ພຽງມື້ດຽວ ເຈຟ ເບໂຊ ຜູ້ສ້າງຕັ້ງ Amazon ມີມູນຄ່າຊັບສິນເພີ່ມຂຶ້ນຫລາຍກວ່າ 13.000 ລ້ານໂດລາ
ຍັງເດີນໜ້າກອບໂກຍຄວາມໝັ້ນຄົງຢ່າງຕໍ່ເນື່ອງສຳລັບ ເຈຟ ເບໂຊ ອະພິມະຫາເສດຖີ ແລະ ນັກທຸລະກິດຊາວອາເມລິກາ ອາຍຸ 56 ປີ ເມື່ອຫລ້າສຸດ Bloomberg ໄດ້ອອກມາເປີດເຜີຍຂໍ້ມູນດັດຊະນີຄວາມໝັ້ນຄົງເສດຖີ ‘Bloomberg Billionaires Index’ ແລະ ພົບວ່າວັນທີ 20 ກໍລະກົດ ພຽງມື້ດຽວ ເບໂຊ ມີຊັບສິນເພີ່ມຂຶ້ນສູງກວ່າ 13.000 ລ້ານໂດລາສະຫະລັດ ເຊິ່ງຖືເປັນມູນຄ່າການເພີ່ມຂຶ້ນສູງທີ່ສຸດນັບແຕ່ມີການຈັດອັນດັບໂດຍ Bloomberg ໃນປີ 2012.
ສາເຫດສຳຄັນທີ່ເຮັດໃຫ້ມູນຄ່າຊັບສິນຂອງ ເບໂຊ ເພີ່ມຂຶ້ນແບບກ້າວກະໂດດເປັນຜົນມາຈາກກໍລະນີທີ່ຫຸ້ນຂອງ Amazon ເພີ່ມຂຶ້ນສູງກວ່າ 7,9% ໃນໄລຍະເວລາດຽວກັນ ໂດຍໃນປີ 2020 ນີ້ ຫຸ້ນຂອງ Amazon ໄດ້ເພີ່ມຂຶ້ນຫລາຍກວ່າ 73% ແລ້ວ.
ສົ່ງຜົນໃຫ້ໃນວັນທີ 20 ກໍລະກົດ ເບໂຊ ມີມູນຄ່າຊັບສິນທັງໝົດຫລາຍກວ່າ 189.300 ລ້ານໂດລາສະຫະລັດ ຂຶ້ນຢູ່ອັນດັບໜຶ່ງຂອງດັດຊະນີອະພິມະຫາເສດຖີໂດຍ Bloomberg (ຂໍ້ມູນຫລ້າສຸດໃນວັນທີ 22 ກໍລະກົດ ເບໂຊ ມີມູນຄ່າສິນຊັບລວມທັງໝົດ 186.000 ລ້ານໂດລາສະຫະລັດ).
ຂໍ້ມູນທີ່ໜ້າສົນໃຈຈາກ Times ຍັງບອກອີກວ່າ: ຈາກຕົວເລກມູນຄ່າສິນຊັບສ່ວນຕົວທີ່ສູງຂະໜາດນີ້ ຈຶ່ງສົ່ງຜົນໃຫ້ ເບໂຊ ມີສິນຊັບທີ່ຫລາຍກວ່າມູນຄ່າ Market Cap ຂອງບໍລິສັດເອກະຊົນຊື່ດັງຢູ່ອາເມລິກາຄື: Exxon Mobil Corp., Nike Inc. ແລະ McDonald’s Corp. ໄປແລ້ວ.
