UNFPA ປະຈຳລາວມອບລົດບໍລິການ ກວດສຸຂະພາບເຄື່ອນທີ່ໃຫ້ແກ່ສູນພັດທະນາສຸຂະພາບ
ໃນວັນທີ 8 ກໍລະກົດນີ້, ອົງການສະຫະປະຊາຊາດ ກອງທຶນສຳລັບປະຊາກອນ (UNFPA) ປະຈຳ ສປປ ລາວ ໄດ້ມອບລົດບໍລິການກວດສຸຂະພາບເຄື່ອນທີ່ ເພື່ອເຂົ້າເຖິງການບໍລິການທີ່ເປັນມິດແກ່ເຍົາວະຊົນ, ສຸຂະພາບທາງເພດ ແລະ ຈະເລີນພັນ ໂດຍສະເພາະກຸ່ມຄົນທີ່ເປັນກຸ່ມສ່ຽງຢູ່ໂຮງຈັກໂຮງງານຕ່າງໆ ເຊິ່ງພິທີມອບຮັບໄດ້ຈັດຂຶ້ນທີ່ຫ້ອງວ່າການປົກຄອງ ນະຄອນຫລວງວຽງຈັນ.
ທ່ານ ນາງ ມາຣຽມ ເອຄານ ຜູ້ຕາງໜ້າອົງການ UNFPA ປະຈຳ ສປປ ລາວ ກ່າວວ່າ: ການແຕ່ງງານ ແລະ ຖືພາກ່ອນໄວອັນຄວນຢູ່ສປປ ລາວ ກວມ 42% ຂອງໄວໜຸ່ມຍິງ, ເມື່ອແມ່ຍິງ ແລະ ໄວໜຸ່ມຍິງ ມີການພົວພັນທາງເພດ ເຮັດໃຫ້ເຂົາເຈົ້າມີຄວາມຫຍຸ້ງຍາກຫລາຍ ໃນການເຈລະຈາເລື່ອງການຮ່ວມເພດແບບປອດໄພ, ເຊິ່ງເຂົາ ເຈົ້າເຫລົ່ານີ້ ມີຄວາມຮູ້ທີ່ຈຳກັດຕໍ່ທາງເລືອກໃນການປ້ອງກັນ ແລະ ການຄຸມກຳເນີດ. ການໃຫ້ບໍລິການສຸຂະພາບທາງເພດ ແລະ ສຸຂະພາບຈະເລີນພັນ ຢູ່ໃນສະຖານທີ່ເຮັດວຽກ ໄດ້ພິສູດໃຫ້ເຫັນວ່າ ມັນເປັນວິ ທີການທີ່ມີປະສິດທິພາບ ໃນການເຂົ້າເຖິງໄວໜຸ່ມໃນບ່ອນເຮັດວຽກ ທີ່ມີແຮງງານເປັນໄວໜຸ່ມເປັນຈຳນວນຫລາຍ. ໃນປີຜ່ານມາ ສູນພັດທະນາສຸຂະພາບແມ່ຍິງ ແລະ ໄວໜຸ່ມນະຄອນຫລວງ ໄດ້ເຂົ້າເຖິງແຮງງານໄວໜຸ່ມ ຫລາຍກວ່າ 3.200 ຄົນ ໃນໂຮງງານຕັດຫຍິບຢູ່ໃນນະຄອນຫລວງວຽງຈັນ.
ຜົນທີ່ໄດ້ຮັບຢືນຢັນວ່າ ການບໍລິການດັ່ງກ່າວ, ເປັນທີ່ຕ້ອງການຢ່າງສູງໃນບັນດາໄວໜຸ່ມ ທີ່ເຮັດວຽກຢູ່ໃນໂຮງງານ ແລະ ສົມຄວນແກ່ການເຂົ້າເຖິງໃນທຸກທີ່ທຸກເວລາ.
