ປິດສາກ..! ຣາຊັນຊຸດຂາວຄວ້າແຊ້ມລາລີກາເເອັດສະປາຍສະໄໝທີ 34

ເຣອັນ ມາດຣິດ ຄວ້າແຊ້ມລາລີກາແອັດສະປາຍສະໄໝທີ 34 ຫຼັງຈາກເອົາຊະນະ ບີຍາເຣອັນ 2-1 ໃນເກມນັດຮອງສຸດທ້າຍຂອງລີກ, ພ້ອມຄວ້າໄຊຕໍ່ເນື່ອງເປັນເກມທີ 10 ຕິດຕໍ່ກັນ ໂດຍຄັ້ງຫຼ້າສຸດທີ່ຄວ້າແຊ້ມລາລີກາແອັດສະປາຍເເມ່ນເມື່ອລະດູການ 2016-2017 ຂະນະທີ່ລະດູການນີ້ເຫຼືອການແຂ່ງຂັນຂັນອີກ 1 ນັດ.

ພ້ອມດຽວກັນນັ້ນ ຊີເນດິນ ຊີດານ ຫົວໜ້າຄູຝຶກຂອງຣາຊັນຊຸດຂາວ ໄດ້ໃຫ້ສຳພາດຕໍ່ສື່ມວນຊົນວ່າ: “ການທີ່ທີມຂອງພວກເຮົາຄວ້າແຊ້ມລາລີກາແອັດສະປາຍໄດ້ນັ້ນ ພິສູດໄດ້ຊັດເຈນແລ້ວວ່າທີມຂອງພວກເຮົາຄືທີມທີ່ດີທີ່ສຸດໃນລະດູການນີ້, ມື້ນີ້ເປັນອີກໜຶ່ງ​ມື້ທີ່ດີທີ່ສຸດໃນອາຊີບການເປັນຄູຝຶກ ມັນເປັນຄວາມສຳເລັດທີ່ຍິ່ງໃຫຍ່ຫຼາຍ, ຫຼັງຈາກເຮົາໄດ້ຢຸດໄປ 3 ເດືອນເພາະການລະບາດຂອງເຊື້ອໄວຣັສໂຄວິດ-19 ແລະ ເຮົາສາມາດກັບມາຄວ້າແຊ້ມໄດ້, ແຕ່ຂ້າພະເຈົ້າໝັ້ນໃຈວ່າແຟນບານກຳລັງມີຄວາມສຸກ ແລະ ຮ່ວມສະຫຼອງແຊ້ມກັນຢູ່​ເຮືອນຕົນເອງ”  ຊີນາດິນ ຊີດານ ກ່າວ.