ລັດເຊຍຈະໃຫ້ປະຊາຊົນນຳໃຊ້ດິນຢູ່ຂົ້ວໂລກເໜືອໂດຍບໍ່ເສຍຄ່າ

ສຳນັກຂ່າວ Reuters ໃຫ້ຮູ້ວ່າ: ກະຊວງຊັບພະຍາກອນລັດເຊຍ ໄດ້ຮ່າງ ແລະ ປະກາດໃຊ້ກົດໝາຍວ່າດ້ວຍທີ່ດິນຢູ່ຂົ້ວໂລກເໜືອ, ໃນນັ້ນມີໂຄງການອະນຸຍາດໃຫ້ປະຊາຊົນທີ່ດຳລົງຊີວິດຢູ່ຂົ້ວໂລກເໜືອສາມາດມີສິດນຳໃຊ້ທີ່ດິນໂດຍບໍ່ເສຍຄ່າໄດ້ 1 ເຮັກຕາ ເພື່ອປຸກເຮືອນຢູ່ ແລະ ນຳໃຊ້ເຂົ້າໃນການດຳເນີນທຸລະກິດເຊັ່ນ: ການທ່ອງທ່ຽວ ແລະ ອື່ນໆ.

ກະຊວງຊັບພະຍາກອນ ໃຫ້ຮູ້ວ່າ: ພາຍຫຼັງ 6 ເດືອນ, ໂຄງການດັ່ງກ່າວຈະໄດ້ເປີດກວ້າງໃຫ້ປະຊາຊົນລັດເຊຍມີສິດນຳໃຊ້ໄດ້. ກົດໝາຍສະບັບນີ້ຕ້ອງໄດ້ຜ່ານສະພາແຫ່ງຊາດເພື່ອລົງຄະແນນສຽງ, ຫຼັງຈາກນັ້ນປະທານາທິບໍດີຈະອອກລັດຖະດຳລັດນຳໃຊ້ຢ່າງເປັນທາງການ.

ລັດຖະບານລັດເຊຍເຄີຍອອກໂຄງການແບບນີ້ໃຫ້ປະຊາຊົນທີ່ດຳລົງຊີວິດຢູ່ທາງພາກຕາເວັນອອກໄກມາແລ້ວໃນປີ 2016 ຈຸດປະສົງແມ່ນແນໃສ່ລະດົມໃຫ້ປະຊາຊົນໄປໃຊ້ຊີວິດຢູ່ໃນເຂດດັ່ງກ່າວເພື່ອພັດທະນາເສດຖະກິດ ແລະ ດ້ານໜຶ່ງອີກ ກໍເພື່ອຂະຫຍາຍປະຊາກອນຢູ່ໃນເຂດນີ້ໃຫ້ຫຼາຍຂຶ້ນ ເພາະຜ່ານມາປະຊາກອນມີທ່າອ່ຽງຫຼຸດລົງ.

ມີປະມານ 90% ຂອງຈຳນວນປະຊາກອນ 2,5 ລ້ານຄົນທີ່ດຳລົງຊີວິດຢູ່ໃນຕົວເມືອງໃຫ່ຍເຊັ່ນ: Murmansk, Norilsk ແລະ Arkhangelsk ໃນຂົ້ວໂລກເໜືອໃນປັດຈຸບັນ.

ປັດຈຸບັນປະທານາທິບໍດີ ປູຕີນ ໄດ້ມີນະໂຍບາຍພັດທະນາເຂດຂົ້ວໂລກເໜືອ, ສ້າງພື້ນຖານໂຄງລ່າງ, ເພີ່ມທະວີການມີໜ້າຂອງທະຫານ ແລະ ກ້າວໄປເຖິງການສ້າງເສັ້ນທາງຂົນສົ່ງທີ່ສຳຄັນຂອງລັດເຊຍ.

ຂ່າວ: ລູກເມືອງພວນ