ປະທານປະເທດເນັ້ນໃຫ້ກອງພົນທະຫານຮາບທີ 4 ສ້າງຕົນເອງໃຫ້ເຂັ້ມແຂງ ແລະ ທັນສະໄຫມ

ໃນໂອກາດຢ້ຽມຢາມນາຍ ແລະ ພົນທະຫານ ກອງພົນທະຫານຮາບທີ 4 ແຂວງສະຫວັນນະເຂດ ເມື່ອບ່າຍວັນທີ 9 ກໍລະກົດຜ່ານມາມານີ້ທ່ານ ບຸນຍັງ ວໍລະຈິດ ເລຂາທິການໃຫຍ່ ຄະນະບໍລິຫານງານສູນກາງພັກປະຊາຊົນປະຕິວັດລາວ, ປະທານປະເທດ ແຫ່ງ ສປປ ລາວ ໄດ້ໃຫ້ກຽດພົບປະໂອ້ລົມຕໍ່ ກໍາລັງປ້ອງກັນປະເທດ ກອງພົນດັ່ງກ່າວ, ໂດຍທ່ານໄດ້ເນັ້ນໃຫ້ເອົາໃຈໃສ່ສ້າງຕົນເອງໃຫ້ມີຄວາມເຂັ້ມແຂງ ແລະ ທັນສະໄຫມ, ຍຶດໝັ້ນສອງໜ້າທີ່ຍຸດທະສາດຄື:

(ໜັງສືພິມ ລາວພັດທະນາ)

ການປົກປັກຮັກສາ ແລະສ້າງສາພັດທະນາປະເທດຊາດ ພາຍໃຕ້ການຊີ້ນໍາເດັດຂາດໂດຍກົງຮອບດ້ານຂອງພັກ, ເອົາໃຈໃສ່ປັບປຸງກໍ່ສ້າງກໍາລັງປະກອບອາວຸດ-ກໍາລັງປ້ອງກັນຄວາມສະຫງົບ ໃຫ້ມີຄວາມເຂັ້ມແຂງໜັກແໜ້ນ ກາຍເປັນກໍາລັງທີ່ຈົ່ງຮັກພັກດີຕໍ່ປະເທດຊາດ ແລະ ຕໍ່ປະຊາຊົນລາວບັນດາເຜົ່າ ແລະ ຕັ້ງໜ້າກໍ່ສ້າງກໍາລັງໃຫ້ເຕີບໃຫຍ່ເຂັ້ມແຂງທັງດ້ານປະລິມານ ແລະຄຸນະພາບ ຮັບປະກັນໃຫ້ແກ່ການປະຕິບັດໜ້າທີ່ໃນສະເພາະໜ້າ ແລະຍາວນານ, ຄະນະພັກ-ຄະນະບັນຊາ ພະນັກງານສະມາຊິກພັກ-ນັກຮົບ ຈົ່ງໄດ້ພ້ອມກັນເຊີດຊູມານະຈິດປະຕິວັດ ແລະຄວາມຮັບຜິດຊອບຕໍ່ໜ້າທີ່ການເມືອງຂອງຕົນໃນການຮັບໃຊ້ຊາດ, ຮັບໃຊ້ປະຊາຊົນ ເສີມຂະຫຍາຍມູນເຊື້ອທາດແທ້ຂອງກໍາລັງປະກອບອາວຸດປະຕິວັດ ປະຕິບັດຂໍ້ກໍານົດກົດລະບຽບຂອງກອງທັບ-ຂອງກໍາລັງປ້ອງກັນຄວາມສະຫງົບຢ່າງເຂັ້ມງວດ, ມີຄວາມຈົງຮັກພັກດີພໍ່ພັກ-ຕໍ່ປະເທດຊາດ, ມີທາດແທ້ປະຕິວັດ, ມີລະດັບທິດສະດີວິທະຍາສາດ, ເຕັກນິກ, ສີລະປະຢຸດ, ຍຸດທະວິທີ.

ພ້ອມທັງສືບຕໍ່ຫັນກໍາລັງລົງເຮັດໜ້າທີ່ກໍ່ສ້າງຮາກຖານການເມືອງພັດທະນາຊົນນະບົດຮອບດ້ານຢູ່ແຕ່ລະຈຸດສຸມ ກໍຄືເຂດຫ່າງໄກສອກຫຼີກໃນຂອບເຂດຕົນຮັບຜິດຊອບໃຫ້ມີປະສິດທິພາບສູງ, ເຂົ້າຮ່ວມການພັດທະນາທາງດ້ານເສດຖະກິດ-ສັງຄົມ ວັດທະນະທໍາ ແລະກຽມພ້ອມຊ່ວຍເຫຼືອປະຊາຊົນ ໃນທຸກສະຖານະການທີ່ອາດຈະເກີດຂຶ້ນ ໂດຍສະເພາະແມ່ນການສະກັ້ດກັ້ນ ແລະຕ້ານພະຍາດໂຄວິດ-19, ໄພພິບັດທາງທໍາມະຊາດ ທັງໃນຍາມສະຫງົບກໍຄືຍາມສັນຕິພາບ, ກໍາລັງປ້ອງກັນຊາດ-ປ້ອງກັນຄວມສະຫງົບ ຈົ່ງຕັ້ງໜ້າຝຶກຝົນຫຼໍ່ຫຼອມຕົນເອງພາຍໃຕ້ສະພາບການໃໝ່, ຕາມທິດກໍ່ສ້າງກໍາລັງປະກອບອາວຸດ-ກໍາລັງປ້ອງກັນຄວາມສະຫງົບໃຫ້ມີຄວາມເຂັ້ມແຂງໜັກແໜ້ນ ກາຍເປັນກໍາລັງປະກອບອາວຸດປະຕິວັດທີມີແບບແຜນ ແລະທັນສະໄໝ, ເພີ່ມທະວີຄວາມສາມັກຄີເປັນປຶກແຜ່ນສືບຕໍ່ປະຕິບັດແນວທາງປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານຂອງພັກ, ປັກຮັກສາ ແລະສ້າງສາພັດທະນາປະເທດຊາດໃຫ້ນັບມື້ຈະເລີນສີວິໄລ.

(ໜັງສືພິມ ລາວພັດທະນາ)