3 ປະເທດອາຊຽນເລີ່ມລາດຕະເວນທາງທະເລຮ່ວມກັນ
ອິນໂດເນເຊຍ, ມາເລເຊຍ ແລະ ຟີລິບປິນ ເລີ່ມປະຕິບັດການລາດຕະເວນທາງທະເລຮ່ວມກັນ ເພື່ອເພີ່ມການຮ່ວມມືໃນການ ປ້ອງກັນ ແລະ ປາບປາມກຸ່ມຫົວຮຸນແຮງຢູ່ອາຊີຕາເວັນອອກສຽງໃຕ້.
ສຳນັກຂ່າວຕ່າງປະເທດລາຍງານຈາກນະຄອນຫລວງຈາກາຕາ ປະເທດອິນໂດເນເຊຍ ໃນວັນທີ 20 ມິຖຸນານີ້ວ່າ: ທ່ານ ເດລ ຟິນ ລໍເຣນຊານາ ລັດຖະມົນຕີປ້ອງກັນປະເທດຟີລິບປິນ, ທ່ານ ໄຣອາມິຊາດ ໄຣອາຊູດູ ລັດຖະມົນຕີປ້ອງກັນປະເທດອິນໂດເນເຊຍ ແລະ ທ່ານ ຮິຊາມມຸດດິນ ຮຸສເຊັນ ລັດຖະມົນຕີປ້ອງກັນປະເທດມາເລເຊຍ ເປັນປະທານຮ່ວມກັນໃນພິທີເປີດປະຕິບັດການລາດ ຕະເວນທາງທະເລແບບໄຕພາຄີ ຢູ່ເມືອງຕາຣາກັນ ທາງຕອນເໜືອຂອງເກາະບໍນຽວ ໃນວັນທີ 19 ມິຖຸນາ.
+ ມາເລເຊຍ, ອິນໂດເນເຊຍ ແລະ ຟີລິບປິນ ຈະຮ່ວມກັນລາດຕະເວນນອກເກາະມິນດາເນົາ
+ ອິນໂດເນເຊຍຈັບກຸມຊາຍພົວພັນເຫດຄວາມບໍ່ສະຫງົບຢູ່ຟີລິບປິນ
ໃນວັນດຽວກັນ, ກອງທັບຂອງທັງສາມປະເທດໄດ້ເປີດສູນບັນຊາການທາງທະເລຮ່ວມກັນ ຢູ່ເມືອງຕາເວົາ ໃນລັດຊບາ ເກາະບໍ ນຽວເບື້ອງມາເລເຊຍ ແລະ ເມືອງບອງເກົາ ຢູ່ຟີລິບປິນ ສຳລັບແລກປ່ຽນ ແລະ ແບ່ງປັນຂໍ້ມູນດ້ານຄວາມໝັ້ນຄົງກ່ຽວກັບເສັ້ນ ທາງແລ່ນເຮືອ ແລະ ການເຄື່ອນໄຫວອື່ນທີ່ສຳຄັນ ເພື່ອເປັນການຍົກລະດັບປະສິດທິພາບໃນການກວດສອບການເຄື່ອນໄຫວຂອງ ກຸ່ມຫົວຮຸນແຮງໃນພື້ນທີ່ ໂດຍສະເພາະກຸ່ມອາບູໄຊຍາບ ເຊິ່ງມີຖານທີ່ໝັ້ນຢູ່ພາກໃຕ້ຟີລິບປິນ ແລະ ເພື່ອປ້ອງກັນເຫດຮ້າຍທີ່ ອາດຈະເກີດຂຶ້ນກັບເຮືອປະມົງ ແລະ ເຮືອຂອງນັກທ່ອງທ່ຽວ ບໍ່ວ່າຈະເປັນການປຸ້ນຈີ້ ຫລື ລັກພາຕົວ. ນອກຈາກນີ້ ລັດຖະບານ ອິນໂດເນເຊຍ, ຟີລິບປິນ ແລະ ມາເລເຊຍ ຍັງຂໍການຮ່ວມມືຈາກຊາວປະມົງໃນພື້ນທີ່ໃຫ້ລາຍງານຕໍ່ເຈົ້າໜ້າທີ່ທັນທີ ຖ້າພົບການ ເຄື່ອນໄຫວຂອງກຸ່ມຄົນຕ້ອງສົງໄສ.
ການເພີ່ມການຮ່ວມມືດ້ານຄວາມໝັ້ນຄົງລະຫວ່າງທັງສາມປະເທດຢູ່ອາຊີຕາເວັນອອກສຽງໃຕ້ ທີ່ມີຊາຍແດນທາງທະເລ ເຊື່ອມຕໍ່ກັນ ເກີດຂຶ້ນໃນຂະນະທີ່ກອງທັບຟີລິບປິນຍັງສູ້ຮົບກັບກຸ່ມກະບົດເມົາເຕ ເຊິ່ງເປັນແນວຮ່ວມຂອງກຸ່ມ IS ຢູ່ເມືອງມາລາ ວີ ເກາະມິນດາເນົາ ໂດຍມີຜູ້ເສຍຊີວິດແລ້ວຫລາຍກວ່າ 300 ຄົນ ນັບແຕ່ການຕໍ່ສູ້ເກີດຂຶ້ນໃນທ້າຍເດືອນພຶດສະພາຜ່ານມາ ແລະ ເມືອງມາລາວີຕັ້ງຢູ່ຫ່າງຈາກແຂວງກາລິມັນຕັນ ຫ່າງຈາກອິນໂດເນເຊຍປະມານ 750 ກິໂລແມັດ.
