ຄະນະສະເພາະກິດດ້ານເສດຖະກິດຫາລືການເລື່ອນເວລາແກ້ໄຂຜົນກະທົບຂອງໂຄວິດ-19
ຄະນະສະເພາະກິດດ້ານເສດຖະກິດ ເພື່ອແກ້ໄຂຜົນກະທົບຈາກການລະບາດຂອງພະຍາດໂຄວິດ-19 ກຳລັງຂຸ້ນຂ້ຽວສຸມໃສ່ຄົ້ນຄວ້າກຳນົດນະໂຍບາຍ ແລະ ມາດຕະການຟື້ນຟູເສດຖະກິດໃນໄລຍະຕໍ່ໜ້າໃຫ້ມີປະສິດທິຜົນ.
ທ່ານ ກິແກ້ວ ຈັນທະບູລີ ຮອງລັດຖະມົນຕີກະຊວງແຜນການ ແລະ ການລົງທຶນ, ຮອງຫົວໜ້າຄະນະສະເພາະກິດດັ່ງກ່າວ ໄດ້ລາຍງານໃນກອງປະຊຸມດັ່ງກ່າວໃນວັນທີ 13 ກໍລະກົດນີ້ວ່າ: ຕາມຂໍ້ຕົກລົງ 31/ນຍ ສ່ວນໃຫຍ່ແມ່ນເນັ້ນໃສ່ແກ້ໄຂບັນຫາເສດຖະກິດສະເພາະໜ້າ ແລະ ຮີບດ່ວນ ເຊິ່ງຍັງບໍ່ແມ່ນນະໂຍບາຍຊ່ວຍຟື້ນຟູເສດຖະກິດຢ່າງຕໍ່ເນື່ອງໃນຕໍ່ໜ້າ ເຊິ່ງນະໂຍບາຍທີ່ກຳນົດອອກສ່ວນໃຫຍ່ແມ່ນກວມເອົາໄລຍະ 3 ເດືອນ (4,5,6) ແລະ ມາຮອດປັດຈຸບັນໄດ້ສິ້ນສຸດໄລຍະການຊ່ວຍອຸດໜູນແລ້ວ ເປັນຕົ້ນນະໂຍບາຍດ້້ານການເງິນ, ນະໂຍບາຍພາກສັງຄົມ ແລະ ປະຊາຊົນ.
ດ້ວຍເຫດນັ້ນ ຄະນະດັ່ງກ່າວຈຶ່ງໄດ້ຕີລາຄາຄືນກ່ຽວກັບຜົນກະທົບຂອງການລະບາດພະຍາດໂຄວິດ-19 ມາຮອດປັດຈຸບັນມີຄືແນວໃດ ເພື່ອເປັນບ່ອນອີງໃນການຕັດສິນຂອງຂະແໜງການວ່າ ຈະສືບຕໍ່ໃຫ້ນະໂຍບາຍທີ່ໄດ້ກຳນົດອອກໄປແລ້ວອອກໄປຕື່ມບໍ່ ຫລື ຈະປ່ຽນຮູບແບບການຊ່ວຍໜູນ ເປັນຕົ້ນແມ່ນ ນະໂຍບາຍຍົກເວັ້ນອາກອນລາຍໄດ້ບຸກຄົນ ແລະ ຈຸນລະວິສາຫະກິດ, ການຫລຸດຄ່າບໍລິການໄຟຟ້າ, ນ້ຳປະປາ, ອິນເຕີເນັດ ແລະ ອື່ນໆ.
ຂະນະດຽວກັນ, ຍັງຈະໄດ້ປຶກສາກ່ຽວກັບນະໂຍບາຍການເລື່ອນຈ່າຍຊຳລະພາສີອາກອນ, ຄ່າທຳນຽມ, ຕົ້ນທຶນ ແລະ ດອກເບ້ຍສິນເຊື່ອ ວ່າຍັງຈະເລື່ອນເວລາອອກໄປຕື່ມອີກບໍ່. ນອກຈາກນັ້ນ, ນະໂຍບາຍຊ່ວຍໜູນບາງຂະແໜງການຜະລິດ ແລະ ບໍລິການທີ່ຍັງໄດ້ຮັບຜົນກະທົບເຊັ່ນ: ຂະແໜງການທ່ອງທ່ຽວ ແລະ ບໍລິການປິ່ນອ້ອມ ຄວນມີການຜ່ອນຜັນເພີ່ມຕື່ມ ຫລື ຟື້ນຟູຄືແນວໃດ. ສະນັ້ນ, ແຕ່ລະໜ່ວຍງານໃນຄະນະສະເພາະກິດດ້ານເສດຖະກິດ ເພື່ອແກ້ໄຂຜົນກະທົບຈາກການລະບາດຂອງພະຍາດໂຄວິດ-19 ຈະໄດ້ສືບຕໍ່ລົງເລິກປະເມີນຄືນຜົນກະທົບຈາກການຜັນຂະຫຍາຍນະໂຍບາຍທີ່ກຳນົດອອກໄປແລ້ວ ແລະ ຄົ້ນຄວ້າລົງເລິກນະໂຍບາຍທີ່ຈະກຳນົດເພີ່ມຕື່ມໃນຕໍ່ໜ້າ.
