ຄະນະກໍາມະການຄຸ້ມຄອງໄພພິບັດ ຂັ້ນສູນກາງ ດຳເນີນກອງປະຊຸມ ຄັ້ງປະຖົມມະລຶກ

ກອງປະຊຸມຄັ້ງປະຖົມມະລຶກຂອງຄະນະກໍາມະການຄຸ້ມຄອງໄພພິບັດຂັ້ນສູນກາງ ໄດ້ຈັດຂຶ້ນໃນວັນທີ 9 ກໍລະກົດນີ້ ທີ່ນະຄອນຫລວງວຽງຈັນ, ພາຍໃຕ້ການເປັນປະທານຂອງທ່ານ ຄໍາແພງ ໄຊສົມແພງ ລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ, ຮອງປະທານຜູ້ປະຈໍາການຄະນະກໍາມະການຄຸ້ມຄອງໄພພິບັດຂັ້ນສູນກາງ, ມີບັນດາຄະນະກໍາມະການຄຸ້ມຄອງໄພພິບັດຂັ້ນສູນກາງ, ຜູ້ປະສານງານຈາກບັນດາກະຊວງເຂົ້າຮ່ວມ ເພື່ອປະກອບຄຳຄິດເຫັນ ແລະ ພິຈາລະນາຮັບຮອງ​ເອົາບົດລາຍງານສະພາບໄພພິບັດ ແລະ ການແກ້ໄຂຊ່ວຍເຫລືອສຸກເສີນໄລຍະຜ່ານ​ມາ ​ແລະ ແຜນການກຽມພ້ອມຕອບໂຕ້ໄພພິບັດ ປີ 2020, ຂໍ້ຕົກລົງວ່າດ້ວຍການແບ່ງຄວາມຮັບຜິດຊອບຂອງຄະນະກຳມະການຄຸ້ມຄອງໄພພິບັດຂັ້ນສູນກາງ ແລະ ກາໝາຍຂອງຄະນະກຳມະການຄຸ້ມຄອງໄພພິບັດ.

ກອງປະຊຸມໄດ້ເຫັນດີເປັນເອກະພາບຕໍ່ການສະເໜີຮັບຮອງດໍາລັດ ວ່າດ້ວຍກອງທຶນຄຸ້ມຄອງໄພພິບັດ, ການສ້າງຮ່າງແຜນຍຸດທະສາດແຫ່ງຊາດ ວ່າດ້ວຍການຄຸ້ມຄອງຄວາມສ່ຽງໄພພິບັດ ໄລຍະປີ 2021-2025 ແລະ ການຊຸກຍູ້ໃຫ້ອົງການປົກຄອງທ້ອງຖິ່ນ ສ້າງແຜນຫລຸດຜ່ອນຄວາມສ່ຽງໄພພິບັດ ແລະ ແຜນການກຽມພ້ອມຕອບໂຕ້ໄພພິບັດຢູ່ຂັ້ນແຂວງ, ເມືອງ ແລະ ບ້ານ ລວມທັງການເພີ່ມທະວີວຽກງານການຝືກອົບຮົມ ແລະ ການສາທິດຕອບໂຕ້ສຸກເສີນ, ການໂຄສະນາປູກຈິດສໍານຶກແກ່ສັງຄົມ, ຊຸມຊົນ ດ້ານວຽກງານການຄຸ້ມຄອງໄພພິບັດ, ການຈັດຕັ້ງເຜີຍແຜ່ກົດໝາຍ ວ່າດ້ວຍການຄຸ້ມຄອງໄພພິບັດໃຫ້ທຸກຄົນໄດ້ຮັບຮູ້ ​ແລະ ​ເຂົ້າ​ໃຈ.