ເຫດຄາຕະກຳບ້ານຫ້ວຍຫ້ອມເຈົ້າໜ້າທີ່ພວມເລັ່ງຕາມຫາຄົນຮ້າຍ ມາດຳເນີນຄະດີໂດຍໄວ

ເຫດຄາຕະກຳຢູ່ບ້ານຫ້ວຍຫ້ອມ ເມືອງສີໂຄະບອງ ນະຄອນຫລວງວຽງຈັນ ເມື່ອວັນທີ 8 ກໍລະກົດນີ້ ຍັງບໍ່ສາມາດນຳຕັບຄົນຮ້າຍໄດ້ເທື່ອ.

ຕໍ່ເຫດການດັ່ງກ່າວ ຮອງນາຍບ້ານ ຫ້ວຍຫ້ອມໃຫ້ຮູ້ວ່າ: ພາຍຫລັງໄດ້ຮັບແຈ້ງຈາກປະຊາຊົນ ຈຶ່ງໄດ້ໄປເບິ່ງເຫດການຕົວຈິງ ຈຶ່ງເຫັນສະພາບດັ່ງກ່າວມີຜູ້ເສຍຊີວິດ 1 ຄົນ ດ້ວຍລູກປືນທະລຸຈາກຂ້າງຫລັງກໍ້າຊ້າຍຊອດໃສ່ຫົວໃຈ (ໜ້າເອິກກໍ້າຊ້າຍ), ຜູ້ເສຍຊີວິດເປັນເພດຊາຍ ຊື່ທ້າວທອງຈັນ  ອາຍຸ 19 ປີ ພວມຮຽນຢູ່ຊັ້ນມັດທະຍົມປີທີ 7 ເປັນປະຊາຊົນຢູ່ບ້ານຊອກ ເມືອງສັງທອງ ນະຄອນຫລວງວຽງຈັນ.

ຈາກພາບກ້ອງວົງຈອນປິດຢູ່ເຂດໃກ້ຄຽງເຫັນພາຍລົດອີກຄັນໜຶ່ງຮຽງກັນໄປ ກ່ອນເກີດເຫດ ແຕ່ຍັງບໍ່ສາມາດລະບຸໄດ້ຊັດເຈນ ເນື່ອງຈາກສະພາບອາກາດຍັງມືດ, ສ່ວນການຕິດຕາມຫາຄົນຮ້າຍຍັງຢູ່ໃນຂັ້ນດຳເນີນການຂອງເຈົ້າໜ້າທີ່ຕຳຫລວດ ເຊິ່ງຄວາມຄືບໜ້າຈະເປັນແນວໃດນັ້ນຈະລາຍງານໃຫ້ຊາບຕື່ມພາຍຫລັງ.