ປກສ ນະຄອນຫລວງຈັບຂະບວນການຄ້າຢາເສບຕິດອັນຕະລາຍມາດໍາເນີນຄະດີ

ເມື່ອບໍ່ດົນມານີ້, ເຈົ້າໜ້າທີ່ ປກສ ນະຄອນຫລວງວຽງຈັນ, ໄດ້ນຳກຳລັງເຂົ້າມ້າງເປົ້າໝາຍຄ້າຂາຍຢາເສບຕິດອັນຕະລາຍຢູ່ບ້ານຈັນສະຫວ່າງ, ເມືອງສີໂຄດຕະບອງ, ສາມາດຈັບຕົວທ້າວ ສຸດໃຈ (ສິງ) ອາຍຸ 28 ປີ ແລະ ພາຍຫລັງເອົາຕົວມາສືບສວນ-ສອບສວນ, ເຈົ້າໜ້າທີ່ສາມາດນໍາຈັບຜູ້ຮ່ວມຂະບວນມາໄດ້ຕື່ມອີກຄື: ທ້າວ ອາໂນສັກ (ນົນ) ອາຍຸ 45 ປີຢູ່ບ້ານໜອງດ້ວງໃຕ້, ເມືອງສີໂຄດຕະບອງ, ພ້ອມຂອງກາງຢາບ້າ 1.400 ກວ່າເມັດ, ທ້າວ ຄຳສຸກ ອາຍຸ 22 ປີ ແລະ ທ້າວ ສຸບັນດິດ ອາຍຸ 33 ປີພັກເຊົາຢູ່ບ້ານທ່າພະລານໄຊ,  ເມືອງສີສັດຕະນາກ, ພ້ອມຂອງກາງຢາບ້າຫລາຍກວ່າ 7.800 ເມັດ. ຈຶ່ງໄດ້ຍຶດໄວ້ເປັນຫລັກຖານເພື່ອດໍາເນີນຄະດີຕາມລະບຽບກົດໝາຍ.

ເຈົ້າໜ້າທີ່ ໃຫ້ຮູ້ວ່າ: ພວກເຂົາແມ່ນຂະບວນການຄ້າຢາເສບຕິດຕົວອັນຕະລາຍໃນຕົວເມືອງທີ່ເຈົ້າໜ້າທີ່ໄດ້ຕິດຕາມການເຄື່ອນໄຫວມາດົນແລ້ວ ແລະ ພາຍຫລັງມີພົນລະເມືອງດີແຈ້ງໃຫ້ຊາບວ່າ: ຈະມີການເຄື່ອນໄຫວຊື້-ຂາຍຢາເສບຕິດຂອງພວກເຂົາຈຶ່ງໄດ້ນໍາກໍາລັງເຂົ້າຈັບຕົວມາດໍາເນີນຄະດີຕາມລະບຽບກົດໝາຍ ແລະ ຍັງຈະຂະຫຍາຍຜົນຫາຜູ້ຮ່ວມຂະບວນການຕື່ມອີກເພື່ອຈັບຕົວມາດໍາເນີນຄະດີໂດຍໄວ.