ລັດຖະມົນຕີຕ່າງປະເທດລາວສຳເລັດການຢ້ຽມຢາມສາທາລະນະລັດອາແຊັກໄບຊານ ຢ່າງເປັນທາງການ

ໂດຍຕອບສະໜອງຕາມຄໍາເຊີນຂອງທ່ານ ເອນມາ ເມັມມາເດຍຣົບ (Elmar Mammadyarov),ລັດຖະມົນຕີກະຊວງການຕ່າງປະເທດ ແຫ່ງ ສາທາລະນະລັດ ອາແຊັກໄບຊານ, ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ແລະ ຄະນະ ໄດ້ເດີນທາງໄປຢ້ຽມຢາມ ສາທາລະນະລັດ ອາແຊັກໄບຊານ ຢ່າງເປັນທາງການ ໃນວັນທີ 18-20 ມິຖຸນານີ້, ເຊິ່ງເປັນການຢ້ຽມຢາມຄັ້ງທໍາອິດຂອງຄະນະຜູ້ແທນລະດັບສູງລະຫວ່າງສອງຝ່າຍ ນັບແຕ່ສ້າງຕັ້ງສາຍພົວພັນການທູດນຳກັນເປັນຕົ້ນມາ.

ການພົບປະສອງຝ່າຍຢ່າງເປັນທາງການ ລະຫວ່າງ ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ກັບ ທ່ານ ເອນມາ ເມັມມາເດຍຣົບ, ລັດຖະມົນຕີຕ່າງປະເທດ ສ. ອາແຊັກໄບຊານ, ໄດ້ມີຂຶ້ນໃນວັນທີ 19 ມີຖຸນາຜ່ານມານີ້, ໂດຍທັງສອງຝ່າຍ ໄດ້ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືທີ່ເປັນມູນເຊື້ອອັນດີງາມຂອງສອງປະເທດ ນັບຕັ້ງແຕ່ໄດ້ສ້າງຕັ້ງສາຍພົວພັນການທູດນຳກັນ ໃນວັນທີ 22 ພຶດສະພາ 1995 ແລະ ການຢ້ຽມຢາມຂອງຄະນະຜູ້ແທນຂັ້ນສູງຂອງ ສປປ ລາວຄັ້ງນີ້ ເປັນນິມິດໝາຍອັນດີໃນການຊຸກຍູ້ເພີ່ມທະວີການພົວພັນຮ່ວມມືສອງຝ່າຍໃຫ້ຫຼາຍຂຶ້ນບົນພື້ນຖານຄວາມເຊື່ອໝັ້ນ, ຄວາມເຂົ້າອົກເຂົ້າໃຈ, ຕ່າງຝ່າຍຕ່າງໄດ້ຮັບຜົນປະໂຫຍດຫຼາຍຂຶ້ນ ພ້ອມທັງໃຫ້ການສະໜັບສະໜູນຊ່ວຍເຫລືອຊຶ່ງກັນ ແລະ ກັນ ທັງໃນຂອບສອງຝ່າຍ ແລະ ຫຼາຍຝ່າຍ ໃນເວທີພາກພື້ນ ແລະ ສາກົນ. ພ້ອມກັນນັ້ນ, ສອງຝ່າຍໄດ້ເຫັນດີຈະສືບຕໍ່ຊຸກຍູ້ການແລກປ່ຽນການຢ້ຽມຢາມ ຊຶ່ງກັນ ແລະ ກັນ ໃນທຸກລະດັບ ເພື່ອປຶກສາຫາລື, ຖອດຖອນບົດຮຽນ ແລະ ຊຸກຍູ້ການຮ່ວມມືສອງຝ່າຍທີ່ມີມາແລ້ວນັ້ນ ໃຫ້ມີປະສິດທິຜົນສູງຂຶ້ນ, ໂດຍສະເພາະ ເພີ່ມທະວີການຮ່ວມມືໃນຂົງເຂດ ເສດຖະກິດ-ການຄ້າ, ການລົງທຶນ, ພະລັງງານ, ບໍ່ແຮ່, ກະສິກຳ, ອຸດສາຫະກຳປຸງແຕ່ງ, ການສຶກສາ, ການທ່ອງທ່ຽວ ແລະ ດ້ານອື່ນໆ ທີ່ສອງຝ່າຍມີທ່າແຮງ ແລະ ມີຄວາມສົນໃຈຮ່ວມກັນ. ພ້ອມນີ້ສອງຝ່າຍ ໄດ້ແຈ້ງສະພາບການໂດຍຫຍໍ້ທາງດ້ານເສດຖະກິດ-ສັງຄົມ ແລະ ແລກປ່ຽນຄຳເຫັນກ່ຽວກັບບັນຫາພາກພື້ນ ແລະ ສາກົນ ທີ່ສອງຝ່າຍມີຄວາມສົນໃຈ.

ໃນໂອກາດດັ່ງກ່າວ, ທ່ານ ສະເຫຼີມໄຊ ກົມມະສິດ ໄດ້ຕາງໜ້າໃຫ້ລັດຖະບານລາວ ສະແດງຄວາມຂອບໃຈ ຕໍ່ການຊ່ວຍເຫຼືອໃຫ້ທຶນການສຶກສາ ແກ່ນັກສຶກສາລາວຈຳນວນຫຼາຍຂອງລັດຖະບານ ອາແຊກໄບຊານ ໃນສະໄໝອະດີດ ສະຫະພາບ ໂຊວຽດ, ຊຶ່ງອະດີດນັກສຶກສາທີ່ຮຽນຈົບມາຈາກອາແຊັກໄບຊານໃນເມື່ອກ່ອນ       ບາງທ່ານກໍໄດ້ກາຍເປັນການນຳ ແລະ ມີຕຳແໜ່ງສູງຢູ່ໃນກົງຈັກລັດຖະບານລາວປັດຈຸບັນ. ພ້ອມໄດ້ສະເໜີໃຫ້ລັດຖະບານອາແຊັກໄບຊານ ສືບຕໍ່ໃຫ້ການຊ່ວຍເຫຼືອໃນການສ້າງຊັບພະຍາກອນມະນຸດ ກໍ່ຄືໃຫ້ທຶນການສຶກສາ, ຝຶກອົບຮົມ ຫຼື ການໄປທັດສະນະສຶກສາໄລຍະສັ້ນ ທີ່ອາແຊັກ ໄບຊານ ໃຫ້ແກ່  ສປປ ລາວ ແລະ ສະເໜີໃຫ້ທັງສອງຝ່າຍປຶກສາຫາລືກັນ ກ່ຽວກັບ ຄວາມເປັນໄປໄດ້ໃນການກໍ່ສ້າງໂຮງກັ່ນນ້ຳມັນຢູ່ ສປປ ລາວ, ຊຶ່ງຈະເປັນການສ້າງຜົນປະໂຫຍດຢ່າງຫຼວງຫຼາຍ ໃຫ້ແກ່ສອງປະເທດ.

ໃນຂະນະດຽວກັນ, ຝ່າຍອາເຊັກໄບຊານ ກໍ່ໄດ້ສະແດງຄວາມຍິນດີ ຈະສືບຕໍ່ຊຸກຍູ້ໃຫ້ມີການຮ່ວມມືກັນໃນດ້ານເສດຖະກິດໃຫ້ຫຼາຍຂຶ້ນ ແລະ ຈະສືບຕໍ່ໃຫ້ທຶນການສຶກສາແກ່ ສປປ ລາວ, ພ້ອມທັງໄດ້ສະເໜີໃຫ້ມີການສົ່ງເສີມສາຍພົວພັນຮ່ວມມືລະຫວ່າງ ສະພາຂອງສອງປະເທດ ໄປຄຽງຄູ່ກັບການສ້າງຕັ້ງກຸ່ມມິດຕະພາບ ປະຈຳ ລັດຖະສະພາຂອງກັນ ແລະ ກັນ.

ໃນໂອກາດດັ່ງກ່າວ, ສອງຝ່າຍ ໄດ້ເຊັນສັນຍາຍົກເວັ້ນວີຊາການທູດ ລະຫວ່າງສອງປະເທດນຳກັນ, ເຊິ່ງຈະມີຜົນບັງຄັບໃຊ້ໄດ້ ພາຍຫຼັງສາມສິບວັນ ທີ່ສອງຝ່າຍໄດ້ແຈ້ງໃຫ້ກັນຊາບ.

ໃນໂອກາດນີ້, ທ່ານ ສະເຫຼີມໄຊ ກົມມະສິດ ພ້ອມດ້ວຍຄະນະ ກໍ່ໄດ້ເຂົ້າຢ້ຽມຂ່ຳນັບ ບັນດາການນຳຂັ້ນສູງຂອງອາແຊັກໄບຊານ ຄື: ພະນະທ່ານ ອິນຮາມ ອາລີເຢບ (Ilham Aliyev), ປະທານາທິບໍດີ ແຫ່ງ ສ. ອາແຊັກໄບຊານ; ພະນະທ່ານ ອັອກໄຕ ອາຊາດົບ (Ogtay Asadov), ປະທານສະພາແຫ່ງຊາດ; ແລະ ພະນະທ່ານ ອາຕູ ຣາຊີຊາເດ (Artur Rasizade), ນາຍົກລັດຖະມົນຕີ ແຫ່ງ   ສ. ອາແຊັກໄບຊານ ແລະ ພ້ອມນີ້ ທ່ານລັດຖະມົນຕີ ສະເຫຼີມໄຊ ກົມມະສິດ ໄດ້ເຊື້ອເຊີນຄູ່ຮ່ວມຕຳແໜ່ງ ດຳເນີນການຢ້ຽມຢາມ ສປປ ລາວ ຢ່າງເປັນທາງການ ໃນໂອກາດ ແລະ ເວລາທີ່ເຫັນວ່າສະດວກເໝາະສົມ.