ຢ່າໃຫ້ເປັນຫົວຊ້າງຫາງໜູ

ເພື່ອນຜູ້ອ່ານຫລາຍຄົນກໍຄົງຈະດີໃຈ ເມື່ອຄວາມແອອັດສັບສົນຢູ່ເຂດເສັ້ນທາງໃນບໍລິເວນຕະຫລາດເຊົ້າ ແລະ ຕະຫລາດຂົວ ດິນ ນະຄອນຫລວງວຽງຈັນ ອັນເປັນພະຍາດຊຳເຮື້ອມານັ້ນ, ມາໃນວັນທີ 20 ມິຖຸນານີ້ ແມ່ນໄດ້ຮັບການແກ້ໄຂຢ່າງເດັດຂາດຈາກ ພະແນກໂຍທາທິການ ແລະ ຂົນສົ່ງ, ເຈົ້າໜ້າທີ່ຈະລາຈອນເມືອງສີສັດຕະນາກໄດ້ເອົາໃຈໃສ່ຈັດສັນຄວາມເປັນລະບຽບຮຽບຮ້ອຍ ໃນບໍລິເວນດັ່ງກ່າວ ເຊິ່ງເບື້ອງຕະຫລາດເຊົ້າແມ່ນໄດ້ຈັດສັນ ນັບແຕ່ໄຟແດງທາດຝຸ່ນລົງມາຫາໄຟແດງຕະຫລາດຂົວດິນແລ້ວ ອ້ອມລົງມາໃສ່ເສັ້ນທາງຄູວຽງໄປຈົນຮອດສູນການຄ້າວຽງຈັນເຊັນເຕີ ແລະ ພິເສດແມ່ນທາງຄະນະຈັດສັນດັ່ງກ່າວໄດ້ສັ່ງໃຫ້ຜູ້ ຝາກລົດຢູ່ບໍລິເວນເສັ້ນທາງນີ້ຢຸດເຊົາການເຮັດກິດຈະການຝາກລົດທີ່ເປັນອຸປະສັກກີດຂວາງການສັນຈອນໄປມານັ້ນໂດຍໄວ ແລະ ເພື່ອແກ້ໄຂບ່ອນຈອດລົດໃຫ້ມີຄວາມສະຫງົບປອດໄພນັ້ນ, ທ່ານຫົວໜ້າຫ້ອງການໂຍທາທິການ ແລະ ຂົນສົ່ງ ເມືອງສີ ສັດຕະນາກ ໃຫ້ຮູ້ວ່າ: ຫ້ອງການຂອງຕົນໄດ້ມີການຈັດສັນສະຖານທີ່ຈອດລົດໄວ້ 3 ບ່ອນຄື: ຈຸດທີໜຶ່ງຢູ່ຊອບປິງມໍ (ຕະຫລາດ ເຊົ້າ), ຈຸດທີສອງແມ່ນຢູ່ດ້ານຫລັງຕະຫລາດຂົວດິນ ແລະ ຈຸດທີສາມແມ່ນຢູ່ສູນການຄ້າວຽງຈັນເຊັນເຕີ ເຊິ່ງສະຖານທີ່ດັ່ງກ່າວຈະ ສາມາດຈອດລົດໄດ້ແຕ່ 200-300 ຄົນ ແລະ ການຈັດສັນນີ້ມີເສັ້ນຕາຍນັບແຕ່ວັນທີ 21 ມິຖຸນານີ້ເປັນຕົ້ນໄປ ຖ້າໃຜລະເມີດຄືຍັງ ສືບຕໍ່ຂາຍເຄື່ອງ ແລະ ຈອດລົດຊະຊາຍໃນບໍລິເວນດັ່ງກ່າວແມ່ນຈະດຳເນີນມາດຕະການປັບໄໝຢ່າງເດັດຂາດ ໂດຍໄດ້ກຳນົດ ຫ້າມຈອດລົດໃນບໍລິເວນນັ້ນນັບແຕ່ 6:00 ໂມງໄປຮອດ 19:00 ໂມງຂອງທຸກໆວັນ.

ນີ້ເປັນມາດຕະການເດັດຂາດ ເພື່ອຈັດສັນຕົວເມືອງນະຄອນຫລວງວຽງຈັນໃຫ້ມີຄວາມເປັນລະບຽບຮຽບຮ້ອຍ ແລະ ສະອາດ ຈົບງາມແມ່ນເປັນສິ່ງພາກພູມໃຈ ແລະ ໜ້າຊົມເຊີຍ ເພາະນັບແຕ່ສະໄໝນະຄອນຫລວງວຽງຈັນ ກໍຄືລາວເຮົາໄດ້ເປັນເຈົ້າພາບ ຈັດງານມະຫະກຳກິລາຊີເກມຄັ້ງທີ 25 ປີ 2009 ຜ່ານມາ ຈົນຮອດປັດຈຸບັນ ນະຄອນຫລວງວຽງຈັນຈຶ່ງມີມາດຕະການເຂັ້ມງວດໃນ ການຈັດສັນຄວາມເປັນລະບຽບຮຽບຮ້ອຍດັ່ງກ່າວ. ແຕ່ເຖິງຢ່າງໃດ ກໍຂໍຢ່າໃຫ້ເປັນດັ່ງຫົວຊ້າງຫາງໜູ ແລະ ຍັງມີຫລາຍບ່ອນ ອື່ນໆອີກກໍຂໍໃຫ້ພາກສ່ວນກ່ຽວຂ້ອງມີມາດຕະການແກ້ໄຂໃຫ້ເດັດຂາດ ດັ່ງເສັ້ນທາງບໍລິເວນຕໍ່ໜ້າສະຖານີໄຟຟ້າໂພນຕ້ອງໄປ ຈົນຮອດຕໍ່ໜ້າໂຮງໝໍ 150 ຕຽງ ກໍລ້ວນແລ້ວແຕ່ມີການນຳໃຊ້ແຄມທາງຍ່າງເປັນບ່ອນຂາຍເຄື່ອງ ແລະ ເຮັດບໍລິການຕ່າງໆທີ່ ສົ່ງຜົນໃຫ້ການສັນຈອນໄປມາໃນບໍລິເວນດັ່ງກ່າວແອອັດ ແລະ ຂາດຄວາມເປັນລະບຽບຮຽບຮ້ອຍນັ້ນໃຫ້ໝົດໄປ ສ້າງນະຄອນ ຫລວງວຽງຈັນມີຄວາມສີວິໄລ ແລະ ເປັນຕາໜ້າຢູ່.