫງົບ ແລະ ເປັນລະບຽບຮຽບຮ້ອຍໃນສັງຄົມ

ກອງປະຊຸມລັດຖະບານສະໄໝສາມັນປະຈໍາເດືອນມີນາ 2017 ໄດ້ໄຂຂຶ້ນໃນວັນທີ 15-16 ນີ້, ໂດຍການເປັນປະທານຂອງທ່ານນາຍົກລັດຖະມົນຕີ ທອງລຸນ ສີສຸລິດ. ກອງປະຊຸມໄດ້ປຶກສາຫາລືບັນຫາສໍາຄັນຄື: ສະພາບການຈັດຕັ້ງປະຕິບັດແຜນການ ແລະ ລາຍຮັບ-ລາຍຈ່າຍງົບປະມານ, ລາຍງານກ່ຽວກັບການຈັດຕັ້ງປະຕິບັດການປະມູນຊື້-ຂາຍໄມ້, ການສົ່ງອອກໄມ້ ແລະ ບັນດາໂຮງ ງານປຸງແຕ່ງໄມ້, ລາຍງານກ່ຽວກັບການດໍາເນີນທຸລະກິດຈໍານວນໜຶ່ງທີ່ບໍ່ສອດຄ່ອງກັບກົດໝາຍ, ລະບຽບການຂອງລັດ, ຮ່າງກົດໝາຍວ່າດ້ວຍໄຟຟ້າສະບັບປັບປຸງ, ຮ່າງຄໍາສັ່ງຂອງທ່ານນາຍົກລັດຖະມົນຕີວ່າດ້ວຍການຄຸ້ມຄອງຮ້ານບັນເທີງ ແລະ ຮ້ານຂາຍເຫລົ້າ-ເບຍທີ່ຢູ່ໃກ້ກັບສະຖານການສຶກສາ, ໂຮງໝໍ, ສະຖານທີ່ສາສະໜາ ແລະ ສະຖານທີ່ສໍາຄັນຕ່າງໆ, ຮ່າງດໍາລັດວ່າດ້ວຍການຈັດຕັ້ງ ແລະ ການເຄື່ອນໄຫວຂອງຄະນະກໍາມະການຂົນສົ່ງແຫ່ງຊາດສະບັບປັບປຸງ, ຮ່າງດໍາລັດວ່າດ້ວຍການຈັດຕັ້ງ ແລະ ການເຄື່ອນໄຫວຂອງດ່ານສາກົນທາງບົກ ແລະ ຮ່າງຂໍ້ຕົກລົງວ່າດ້ວຍມາດຕະຖານເຕັກນິກຂອງດ່ານສາກົນທາງບົກ, ຮ່າງດໍາລັດວ່າດ້ວຍການປົກປ້ອງເງິນຝາກ, ຮ່າງຂໍ້ຕົກລົງວ່າດ້ວຍການຈັດຕັ້ງ ແລະ ການເຄື່ອນໄຫວຂອງຄະນະກໍາມະການສົ່ງເສີມ ແລະ ຄຸ້ມຄອງການລົງທຶນ ແລະ ຂໍ້ຕົກລົງວ່າດ້ວຍການຈັດຕັ້ງ ແລະ ການເຄື່ອນໄຫວຂອງຫ້ອງການບໍລິການລົງທຶນປະຕູດຽວຂັ້ນສູນກາງ ແລະ ຂັ້ນແຂວງ. ນອກຈາກນີ້, ກອງປະຊຸມຍັງໄດ້ຫາລືກ່ຽວກັບແຜນວຽກໃນເດືອນເມສາ, ຊຶ່ງເຫັນວ່າຈະມີຫລາຍເຫດການສໍາຄັນຄື: ກອງປະຊຸມຄະນະບໍລິຫານງານສູນກາງພັກຄັ້ງທີ 4 ສະໄໝທີ X, ບຸນປີໃໝ່ລາວ, ກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ແລະ ວຽກງານອື່ນໆ. ໂດຍທ່ານນາຍົກໄດ້ຊີ້ນໍາໃຫ້ສະມາຊິກລັດຖະບານຈົ່ງນໍາເອົາເນື້ອໃນ ກອງປະຊຸມຄັ້ງນີ້ໄປຈັດຕັ້ງຜັນຂະຫຍາຍໃຫ້ມີປະສິດທິຜົນ, ໂດຍສະເພາະສືບຕໍ່ວຽກງານຮັກສາຄວາມສະຫງົບ ແລະ ຄວາມເປັນລະບຽບຮຽບຮ້ອຍຂອງສັງຄົມ ເປັນຕົ້ນ: ບັນຫາຢາເສບຕິດ, ຂີ້ລັກງັດແງະ, ຄວາມບໍ່ສະຫງົບອື່ນໆ, ສືບຕໍ່ປັບປຸງບົດລາຍງານຜົນການຈັດຕັ້ງປະຕິບັດວຽກງານຈຸດສຸມຂອງລັດຖະບານໃນໄລຍະ 6 ເດືອນຜ່ານມາ ແລະ ທິດທາງແຜນການໃນຕໍ່ໜ້າ, ການຄຸ້ມຄອງ ແລະ ພັດທະນາທີ່ດິນໃນໄລຍະໃໝ່ ແລະ ນະໂຍບາຍສົ່ງເສີມທຸລະກິດຂະໜາດນ້ອຍ ແລະ ກາງທີ່ຈະນໍາໄປຜ່ານກອງປະຊຸມຄະນະບໍລິຫານງານສູນກາງພັກຄັ້ງທີ 4 ສະໄໝທີ X ໃຫ້ມີຄວາມຈະແຈ້ງ, ຊັດເຈນ, ສ່ອງແສງໃຫ້ເຫັນບັນຫາຮອບດ້ານ, ພາວະວິໃສ ແລະ ແທດຕົວຈິງ. ຂະນະດຽວກັນໃຫ້ສຸມໃສ່ແກ້ໄຂບັນຫາເສດຖະກິ, ໂດຍສະເພາະຮີບຮ້ອນຄົ້ນຄ້ວາ ແລະ ຕີລາຄາລວມສະພາບເສດຖະກິດຂອງປະເທດໃນປັດຈຸບັນຢ່າງພາວະວິໃສ, ຈະແຈ້ງ ແລະ ລະອຽດ, ພ້ອມທັງຄົ້ນຄ້ວາມາດຕະການແກ້ໄຂໃຫ້ເປັນລະບົບຄົບຊຸດ, ສໍາຫລວດກວດກາ ແລະ ເກັບກໍາຖານລາຍຮັບຂະໜາດໃຫຍ່, ກາງ ແລະ ນ້ອຍ, ພ້ອມທັງປັບປຸງກົນໄກລະບຽບການໃນການຈັດເກັບລາຍຮັບ ແລະ ຄຸ້ມຄອງລາຍຈ່າຍໃຫ້ຮັດກຸມ ແລະ ມີປະສິດທິຜົນ, ສືບຕໍ່ແກ້ໄຂບັນຫາລັກລອບນໍາເຂົ້າສິນຄ້າທີ່ບໍ່ສອດຄ່ອງຕາມລະບຽບກົດໝາຍ ເຊັ່ນ: ການນໍາເຂົ້ານໍ້າມັນ, ພາຫະນະ, ວັດສະດຸກໍ່ສ້າງ ແລະ ສິນຄ້າອຸປະໂພກ-ບໍລິໂພກອື່ນໆ, ປັບປຸງລະບົບເກັບເງິນຄ່າບິນຜ່ານໃຫ້ຮັດກຸມເພື່ອບໍ່ໃຫ້ລາຍຮັບຮົ່ວໄຫລ, ກວດກາ, ຊຸກຍູ້ ແລະ ອໍານວຍຄວາມສະດວກໃຫ້ແກ່ໂຄງການລົງທຶນຂະໜາດໃຫຍ່ ເຊັ່ນ: ໂຄງການໃນຂົງເຂດພະລັງງານ ແລະ ບໍ່ແຮ່ໃຫ້ເຂົ້າສູ່ຂະບວນການຜະລິດໂດຍໄວ, ປັບປຸງທະນາຄານລັດ ໃຫ້ສາມາດເຄື່ອນໄຫວຢ່າງມີປະສິດທິຜົນ, ໂດຍເລີ່ມຈາກທະນາຄານສົ່ງເສີມກະສິກໍາ ແລະ ສືບຕໍ່ຄົ້ນຄ້ວາປັບປຸງທະນາຄານພັດທະນາລາວ, ຄົ້ນຄວ້າວິທີແກ້ໄຂໜີ້ສິນໂຄງການລົງທຶນຂອງລັດດ້ວຍຮູບການແກ້ໄຂໜີ້ 3 ແຈ, ໂດຍສຸມໃສ່ໂຄງການສໍາຄັນ ແລະ ເປັນບູລິມະສິດຂອງລັດຖະບານກ່ອນ, ລະດົມຂົນຂວາຍທຶນຊ່ວຍເຫລືອລ້າ ແລະ ເງິນກູ້ຢືມດອກເບ້ຍຕໍ່າຈາກຕ່າງປະເທດເຂົ້າໃນແຜນພັດທະນາເສດຖະກິດ-ສັງຄົມ ແລະ ອື່ນໆ.