ກໍາມະການຍິງໜື່ງດຽວໃນປະຫວັດສາດຮ່ວມຕັດສິນລາວລີກ..!
ການແຂ່ງຂັນບານເຕະລີກສູງສຸດຂອງລາວເຮົາ ປີນີ້ມີສີສັນໃໝ່ ເພາະຈະມີກໍາມະການຍິງ 1 ຄົນມາຮ່ວມຕັດສິນລາວລີກ ຕາມການຢືນຢັນຂອງ ທ່ານ ໄຊປະເສີດ ພົງຊະນິດ ຫົວໜ້າພະແນກກໍາມະການຕັດສິນ ທັງເປັນກໍາມະການຕັດສິນລະດັບ ຟີຟາ ໄດ້ລາຍງານໃຫ້ຮູ້ວ່າ: ນັບຕັ້ງແຕ່ທ້າຍອາທິດທີ່ຜ່ານມາ ໄດ້ມີການຝຶກອົບຮົມກໍາມະການຕັດສິນ ເຊິ່ງໄດ້ມີການທົດສອບພາລະກໍາລັງ ແລະ ອື່ນໆ ເຮັດໃຫ້ມາຮອດປັດຈຸບັນແມ່ນມີຄວາມພ້ອມ 100% ໃນການກະກຽມເຂົ້າຕັດສິນໃນການແຂ່ງຂັນເປບຊີ ລາວລີກ 1 ລະດູການ 2020 ໂດຍປີນີຈະໃຊ້ກໍາມະການທັງໝົດ 34 ຄົນ ໃນນັ້ນເປັນກໍາມະການຕັດສິນ 13 ຄົນ ແລະ ຜູ້ຊ່ວຍກໍາມະການຕັດສິນ 21 ຄົນ ທີ່ມາຈາກຫຼາຍພາກສ່ວນ.
ພິເສດກໍແມ່ນ ນາງ ພຸດສະຫວັນ ຈັນທະວົງ ຜູ້ຊ່ວຍກໍາມະການຕັດສິນຍິງ ລະດັບຟີຟາ ທີ່ເຂົ້າມາຊ່ວຍຕັດສິນ ເຊິ່ງເປັນຄັ້ງທໍາອິດໃນລີກສູງສຸດຂອງລາວ ທີ່ໃຊ້ຜູ້ຊ່ວຍກໍາມະການຍິງເຂົ້າຮ່ວມຕັດສິນ, ນອກນັ້ນ ກໍຍັງມີຜູ້ປະເມີນກໍາມະການຕັດສິນ 5 ຄົນ ສໍາລັບໃນປີນີ້ລາວເຮົາ ມີກໍາມະການຕັດສິນຟີຟາ 3 ຄົນ, ຜູ້ຊ່ວຍກໍາມະການຕັດສິນ ຟີຟາ 6 ຄົນ (ຍິງ 1 ຄົນ) ແລະ ກໍາມະການຕັດສິນຟີຟາ ຟຸດຊໍ 1 ຄົນ
ສໍາລັບ ການແຂ່ງຂັນບານເຕະ ເປບຊີ ລາວລີກ 1 ລະດູການ 2020 ໃຊ້ 2 ສະໜາມແຂ່ງຂັນປະກອບດ້ວຍ ສະໜາມກີລາແຫ່ງຊາດ ຫຼັກ 16 (ສະໜາມໃນ) ແລະ ສະໜາມກີລາແຫ່ງຊາດ ຫຼັກ 16 (ສະໜາມນອກ) ເຊິ່ງຈະເປີດສາກຂຶ້ນຢ່າງເປັນທາງການໃນວັນເສົາທີ 11 ກໍລະກົດ 2020 ໂດຍຄູ່ເປີດສະໜາມມີຄື:
-ເວລາ 16:00 ໂມງ ມາສເຕີ 7 ເອັຟຊີ ພົບ ລາວໂຕໂຢຕ້າ ເອັຟຊີ ແຂ່ງທີ່ສະໜາມໃນ
-ເວລາ 16:00 ໂມງ ຊ້າງນ້ອຍ ເອັຟຊີ ພົບ ເອັສຣາ ເອັຟຊີ ແຂ່ງທີ່ສະໜາມນອກ
