ຮອງນາຍົກເຂົ້າຮ່ວມພິທີປະກາດແຕ່ງຕັ້ງວ່າການ ຫົວໜ້າພະແນກການເງິນແຂວງສະຫວັນນະເຂດ
ໃນວັນທີ 9 ກໍລະກົດນີ້, ທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ ໄດ້ລົງເຄື່ອນໄຫວຊຸກຍູ້ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນເຈັດກັບລາຍຮັບເຂົ້າງົບປະມານ ຢູ່ແຂວງສະຫວັນນະເຂດ ແລະ ໄດ້ເຂົ້າຮ່ວມພິທີປະກາດແຕ່ງຕັ້ງທ່ານ ແສນສັກ ສຸລິສັກ ຂຶ້ນເປັນວ່າການຫົວໜ້າພະແນກການເງິນແຂວງສະຫວັນນະເຂດຜູ້ໃໝ່ ແລະ ໄດ້ຮັບຟັງລາຍງານຈາກຜູ້ຮັກສາການຫົວໜ້າພະແນກການເງິນແຂວງຜູ້ເກົ່າ ໃຫ້ຮູ້ວ່າ: ເນື່ອງຈາກສະພາບການແຜ່ລະບາດຂອງພະຍາດໂຄວິດ-19 ໄດ້ກະທົບຢ່າງໜັກໜ່ວງ ແລະ ເຮັດໃຫ້ການເກັບລາຍຮັບເຂົ້າງົບປະມານບໍ່ໄປຕາມແຜນທີ່ວາງໄວ້ ແລະ ມັນໄດ້ສົ່ງຜົນສະທ້ອນຕໍ່ການຈັດຕັ້ງປະຕິບັດແຜນລາຍຈ່າຍຢູ່ໃນລະດັບສູງສົມຄວນ ເຊິ່ງໃນ 6 ເດືອນຕົ້ນປີນີ້ ແຂວງສາມາດຈັດເກັບລາຍຮັບເຂົ້າງົບປະມານໄດ້ພຽງ 622 ຕື້ກວ່າກີບ ເທົ່າກັບ 38,44% ຂອງແຜນການປີ ໃນນີ້ພູດສູນກາງປະຕິບັດໄດ້ 42,93%, ພູດທ້ອງຖິ່ນໄດ້ 33,43% ຂອງແຜນການປີ, ດ້ານລາຍຈ່າຍປະຕິບັດໄດ້ຫລາຍກວ່າ 319 ຕື້ກີບ ເທົ່າກັບ 37,42% ຂອງແຜນການປີ ໂດຍສຸມໃສ່ການເບີກຈ່າຍເງິນເດືອນ ແລະ ເງິນອຸດໜູນທີ່ເປັນບູລິມະສິດ, ຄາດຄະເນລາຍຮັບໝົດປີ 2020 ທົ່ວແຂວງຈະບັນລຸໄດ້ 1.312 ຕື້ກວ່າກີບ ເທົ່າກັບ 81,09% ຂອງແຜນການ.
ໃນໂອກາດນີ້, ທ່ານຮອງນາຍົກກໍໄດ້ໃຫ້ກຽດໂອ້ລົມຊີ້ນຳໃຫ້ແຂວງສະຫວັນນະເຂດສືບຕໍ່ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຕາມແຜນການທີ່ວາງໄວ້ ໂດຍສະເພາະໃຫ້ພ້ອມກັນສຸມໃສ່ການເກັບລາຍຮັບເຂົ້າງົບປະມານໃນ 6 ເດືອນທ້າຍປີໃຫ້ໄດ້ຕາມແຜນການສູ້ຊົນ ແລະ ເອົາໃຈໃສ່ຂຸດຄົ້ນແຫລ່ງລາຍຮັບໃໝ່ທີ່ເປັນພື້ນຖານຕາມທ່າແຮງຂອງທ້ອງຖິ່ນ. ພ້ອມນີ້ກໍເລັ່ງແກ້ໄຂຂອດຫຍຸ້ງຍາກທີ່ກະທົບຕໍ່ການຈັດເກັບລາຍຮັບເຂົ້າງົບປະມານ ເປັນຕົ້ນການເກັບພາສີທີ່ດິນ ແລະ ຄ່າທຳນຽມທາງຜ່ານລະບົບທະນາຄານທີ່ເຫັນວ່າຜ່ານການຈັດຕັ້ງໃນໄລຍະຜ່ານມາແມ່ນພົບຄວາມຫຍຸ້ງຍາກ ແລະ ບໍ່ໄດ້ຮັບຜົນເທົ່າທີ່ຄວນ ໂດຍໃຫ້ພາກສ່ວນກ່ຽວຂ້ອງຕ້ອງໄດ້ສົມທົບກັບທະນາຄານ ເພື່ອຊອກຮູ້ສາເຫດທີ່ແທ້ຈິງຂອງບັນຫາ ແລະ ໃຫ້ພ້ອມກັນແກ້ໄຂຢ່າງຮີບດ່ວນ. ຈາກນີ້ກໍໃຫ້ບ້ານຊ່ວຍໃນການຈັດເກັບລາຍຮັບທັງສອງຢ່າງນີ້ຕື່ມອີກ ໂດຍໃຫ້ປະຕິບັດນະໂຍບາຍຕາມທີ່ໄດ້ຕົກລົງກັນ ແຕ່ສຳຄັນແມ່ນໃຫ້ແຂວງລົງຕິດຕາມ ແລະ ຊຸກຍູ້ເຂົາເຈົ້າຢ່າງຕໍ່ເນື່ອງ.
